1Después de cain jihi, janha coian tté tsje chojni que joixin de ngajni que ndac̈ho soji: ¡Nttocoanxinhi na Dios! Dios de ján na tti danjo iná vida naroaxin, co jehe chonda cain gloria co cain joachaxin,
2ixin jehe nchejuzgá inchin jiquininxin, co ndoa tti jehe nchejuzgá; ixin jehe joinchecondená tti ciudad jie co jianha, tti joincheconcaẍa ngoixin mundo de ixin tti jianha que jehe joinchehe; Dios joinchecastigá ciudad mé ixin jehe vantsjehe vidé ninchehe ẍé jehe.
3Cottimeja cjan cain chojni mé ndac̈ho na iná: ―¡Nttocoanxinhi na Dios! Ixin tti nchin de ciudad mé ẍonhi tiempo tasehe de tsjinji nchin mé.
4Co tti veinticuatro nittetonha co tti nó cosa que techon vinttecjañantaha nontte co joinchecoanxinhi Dios que retaha nttaxintaoen, co vinttendac̈ho na: ―¡Amén! ¡Nttocoanxinhi na Dios!
5Cottimeja coinhi ni ná tté ángel que joixin de ngaca nttaxintaoen Dios que ndac̈ho: Nchecoanxinhi ra Dios de ján na cain jaha ra ẍo nchehe ra ẍé co ẍagonhe ra jehe masqui nchinnchin ra o yeye ra.
6Co cai coian ná cosa que inchin tté tsje chojni co inchin are daẍoin jinda de tsje río, co inchin are soji joattehe, co cain tté chojni mé ndac̈ho: ¡Nttocoanxinhi na Dios! Ixin ocoexinhi coetonha Dios de ján na tti chonda cainxin joachaxin.
7Cainxin na rrochá na, anto rrochá na co sonttosayehe na Dios mé, ixin ojoí tti nchanho que tsottehe Jesucristo, tti Colecoe Dios. Co c̈hihi Jesucristo ojí nc̈ha listo,
8co jehe nc̈hinovia mé vayé nc̈ha joachaxin de vengá nc̈ha tti lontto de ná manta anto fino que dinhi lino; co ẍonhi mancha chonda lontto mé, co hasta jitonguixima lontto. Ixin jehe tti lino fino mé rroc̈ho tti vida nao que chonda cain chojní Dios.
9Cottimeja jehe ángel mé ndachjenji na janha: ―Jaha ttentaxin janhi: “Anto c̈hjoin para ixin cain tti chojni que Dios nichjé ixin tsji ngain quiai tti tsottehe Jesucristo, tti Colecoe Dios.” Co ndachjenji na ángel mé: ―Cain jihi palabra ndoa que ndac̈ho Dios.
10Janha joarittoxin nttajochjihna ngaca rotté ángel para rrojinttsayá, pero jehe ndachjenji na: ―Ncheha yá, ixin janha jeho ná ninchehe ẍé Dios, jañá inchin jaha conixin cain chojni que ditticaon cain tiempo tti ndoa que cjoago Jesús. Mexinxin jaha nchesayehe jeho Dios. Ixin jehe tti joajna ndoa yá que cjoago Jesús, mé tti nchenichja cain chojní Dios joajné jehe.
11Cottimeja vicon ngajni jiẍangué co cononxin ná conxin roa, co tti jitaha va dinhi: jehe tti nchehe ẍé Dios conixin ansén, co tti ndoa. Ixin jehe ttetonha co tteto ngain guerra pero nao inchin jiquininxin.
12Jmacon chojni mé conguíxin inchin neje ẍohi, co ngataha já jidicaoxin tsje corona, co jitaxin ná nombre nganito que jeho jehe chonxin nombre mé.
13Chojni mé jingá ná lontto que diguingaxin jni, co nombré chojni mé, mé tti Palabré Dios.
14Co terroé xisoldado de ngajni, tengá xa lontto de lino anto fino, co roa lontto mé co ẍonhi jinche yá lontto, co tetaha xa joxon conxin coroa.
15Co jehe tti dinhi Palabré Dios, mé de ngain rroha jidac̈hjexin ná espada anto yao, para sincheninxin chojni de cainxin nación; co tsetonhe cain nación jihi inchin conixin ná nttacotto de chia. Co jehe sinchejuzguehe cain nación jihi inchin tti deninxin ttouva conixin rotté, co jehe mé sincheguihi cain nación tti vino que sac̈hjenguixin ttouva, pero mé rroc̈ho que jehe tti sinchegayé na tti castigo anto soji que ttixin de ngain Dios tti anto doñaohe na co tti chonda cainxin joachaxin.
16Co nganito tti manta que jitsá chojni mé, co nganito rotté tetaxin nombre jihi: “Rey de cainxin rey, co tti Ttetonha de cain tti ttetonha.”
17Cottimeja janha vicon ná ángel que tajingattjen ngataha nchanho, co coyaotte anto soji ngain cain conttoa que tjaganga para noi, co ndac̈ho: ―Ẍacoi ra co ẍatte ra para ngain tti cena de Dios,
18para sintte ra nttaohe cain rey, co nttaohe cain xigeneral, co nttaohe cain xí c̈hintto, co nttaohe conxin, conixin nttaohe xitetaha va, co nttaohe cain chojni masqui chojni que te libre o esclavo, co de chojni nchinnchin co yeye.
19Cottimeja janha vicon tti coxigo jianha conixin cain rey que ttetonha ngataha nontte, conixin cain xisoldadoe rey mé. Cain na ẍatte na para tsetocaho na jehe tti jitaha conxin coroa conixin cain xisoldadoe.
20Jehe tti coxigo jianha mé viaxinhi va ngain cárcel, conixin tti vandac̈ho ixin jehe ná tti nichja joajna que vagayé de ngain Dios, pero jeha ndoa. Co jehe mé tti joinchehe tsje milagro ngattoxon con coxigo mé. De ixin jehe cain milagro mé, jehe tti jeha ndoa tti nichja mé, joincheyehe cain tti chojni que vittoexin coá marqué coxigo jianha co joinchecoanxinhi na retratoe va. Cottimeja jehe coxigo jianha mé conixin jehe tti jeha ndoa tti nichja, jamé techon savinttetsingangui tti ẍohi que jichexin conixin azufre.
21Co tti icha chojni venxin na conixin tti espada que vac̈hjexin de ngain rroha jehe tti jitaha conxin coroa, co cainxin conttoa hasta cojexin va nttaohe cain chojni mé.
