1Eme no sambâŋko ŋic guru sâko jaŋere micʒonʒoŋ tinac manapo, jaŋe musereckerâ ʒiŋuc mumbiŋ: “Haleluja, bâbâpiaŋ â eri tatamac â tâpiri ɋuŋɋasaŋ, i Anutu‐nâŋec erao fokac.
2Eki hâcne okac babazu gie bame fârinehec â sâckoa eekac. Sasec ŋokac sâko e mâreŋ sâc ŋic sasec qazu‐jarehuc sipiric‐jopawec ere kiŋtofa bazuwec, ehuc ŋicfâc‐ticne jaŋere socte kiŋ fowec i batarawec.”
3Iŋuc murâ harierâ musereckerâ mumbiŋ: “Haleluja, hae sâko ere hosâczi ŋezurâ ŋezu fehuc foocmu sanaŋ.”
4Eme ŋicqizec 24 â wiac jujune 4 jaŋe waha fodaperâ Anutu eri ŋeŋe‐ticnao ŋewec e muteŋkehuc ʒiŋuc mumbiŋ: “Jâmbomac, Haleluja.”
5Eme eri ŋeŋe ŋeweckonec dâŋ ʒiŋuc fuawec: “Anuture kiŋaŋŋicfâc ŋoŋe e muteŋke‐fâreniŋ, fekicne wahakicne araŋ bacneeŋgopieŋzi iŋuc hâcne eniŋ.”
6Eme no micʒonʒoŋ sâko tinac mocwâc manapo, i opâ sâro fânâŋ â ɋuŋfânâŋ tinac ewec. Ine wiwira dâŋ ʒiŋuc fuawec: “Haleluja, Wofuŋ Anutu‐nâŋec bapafâre e guriŋ bapa gie‐ticne tâtâc fuŋkekac.
7Irec nâŋâc ʒeri bubiaŋ ecnehuc mumbiaŋkenaŋ. Lamare ʒeri hombaŋ maickekacte biŋefâc‐ticne ʒawieŋgopieŋ.
8Jaŋe ŋaqi qaŋqaŋ kisieckekicne rojuniŋte mana‐jarekicne.” Wofuŋte tiriŋicfâc eebapa tiŋne bâfuambiŋ, izi ŋaqi‐jeŋic ekac hâcne.
9Eme dâŋ moc nazawec, “Go kecʒiŋuc qâreŋkec: Lamare ʒeri hombaŋko tiwâ bâzi nâniŋte hefârec‐jopakicne, jaŋe ʒeri bubiaŋ mana‐jarezo.” Iŋuc murâ muwec: “Dâŋ gazakopac i Anuture dâŋ fâri hândâŋne jâmbâŋ.”
10Iŋuc nazame no dieŋzi hecnerâ numucnezo ehape qatara‐narerâ muwec: “Misac, iŋuc mi ec, no kiŋaŋ qaqa âgoge, â qomâfâcge Jesu hâwicmâc mutaniŋkeeŋgopieŋ jaŋere âgo jaha. Go Anutu e jahacne sawa daŋge nunumu ecnec.” Jesu mumutaniŋke i findaŋdâŋ mumu Mâro ere gie.
11Eme no ʒâŋe firâ mi sambâŋ aŋkeme becâsic qaŋqaŋ moc honezepac i! Eme fainao ŋewec e ʒâŋene Mume sasanaŋ â Fârine mumu. E okac babazu gie â ʒika gie bâbâsifuc tâmiric sâkoa baekac.
12Ʒâŋe jahec‐ticne ʒocbâruŋ iŋucne, qizec‐ticnao ŋicwofuŋ du bocjaha ŋewec. Erâ ʒâŋe qâreŋ‐ticne fowec i e jahaczia buc wose manac eekac.
13Ŋaqi ʒora‐ticne i soc ruacnekicne, erâ ʒâŋe‐ticne i “Anuture Micdâŋ” mukicne.
14Rame sambâŋkonec momori gurune gurune jaŋe becâsic qaŋqaŋkoa ŋehuc bâjâpembiŋ. Ŋaqi‐jeŋic qaŋqaŋ kisieckekicne.
15Micticnaonec ine sâqe ʒika mictara moc wefuwec, izi hâcne ŋicne ŋicne jopa bâtiŋ ejareocmu. Erâ aeŋ gunu bajuhuc soŋaŋ‐jopaocmu. Erâ Anutu bapafâre ere kimbeŋ bajaŋgeŋkehuc tofa babazu gie baocmu.
16Ŋaqi‐ticne ombâŋnao ʒâŋe qâreŋ‐ticne ʒiŋuc fokac, ŋicwofuŋ jaŋere Wofuŋ Sâko, fekicne jaŋere Fekicne.
17Eme no ʒâŋe firâ aŋelo moc ʒoaŋko domame honepo. E ira domahuc wipe sawao rac warec embiŋ jaŋe mâmâc sasawa wiwic jaha wira‐jarehuc muwec: “Anutuzi ʒepec sâko bâfuakacte ware tumaŋne‐fâreniŋ,
18ehuc ŋicwofuŋ jaŋere sahac biuc â fekicne jaŋere sahac biuc â ŋic sanaŋne jaŋere sahac biuc, erâ becâsic â momorifâc‐jeŋic jaŋere sahac biuc erâ ŋic mâmâc sasawa, ŋicbomboŋ â kiŋaŋ qaqa, fekicne â wahakicne jaŋere sahac biuc nâfârenʒepieŋ.”
19Eme no qowi mimicne e â mâreŋ sâc ŋicwofuŋ â momorifâc‐jeŋic tumaŋne‐fârepie honec‐jopapo. Jaŋe becâsic qaŋqaŋko ŋewec e â momorifâcne râsi ejareniŋte fisimbiŋ.
20Eme qowi mimicne â porofete burecne‐ticne jahe dockepic. Porofete burecne eki hâcne qowi mimicnere maio mâsi fuŋne fuŋne bawec, ehuc qowi mimicnere ʒâŋe qâreŋ bajumbiŋ â hawari‐ticne dieŋzi hecnembiŋ ŋic i maŋ bâsifuc ejarewec. Eme jahe ɋâricne rocjofarâ lambe opâre riqiczi ʒoc ʒahuc foekac ira behec‐jofapie hupic.
21Gâcne sâko jaŋe ine becâsic qaŋqaŋko ŋewec ere mickonec sâqe ʒikazi waharâ jopa‐fârewec. Eme wipe jaŋe fisirâ sahac biuc‐jeŋic nârâ gagapec embiŋ.
