Revalesen-Hufo Hu'ne 19

1

2

3

4

5

6

7

8

9

10

11

12

13

14

15

16

17

18

19

20

21

22

¹Anazama fore'ma hutege'na, nagra antahugeno, tusi'a vahe'mokizmi zmagerukna hu'za monafinti zmageru ru'za anage hu'naze, Ra agi amisune! Masazane hihamune hanavene tahokeno tagu'vazizana, tagri Anumzamofo su'zane.

²Na'ankure Anumzamo'ma refkoma hiazamo'a, tamage huno fatgo hu'ne, na'ankure tusi'a monko a'ma Anumzamo'ma refkoma huntenea a'mo'a, ama mopafi vahera havi monko avu'avazama'areti zmazeri haviza nehuno, Anumzamofo kazokzo eriza vahera zmaheno korana eritagi atrenegu, Anumzamo'a nona ana ara huntene.

³Anante ete mago'ane anage hu'naze, Anumzamofona Ra agi amisune! Ana a'mofo krerasagea teve tokimo'a mreri vava nehie hu'za hu'naze.

⁴Anante 24'a ugagota kva vahe'mo'zane, 4'a kasefa hu'za mni'naza zgamo'za zmavugosaregati mopafi mase'za, kini tratema mni'nea Anumzamofo monora hunente'za, anage hu'naze, Tamage Anumzamofona ra agi amisune! hu'za hu'naze.

⁵Hagi mago agerumo kini trateti huno anage hu'ne, maka Agri kazokzo eri'za vahe'motane, Anumzamofonku'ma kore'ma hunentaza vahe'motane, tamagi omne vahe'motane, tamagi me'nea vahe'mota, Anumzamofona ra agi erihentesga hiho huno hu'ne.

⁶Anantera nentahugeno tusi'a vahe'mofo agerukna huno zmagerura neru'za, ranra timofo agasasa kegna nehu'za, tusi'a monage hiankna hu'za, anage hu'naze, Anumzamofona ra agi amisune! Na'ankure hanavenentake Ra Anumzantimo'a kini manino kegva hu'ne hu'naze.

⁷Tagra musenkase huta ra agi amisune, na'ankure sipisipi anentamoma aravema hania kna egeno, ana ne'mofontema maresia a'mo'a retro huno mni'ne.

⁸Ana a'mofona kukenama hanigu agru huno zaza efeke kukena ami'ne. E'i ana zaza kukena Anumzamofo nagamokizmi fatgo zmavu'zmavazane.

⁹Anantera ankeromo'a anage huno nasamine, Sipisipi anentamo'ma aravema hania nezantema agima hu'nemo'a muse hino hunka krento, mago'ane anage huno nasamine, Ama'i tamage Anumzamofo naneke

¹⁰Anante nagranena agiafi narena rena mono hunte'za huanagi, ana ankeromo'a anage huno nasamine, e'inahura osuo, kagrane negafuzane nehazaza hu'na nagra Anumzamofo eri'za vahe mni'neta, Jisasi'ma hu'nea ke'mofo huama nehuta, Anumzamofo monora huntegahune. Na'ankure Jisasi'ma hu'nea kemo vahe'mofona azeri otigeno, kasnampa kea huama nehaze.

¹¹Hagi monamo'a anagigena efeke hosi afu'mofo agumpi mago ne' mni'negena ke'noe. Ana ne' mofonkura, hugahue hunoma hiaza nehimo'e huza nehu'za tamage nere hu'za nehazamo'e. Fatgo avu'avate refko huno hara nehie hu'ne.

¹²Avurgamo'a teve anefakna nehigeno, asenirera rama'a kini vahe'mofo fetori me'geno, Agrira mago agi avufarera krentene, mago vahe'mo'a ana agia ontahigahianki, Agrake antahine.

¹³Ana ne'mo'a korampi re'nea zaza kukena hu'ne. Agi'ama henazana, Anumzamofo Naneke hu'naze.

¹⁴Hanki monafi mni'naza sondia (ami) vahe'mo'za agru huno knarezantfa hu'nea efeke kukena hu'ne'za, amage ante'za efeke hosi afutamimofo agumpi vu'naze.

¹⁵Ana ne'mofo agipintira tarekaziga asane kazi atiramineakino, ana kazinuti maka kumapi vahera nezmaheno, aeni azompareti kini manino kegva hunezmante'na, hanavenentake Anumzamofo rimpahe knazamo'a, agareti waini regatiti nehiakna huno zmahegahie.

¹⁶Hanki zaza kukena'are'ene amotera anage huno krentene, Mika kini vahe'mofo Kini manino, maka ra vahe'mokizmi Ra manine huno krentene.

¹⁷Anantera mago ankeromo'a zgefi otinegena kogeno, ranke huno anage hu'ne, maka monafima hareno vano nehia nma zgagura huno, Anumzamofo tusi'a nezantera etaru hutma,

¹⁸kini vahe'mofo zmavufgane, ugota sondia vahe'mofo zmavufgane, hanavenentake vahe'mofo zmavufgane, hosi afumokizmi zmavufgane, hosimofo zmagofetuma nemaniza vahe'mofone, maka vahemofone, amne vahe'mofone, kazokazo vahe'ene zmagi omne vahe'ene, zmagi me vahe'mofo zmavufga negahaze huno zamasmi'ne.

¹⁹Anantera afi zgane, mopafi kini vahe'mo'zane, sondia vahe'zmimozanena eri atru hute'za, hosi afumofo agumpi Mni'nemofone, sondia vahe'anena ha' huzmantenaku eri atru hu'naze.

²⁰Ana nehazageno ana afi zgane, havige kasnampa vahe'ene zanazerino kina reznante'ne. Ana kasnampa vahe'mo'a, afi zgamofo avure ruzahu ruzahu avame'za eri fore nehuno, ana afi zgamofo nampama eri'naza vahe'ene, afi zgamofo amema'are mono hunentaza vahe'ene rezmataga hu'ne. E'ima rezmatga hu'nea kasnampa vahe'ene ana afi zgane mani'nakeno havere tevava nehia teve tirupi znavre atrenigeke manigaha'e.

²¹Hanki ruga'amokizmia, hosi agumpi manino nea ne'mofo agipinti atiraminea tare kaziga asanenea kazimo, zmahe vgaregeno maka nmaramimo'za zmavufga nevgare'naze.