1Ex astan ijqasmaklhi ixchivintikꞌan pumalhuu lapanakni laktꞌiyan tus pꞌays tapukiltꞌasal, va tanaul: ¡Ay kamakakal ni Dios! Ni kiDioskꞌan vamun yuꞌ lay jamalaqtaxtunun, vamun yuꞌ ay junita, lhitꞌajun tachun tapꞌasta.
2Yucha si vas makay tejkan mukꞌay laqtaqal. Va mukꞌanil ixmaqanlqajnati ni anu putaulan yu tacha maqtaqalhini xanati. Ancha jalakltꞌilhil ni lapanakni por ixlaqtaqalkꞌan. Ancha jalaqmaqnikal yu ixtalaqputeꞌey ixchivinti Dios, xlhiyucha jaxtaqnil ixmaqanlqajnatkꞌan.
3Vachu tanaul: —¡Ay kamakakal ni Dios! Ancha ni xajin va katantꞌaqstꞌayaꞌ mas va tavanancha kaval, yu jantu aqtaun katamaktal.
4Ex ni pꞌuxauntꞌati xapaynin ali yu laꞌatꞌati talhitsukuti yu takujta, yuꞌuncha tatalakaputatamal lakatꞌun. Tatoꞌoyal ni Dios yu vil taꞌan jalhachimoꞌonun, tanaul: —¡Va chuncha kavalcha! ¡Ay kamakakalcha ni Dios!
5Ancha taꞌan jalhachimoꞌonunkan xajchil taun pꞌays chivinti, va naul: Ay kꞌamakꞌatꞌik kiDioskꞌan, tachun ni uxiknan yu tꞌapꞌatsꞌaniyatꞌik ali tꞌoꞌoyayatꞌik, mas va yu lakstꞌuniy untꞌatꞌik ali yu lajꞌaynin untꞌatꞌik.
6Ex ijqasmaklhi tus tacha katalakchivinil lhuu lapanakni tacha tejkan makatꞌajun maqalhuu laꞌaxkan. Kun pꞌays laktꞌasati tacha tejkan tꞌasay maxkan, va tanaul: ¡Ay kamakakal Dios! Chavay aqtaynitacha jalhachimoꞌonun ni kiDioskꞌan yu lhitꞌaunꞌojoy tapꞌasta.
7Chavay kalhiꞌachantajuu kun lhuu achati y ay kamakau ni Dios. Lakachilcha ni julchan tejkan kalakxtuklayaꞌ pumataun yu junkan Sasꞌatꞌa Borrego. Va katꞌatsukuyacha ni jatsiꞌi yu ixnavin yu kꞌus lakatayaycha para katꞌaꞌal.
8Ni jatsiꞌi xtaqnikal lakatin para kalakatayal kun yu kꞌus laqchꞌiti, yu olaqlnaꞌ, yu jamakanti kun ox lino, pꞌays snapapa. (Yu kꞌus lino naunputun ni ixlapanakni Dios jantu katalhitsukul laqtaqal la ixjatsukuntikꞌan.)
9Ex astan ni ixmayul Dios kijunil: —Katsꞌoqꞌulatꞌi: “Ayaj katalhiꞌachantajuyaꞌ ni lapanakni yu jalakjuntaꞌikal laka kꞌatan taꞌan lakxtuklay yu junkan Sasꞌatꞌa borrego.” Vachu kijunil: —Yu aniy chivinti, yucha va ixchivinti Dios, jantu jalaklkanti kaval.
10Ex kitꞌin niman iktalakaputatamal lakatꞌun taꞌan ixyal ixmayul Dios para kaktoꞌoyal. Pero yucha kijunil: —¡Jantu chun kꞌalatꞌi! Kitꞌin vachu va mintꞌaꞌoqxtamati kunita, vachu va chun tacha uxintꞌi. Vachu tacha metꞌalaqaunin yu tataylhaꞌan lhichivinin Jesucristo. ¡Katꞌoꞌoyatꞌi Dios! Ni anchanu chivinti yu lhichiviniy Jesucristo va yucha yu maqancha talhichivinil yu ixtalaqputeꞌey ixchivinti Dios.
