1Sene an taye eisau metem. God eteri komke tetan tatame nogwapewai emri tayekap an metem. Eme etep wom. Yenbowai. Neremri Keryen God ere yenbowai. Ere nemne sene petem, nema noub tetan. Eri sig yenbosubuwai. Eri mure eisauwai.
2Tatame eme nenbekap, God ere emne awosein etep nenbe. Eri wule e seken, wule yenbo. Sig eisauken ta te sir yibe ta, te tatame nogwape emne yaper nenbetem. Te God eri yaku kerebetem tatame emne pen sabetem. Etep tebetem, God ere tene tuma namdem, ere tene awosein pen sam. Etep wom.
3Hevenke temenem tatame eme sene muresen etep wom. Yenbowai. Neremri Keryen God ere yenbosubuwai. Babilonke eibe ker bou ere somsom wayete.
4God ere eteri wolbaye eisauke simenem, apeilake tame nogwape (24-pela) etem, eme gulke pan waren tuknan erne sukye woran etep wom. Sekenwai. Ne yaku yenbo kerebe.
5Sene an metem, wolbaye eisauke yam tuma ape etep wom. Kem God eri yaku kerebe tame, kem neremri God eri sig yenbo wote. Kem God erne sukye worate tatame, sig eisauken tatame, sig eisauken berai tatame, kem God eri sig eisau wote. Etep wom.
6Sene an metem, tatame nogwape emri tumakap an metem. Kowke yeirbe ok pi eisau genek metbekap, wakte pebekap an etep metem. Tuma etep wom. Neremri Keryen God ere yenbowai. Eri mure eisautamewai. Eter ere akei nowselri tatame emne kom panen siten.
7Sipsip Yen ere ta panete nenbe. Panete ta te kerap eyarem. Eke nema metekwaste. Nema God eteri sig yenbo wote. Nema eterne tuma yenbowai wote.
8God ere tene tame oub yenbo newom, tame oub geipa yenbosubuwai, oksubu tame oub te warte. Etep wom. Tame oub yenbo e God erne som abobe tatame etemri tobobetem wule yenbo.
9Sene God eri komri tame ere ane etep wom. An nene wobe tuma ne kip bas raste, ne etepke bas raste. Sipsip Yen ere ta panete, ere tatame emne wopette, eme ta pane a ate. Ete tatame eme metekwaste. Ere ane sene etep wom. Ete tuma e God eteri tuma sekenwai.
10Etep metem, an ete tame eteri tewo tobok gulke pan sukye worate nenbetem. Nenbetem, ere ane wotaken etep wom. Ne etepkap mane nente. An nerenken yaku kir kerebe tamesip wuri. Nereri mase, Jisas eterne kenawaike abobe tatame, eri tuma wusoube tatame, an etemri yaku kerebe tamesip wuri. Ne God eternewou sukye worate. Ne ane mane sukye worate. Jisas eter wusoubetem tuma e God eteri tuma wusoube tame etem wusoubetem tumakap. Etep wom.
11Sene an lam, Hevenri eru latrasem, geipa hos wuri etek tetmenem. Tame wuri ere hos magelke simenem, eri sig wuri, Ere God Eter Wobekap Etepwou Nenbe Tame. Sig wuri Ere Tuma Seken Wobe Tame. Peiktameken nayin emne tuma namdete yabel ere wule yenbosubu nenbe. Yaper nenbe tatame emne ere yaper awosein nenbe, yenbo nenbe tatame emne ere yenbo awosein nenbe.
12Eri le ker tawulkap kukmenem. Keryen eisau emri kerap nogwape eri tarek gwureremenem. Eri sig wuri eri wuske bas rasmenem. Sig eri somo eterwou ere metmenem. Tatame eme ete sig beke met.
13Eri warmenem tame oub lagwu nepke kiyi sogwunem. Eme eri sig etep wobetem. God Eter Wom Tuma. Eme etep wom.
14Hevenri ei nai tame nogwape eme geipa hoske sin erne semoumenem. Eme geipa tame oub yenbo waren yamenem.
15Ete tame ere wunken gapaku elemoike woramenem, ere nogwape nowselri tatame emne ete gapakuk pen sate. Ere ainke kesem gelapaku sen tatame emne noub lakerete. Mureken God ere pap kenake wayen, ete tame ere etep metmenem, eter ere nowselri tatame emne teitkwunte. Wain supa teiten belesbekap ere emne etepke beleste.
16Eri tame oubken tewoken sig etek bas rasmenem. Bas rasmenem sig etep wobe. Ere keryen Etemri Keryen. Ere aneyen etemri Aneyen. Etep wom.
17Sene an lam, God eteri komri tame wuri ere yabel genik tetmenem, ere nel geike yiyabetem ap emne nubke tem. Kem yan wurisubuk site. God ere kemne a eisau newon ate woye.
18Kem keryen emri om, ei nai tame etemri keryen emri om, eiken tame emri om, hoske simenem ei nai tame emri om, kem emri om yan ate. Yaku bepou me kerebe tame emri om, kel yaku kerebe tame emri om, sig eisauken tame emri om, sig nebuleken tame emri om, kem yan ate. Etep wom.
19Sene an lam, boul base eter, nowselri keryen etem, emri ei nai tame nogwape etem, eme ei naite won, eme yan wurisubuk temenem. Temenem, eme geipa hoske simenem tame eterken eteri ei nai tame etemken ei naite wom.
20Hoske simenem tame ere boul base erne keresukum, tuma yikwokwon wusoubetem tame erne kir keresukum. Kiyi ete tuma yikwokwobetem tame ere boul base eri yaku kerebetem, ere rigrabe nenbetem. Etep tem, boul base eri sig petem tatameken boul base eri tame nel sukye worabetem tatameken ere emne tuma yikwokwobetem. Ere epne keresukun epne kelpe kelpe nenewayen kerken peik kupak sogwunem. Ete peik kupa gworkap salfa pape ker etek eibetem.
21Hoske simenem tame ere epri ei nai tame nogwape emne ete gapakuk pen saiwom. Eteri elemoike woramenem gapakuk ere emne pen saiwom. Pen saiwom, ap eme yan ete tame emri om kenake an se pelawom.
