Panasiamo 19

1

2

3

4

5

6

7

8

9

10

11

12

13

14

15

16

17

18

19

20

21

22

¹Dee maitakao siopa kaitinya katao keekae mende endakali kambu andake mendeme lee lao lao pituu, “Naimame Gote lao tama pimana! Naimanya Gote dokome endakali pyoo nyoo katenge. Baa pupu lao tii pyoo katengeaka!

²Baame mana angipi tolataepi minao endakali dupa yapenge. Enda akali nyele-nyelepaenge dokonya mana dokome yuunya endakali dupa koyasiamo doko baa Goteme yanu nyoo yapea. Dee enda dokome Gotenya kendemane dupa taiyoko nyiamo dokonya Goteme yanu nyiakana,” leami.

³Dupame deaka lao pituu, “Baa yangeamo doko tao koteaka lao kena pyoaka katengena, naimame Gote lao tama pimana,” leami.

⁴Dokopa isingi akali kingi ita lapoma-kisa dee kitomendepi opale lenge tenge kitomendepi dupame kiŋi petenge toko dokonya petenge Gote doko kandao tama pyoo pituu, “Kiningi, naimame Gote lao tama pimana!” leami.

⁵Dopa leaminopa kiŋi petenge toko dosa katao pii mende lao pituu, “Gotenya kendemane endakali kenge singi dupapi, meepi, Gote paka kaengepi nyakama pitakame naimanya Gote doko lao tama pyepa!” lea.

⁶Dokopa keekae mende leamo dokonya endakali kambu longo mendeme lengepi, endaki andake oo lengepi, kaiti toka andake lengepi dopale joo lao pituu, “Naimanya Kamongo Gote eteteaka pupu lapae naima isoo katenge doko lao naimame lalyemana!

⁷Naima mona yaepao eteke pyao baa lao lalyemana! Doko aipuma? Sipisipi Yakane dokonya enda yoko pyapengegii doko ipatelyamo. Baanya enda doko depa latae pitipilyamoaka.

⁸Goteme enda doko kolosa kaimala napingi eteteaka kyoo lapae mende maipumu petae pilyamona,” leami. Kolosa kyoo lapae doko Gotenya endakali dupame mana tolao miningi doko.

⁹Dee enjele dokome namba langyoo, “Embame pii datupa pepa pyape: ‘Sipisipi Yakanenya enda yoko pyao watapae pyatamo dokonya epena latae endakali dupa mona yaepena! Pii dutupa Gotenya pii kiningi etetena,” lea.

¹⁰Dopa lateamopa nambame baa lao tama pyaanya baanya moko kateamo dosa isa luma lakeo. Dopa piwaka doko, baame lao pituu, “Embame dopa napi. Nambame embapi Jisasame pii leamo minilyamino embanya masoo miningi kaiminingi dupapi nyakama-pipa kalai mendai pingina, embame Gote lao tama pipi,” lea. Jisasame pii leamo dupa potopesa dupame pii leamino dupanya angi doko.

¹¹Kaiti doko wakale pyoloo petae siamopa mena osa kyoo lapae mende kateamo kandeo. Dokonya peteamo doko kenge Angi Tolatae lenge. Baame mana tolatae minao endakali dupa yapenge. Dee, mana tolatayaka minao yanda pingi.

¹²Baanya lenge dolapo itate yuli jiamopa baame kiŋinya balu mandipala kiŋi longo isoo katea. Dopa piamopa kenge mende baa-kisa pyatae katea. Kenge doko mendeme masala naelyamopa baa tangeme iki masingi-pyaa.

¹³Baa yonge pee londe taiyoko pata-pata petae mende petae katea. Baanya kenge doko Gotenya Pii lapae lenge.

¹⁴Kaitinya yanda singi amii dupame yonge pee londe kyoo lapae kaimala napingi dupa petala mena osa kyoo lapae dupanya pituu baa watao peami.

¹⁵Baame netesa endakali dupa pyatopa lao baanya nengekaita konjua nenge katapae mende pyakaetae katea. Baame aene kolyepe mende minao netesa endakali dupa iseta. Getepe lyao indingi yuli dokonya baame getepe indyeta. Indyetamopa waene ipatamo doko Gote eteteaka pupu lapae dokonya imbu kaenge andake doko.

¹⁶Baanya yonge peepa paingipa dolaponya dapa lao kenge pyatae katea: KINI DUPANYA KININA dee KAMONGO DUPANYA KAMONGONA latae katea.

¹⁷Dee enjele mende niki lenge dokonya kateamo dokome yaka kaitipa kopao pee lao payamino dupa puu lao wii lao lamaiyoo, “Nyakama Gotenya nee andake dokonya nalapale limbalapa.

¹⁸Nyakamame kiŋipi, yanda singi amii isingi mupapi, akali pupu lapaepi, mena osapi, osanya petenge akalipi, kendemanepi, meepi, kenge singipi, nasingipi, dupa pitakanya yonge dupa nalapa,” lea.

¹⁹Dokopa mena kapua mendepale dokopi, yuunya kiŋi dupaapi, dupanya yanda singi amiipi dupame mena osanya peteamo dokopi, dokonya yanda singi amiipi dupa yanda pimaiyanya kapeami.

²⁰Yanda petala osanya peteamo dokome mena kapua dokopa, dokonya enombasa kongali dupa pyoo kateamo sambo potopesa dokopa dolapo anjia. Sambo potopesa dokome kongali piamo dupame endakali mena wangi tao wasepae doko lao lalyingi dupapi baanya kongali petae dupapi dupa minakasia. Mena kapua dokopa sambo potopesa dokopa dolapo lenge taputa kana itateme tao aluookatenge itate pete andake dokonya soo pyandea.

²¹Dokopa kiŋi dupapi, dupanya yanda singi amii dupapi dupa akali osanya peteamo dokome baanya nengekaita konjua pyakaetae kateamo dokome kepao kumasia. Dopa peteamopa yaka dupa pitakame ipao dupa nao etete tomba kendeami.