11Ex klaqtsꞌil ni laktꞌiyan lvaq ixlaqltiꞌay. Ancha klaqtsꞌil laqataun xnapapa juki, ixpujukꞌal qayntaun lapanaki. Yucha ixtaqaꞌuti junkan yu Lay lhakapuꞌankan, vachu junkan yu Laqsaval. Yucha vas makay tejkan mukꞌay laqtaqal, vachuꞌ tejkan makay lhilukuj.
12La ixlaqchul tus ixlaqmaqtajiy tacha jikmi. Vachu la ixꞌaqtsul ixlhaꞌanta lhuu koronas. La ixmuntsan istsꞌoqmukꞌakanta taqaꞌuti y anchanu taqaꞌuti vamun yucha ixmispay.
13Ixꞌulata aqxtaun laqchꞌiti yu tus ox jalhipaxanti jakꞌalnan. Yu ixtaqaꞌuti ixjunkan va Ixchivinti Dios.
14Ixtatixkaulhaꞌanta xatropas laktꞌiyan, ixtaputaukꞌalhaꞌanta laqxnapapa jukin. Ixtaꞌulata laqxnapapa ixlaqchꞌitkꞌan yu jamakanti kun yu ox laqchꞌiti, jantu tsꞌuniy xkiliu kaval.
15La ixkilna ni anu lapanaki taxtuy aqxtaun espada yu ox kikxtuy. Va yucha kapulhimaqchapul talakachux palhachimoꞌon lakamunukpaꞌ. Yucha kalhachimoꞌonunaꞌ kun lhuu tapꞌasta la ixmakaꞌ. Kamukꞌaniyaꞌ ixlaqtaqalkꞌan chuncha tacha qayntaun lapanaki tejkan papichꞌaqxa uva la ixchꞌaja. Kataxtuyaꞌ maqanlqajnati yu xtaꞌa Dios tacha xaxkan uva, yucha lhitalqaman yu tamakay lapanakni.
16Ni anu lapanaki la ixlaqchꞌiti ali la istsꞌaspuꞌ istsꞌoqmukꞌakanta taqaꞌuti yu najun: “Apalay ay yu aniy xajantu tachun yu xalajꞌaynin, apalay ay Jalhachimoꞌonu xajantu tachun jalhachimoꞌonun.”
17Astan klaqtsꞌil qayntaun ixmayul Dios, va ixyal laka julchan. Pꞌays jalaktꞌasanil tachun tsꞌoꞌon yu taltꞌilinin laktꞌiyan, jalakjunil: —¡Kꞌatꞌantꞌikcha, katꞌaqxtꞌoqtꞌikcha para kaꞌutꞌik ni lhivay yu Dios taxtaqniyan!
18Kꞌalakꞌunitꞌik ixlakatunajkꞌan ni lajꞌay jalhachimoꞌonun ali xaꞌukxtinin tropas ali lapanakni yu ixtalhitꞌajun tapꞌasta ali ixvakaxkꞌan jukin ali yu ixtaputaukꞌalhaꞌanta. Kꞌaꞌunitꞌik ixlakatunajkꞌan tachun lapanakni, oqxtamatin yu ali yu valiꞌiy tatiꞌukxuntayay, lakstꞌuniy lapanakni ali yu lajꞌay.
19Ex klaqtsꞌil ni maqtaliꞌ ali yu lajꞌay xalhachimoꞌonun lakamunukpaꞌ ali ixtropaskꞌan. Va chꞌantaun tataqxtoqlhi para katamakanil lhilukuj ni anu lapanaki yu ixpujukꞌal juki kun ixtropas.
20Ni maqtaliꞌ niman chꞌikal chꞌantaun kun ni lapanaki yu jantu vas kalaqputeꞌel ixchivinti Dios, yu ixmakay lajꞌay axtoqnuꞌ la ixlakaꞌukxpuꞌ ni maqtaliꞌ. Va chuncha ixjalakpumakanutacha ni lapanakni para kalakmukꞌanikal ixtaqaꞌuti ni maqtaliꞌ. Vachu ixjamakanutacha para katatoꞌoyal ixꞌantivaj. Ixlaꞌatꞌuykꞌan jalaqtanqalhupꞌukal laka jikmi jakujnun taꞌan maqtayvil kun azufre.
21Yu alati lapanakni jalaqmaqnikal kun yu espada yu ixtaxtuta la ixkilna ni lapanaki yu ixpujukꞌal xnapapa juki. Ex tachun ni tsꞌoꞌon tus ox talhiꞌotsal ixlakatunajkꞌan ni lapanakni.
