1Chi gudeed gunáa ne bindiaga ziy, chiyru diipguilliú bindiaga rsee zienguilliú de ni canii llayabaa, laadeb rniideb: ¡Xtiosten Dios! Pur Xtadnɨ Dios zéed perdón, didxdoo ne guelrnabee.
2Te pur laany guldípacny ne xnezzacny runny guelgurtisy, absiáldny castigu gunaadxab ni gulugueeu de bniety guɨchliu cun de mal xtenbɨ. Abaany Dios guelgurtisy cun laab par gudillybɨ ni gudinxúdeb de xpɨnny.
3Chiy gubíi bindiaga guniideb stuby: —¡Xtiosten Dios! Quɨt chúuti dxi yiuu guux ni cayaaicqui guɨdxqui.
4Ax irate galdbitap de bɨngul cun idapte de many ni nabányqui guzullibdeb nez lo yallily xte Dios rut zubny canabeeny par btodebny, guniideb: —¡Xtiosten Dios! ¡De diidx zaac ná par laany!
5Chiy nez rut zu yallilqui bindiaga rsee tuby ni gunii: Iratectɨ zeclɨ de guroo ne de bichiin gulzubyaa Xtadnɨ Dios, laat ni runtɨ sirvɨ lony ne ráptɨ didxdoony.
6Ziyza bindiaga zec chi ríeny rsee bniety guilliú, o zec chi rubi de nisroo, o zec chi cuenzi juers rnii de guziuu, rniideny: ¡Xtiosten Dios! Te pur acanabee Xtadnɨ Dios, laany ni napny irate guelrnabee.
7Anre gultoo izaclaaznɨ, per quesentiand izaclaaznɨ ne izubyaanny. Te pur abdzɨny dxi ni guchnaa Corder xte Dios ne ni gac chialny azuchuub,
8nacubɨ lady zaac, nguits, nania ne rcuabcháa. Te pur lady nguitsqui zelo de cos güen ni baany de xpɨny Dios.
9Chiy gunii ánglɨ nare: —Quebcuaa: “Dichos de ni ná par gueed saa xte Corder xte Dios.” Ne guniiza ánglɨqui: —Ninguide ná didxldí xte Dios.
10Ax guzullibia nez lo ánglɨqui par ituaany, per laany guniiny nare: —Quɨt runu zeec. Te pur nare zectiziac liú, mandadzi cadxannɨ xte Dios, zectiziac iraru de soo ni guldípac run cuend xtiidx Jesús. Bto Dios. Te pur, pur Jesús zéed irate ni rnii de ni rnii xtiidx Dios.
11Chiyru gunáa zullal llayabaa ax gunáa tuby cabay nguits. Chiy ni beebmɨ lá ni Rzuub xtiidxny ne ni Guldípac, pur ni xnezpacni runny guelgurtisy ne de guerr xtenny.
12De bslony rcuabcháa zec bal ne zieny de curon nuu quiany. Chiy tuby latny cá lá tuby ni quɨt tu racbeeti, laatisny nánny xi zeloy.
13Ne dibyrɨntec xabny, ax lány: XTIIDX DIOS.
14Chiy de xsuldadny xte llayabaa zanalddebny beebdeb de cabay nguits, nacudeb de lady zaac nguits ne nania.
15Ruuny rdiia tuby spad ni quesentiand cá lonii, cun spadqui gúnny castigu bɨnguɨchliu, ne cun var guiib inabeeny laadeb. Zecpacza ni raapy bniety quia uv par rllii quiani, ziy isiáldny laadeb castiguroo ni zéed pur Dios ni nap irate guelrnabee.
16Lo xcapny cun cuee cuudyny cá de diidx ni rnii: REY NI RNABEE LO DE REY NE DAD NI RNABEE LO DE DAD.
17Chiyru gunáa tuby ánglɨ zuldí lo gubidx, quesentiand diip rbɨxtiany, rbɨdxny de many ni candza nez llayabaa, raipny laadem: —Gultaa, guldxasaa rut inɨɨdx Dios laat ni got zecpaczaxnarul,
18zeclɨ beel xte de rey, xte de capitán, xte de bɨny ni quɨt tu runti gan lonii, zeclɨza beel xte de cabay, xte de ni beeb laadem, beel xte irate bɨny, zeclɨ xte de esclav ne xte de ni quɨt ná esclav, zeclɨ xte de guroo ne de bichiin.
19Chiy gunáa monstruo cun de rey xte lo guɨchliu ne de suldad xtendeb, adxasaadeb par tildnédeb ni beeb cabay nguitsqui cun de suldad xtenny.
20Per laadeb gunaazdeb monstruoqui cun profet fals ni run de milagrɨ nez lo monstruoqui. Ne pur de milagrɨqui baanbɨ engany de ni guu seny xte monstruoqui ne btodeb figur xtenmɨ. Ax monstruo cun profet falsqui, iroptedeb dibynabánydeb bcuaadeb laadeb lo bal rut cayaaicqui azufrɨ.
21Chiy irateru de xpɨny monstruoqui gutydeb pur spad ni rdiia ruu ni beeb cabay nguitsqui, ax gudo de many llayabaa laadeb, axt bialdem xpeeldeb.
