1Ngulo mded kwaane mbin na bi cheen bos cheen zyen xaa naz yiba, xaa mbezh: ¡Gool be lo Xaa Nabeyy! Lee yalnaban kwaan tira, lee xni kwaan chul, nu lee yalngezh nak cheen Xdios be,
2nel lee xaa naab kwent nali nu tub mod wli; nu ngunaabla xaa kwent lo ngwnaa me nto cho, me kwaan kwerp cheen me mle nachan yek re xaa yizhyo; nu lo lee me ngunaab Dios kwent cheen yalgut cheen re xmos Dios.
3Zeera mbare re xaa nzhé: —¡Gool be lo Xaa Nabeyy! Nel lee zhen kwaan nroo kayek me tubka yixoob.
4Nu lee galbtap xaa gol nu dap xaa mban mkichyek axta lo yo nu mbill lo Dios, xaa nzob naz pa nabeyy xaa. Nu mbezh re xaa: —¡Sbaa gaka! ¡Gool be lo Xaa Nabeyy!
5Zee axta paro nzob Xaa Nabeyy mroo tub bos kwaan nzhé: ¡Bill gu lo Xdios be, rese gu xaa non nu xaa nanont, rese gu xaa nkee zhiin lo Dios nu rese gu xaa nzheb ne Dios!
6Nu noka mbin na tub kwaan mod bos cheen zyen doo myet, mod pa nla nis nu mod bi cheen ngwzi, kwaan mbezh: ¡Gool be lo Dios! Nel Dios, Xaa Nabeyy be tira nabeyy, xaa ngezh doo lo rese kwaan.
7Yakla be nu le chul be lextoo be, nu gool be lo xaa, nel mzhinla yalnchelya cheen Mbakxiil cheen Dios, nu lee sa xaa listla nzo.
8Nu lo lee me, mzaa xaa diizh gak me ler chul, ler rus kwaan nla xni nu nzhul na. (Nel ler chul ne nak re kwaan nali kwaan mle re xaa nambey lo Dios.)
9Nu lee mandad né lo na: —Bkee: “Wen re xaa mrezh Dios nu ya xaa lo yalnchelya cheen Mbakxiil cheen Dios”. Nu né mandad lo na: —Lee re wdizh ne nak wlipa cheen Dios.
10Nu mkichxub na lo mandad, zee gol na lo xaa. Per lee xaa né lo na: —Nalet lu sbaa, nel lee na nak mos cheen Dios mod lu nu mod re wech lu nu re bzan lu, xaa nzaa kwent cheen xtizh Jesucrist, kwent cheen kwaan mlu Dios lo xaa. Bill lo Dios.
11Nu myun yiba nzoxal lo na, nu baa nzo tub kabay rus, nu lee xaa nzob tich ma le Xaa Nali nu Xaa Wli; nu lee xaa naab kwent tub mod nali nu dil xaa.
12Lee zaalo xaa nla xni mod luzh bal, nu yek xaa nzob zyen koron, nu nik tub xaa nanlabeyyt le xaa nebse lee xaa nlabeyya.
13Nu nak xaa tub lee ler noll kwaan ngok bsii kwaan ren, nu lee le xaa nak Xtizh Dios.
14Nu nzhake re soldad yiba tich xaa, xaa nak ler chul kwaan rus na nu nzhul na, nu nzob xaa tich kabay rus.
15Nu lee roo xaa nroo tub espad kwaan ndox doo, zee seweey xaa re xaa rese yezh. Nu nabeyy xaa xaa kwaan tub bar yiib. Nu naab xaa kwent lo re xaa kwaan yalnayii cheen Dios, xaa ngezh doo. Nu naab xaa kwent mod ngichxkazii xaa ub kwaan nii xaa.
16Nu lee cho xab xaa nu cho kor xaa nkee kwaane: “Rey lo re rey nu Xaa Nabeyy lo re xaa nabeyy”.
17Nu myun lo na tub mandad, xaa nzob tich mbizh, nu dublegan nii xaa lo re mbyin, ma nzebi leen yiba, nu mbezh xaa: —¡Te gu nu bdop gu lo xchee naro cheen Dios,
18zee gaw gu baal cheen re rey, nu baal cheen re xaa nabeyy lo re soldad, nu baal cheen xaa ngu balor lextoo, nu baal cheen kabay nu xaa nzob tich ma, nu baal cheen reta lo myet, cheen xaa nabeyy nu cheen re xmos xaa, cheen xaa non nu cheen xaa nanont!
19Zee myun ma nakap lo na nu re rey yizhyo, kwaan re soldad cheen xaa, mdop re xaa zee dil xaa kwaan xaa nzob tich kabay rus, nu re xsoldad xaa.
20Nu lee xaa nzob tich kabay rus mzen ma nakap nu ma nawlit ngunii Dios lo, ma kwaan mle zyen doo kwaan gro kwaan yalnabeyy cheen ma nakap. Nu kwaan re kwaan gro kwaan mle ma ne, mkade ma zyen doo myet, re xaa kwaan nkano sey cheen le ma nakap nu mbill lo maj cheen ma. Lee rop ma ne, dub mban ma, mlebi xaa ma lo ki kwaan kayek kwaan azufre.
21Nu lee re stub naz xaa ngut kwaan espad, kwaan nroo roo xaa nzob tich kabay rus, nu lee rese mbyin mtezhe lextoo kwaan baal cheen re xaa ne.
