1Nnyizinku khumuuza Munsa na Arawu nti wa Misuri yoori:
2“Opu ona ya wiiya mweezi wa mwanzo wa mwaakha khwa mweeyo.
3Munsa na Arawu ana ya olupa yoori: “Ajaama ooshi a Ezirayiilu, siikhu ya khuumi ya mweezi otthuupu, alume ooshi ana yoovalula nshapi la pwittipwitthi leelume ya wakhula liphanko ya wakhula nyuupa.
4Ojama amana wiiya vattitthiiru ohinwahaaye orafuna nyama yooshi, ona yoowaalaleya anamwaattamanana aya apale a kharipu awaameele nyama enwahaaye owaafiyela khwa hisapu ya atthu aya.
5Nyama yaya enttelaaye othawuliwa ena ya wiiya yeelume ya mwaakha mmote, yoohiirakali hatha vahali. Ena ya wiiya pwittipwitthi ama puuzi.
6Mwipwehe mpakha siikhu khumi na nne ya mweezi, mpakha wakathi ajaama ooshi a meezirayiilu anttelaaye oshija njuwa leettelaka otupweela.
7Mwittukunttele taamu yaya vatulu na mpavu wa milako za manyupa, apale mweeyo mwirafuniyeemu nyama.
8Osikhu otthuupo mwina ya orafuna nyama yoomanikhiwa va moottho, na mathapa oowaawa na phaawu yoohiina fwaramento.
9Mwihirafune nyama piishi wala yawiipikhiwa, ila yoomanikhiwa va moottho waaza eeshwa, moolu na marupo aya.
10Mwihisalise hatha etthu efiya supu; amana esala mwilukuze.
11Mwiwale, nzako n'yuunu, jampali mmoolu na mwikholele pakhora mmakhono, mwirafune wawaakuvavo; otu paashikowa wa Nnyizinku.
12Maana osikhu aya otthuupo kinttela ovira nti wa Misuri na kiwoole aana ooshi amwanzo aalume waaza atthu mpakha a nyama, na kiwaahukhumu a miluku ooshi a Misuri: Nnyizinku ti Miiyo!
13Taamu mwivaziyeeyo milako zenu enttela wiiya alama yoori ethoonyeze manyupa mwiniikhalaaye, amana kiwaavulalisaka amisuri, miiyo kinttela woona taamu kisala kuuvikanani wooheemeli yoori mwihiiye wootapanyiwa ti pala yaya eto.
14Mwitthapele siikhu ethiito nkhama njampo la tiini muupuwelele yoori ti miiyo, Nnyizinku, kirettiyeeyo epo. Mweeyo na peewu yenu mwina yooretta njampo la paashikowa khwa mileele.
15Nkatthi wa siikhu sapa mwina yooja phaawu yoohiina fwaramento. Siikhu yamwanzo mwilazemo fwaramento mmanyupa mwenu, maana wakhula otule anttelaaye oja etthu yawiiyana fwaramento, ntthu aya oto ontta wiikariwa vakatthi wa meezirayiilu.
16Siikhu yamwanzo na siikhu yasaapa ona yawiiyavo nthukumano ttakatthiifu, ahiiyevo hatha ntthu mmote antakhaaye okhola khaazi siikhu zaya epo, woohiiyi wenttekhezela etthu-yoojiwa ya wakhula siikhu; mwina yooretta ethiito paasi.
17Mwirette njampo la phaawu yoohiina fwaramento, maana siikhu yaya ethiito ti kilaziyeeyo nti wa Misuri mahimo a atthu ooshi a meezirayiilu. Mwitthapele siikhu yaya eto wiiye nrumo wa mileele, waaza wa apaapa mpakha wa aana aya.
18Mwina yoorafuna phaawu yoohiina fwaramento makaaripi siikhu yakhuumi na nne ya mweezi wamwanzo mpakha makaaripi siikhu zeettettaka eshiriini na moote.
19Siikhu epi sapa ahiiyevo ntthu mmote anttelaaye wiiyana fwaramento owawe. Wakhula antakhaaye oja etthu ya wiiyana fwaramento ontta wiikariwa muujama wa meezirayiilu, hatha nkhama mmalapo ama nnyunti.
20Mwihije hatha etthu ya wiiyana fwaramento mmanyupa mwenu wooshimo, ila mwina yooja phaawu yoohiina fwaramento.”
21Munsa khuruma okhuweliwa attunkhulu a atthu ooshi a meezirayiilu khuwooza yoori: “Mwinthawule nshapi la pwittipwitthi yoori ajaama ooshi a Ezirayiilu ashije pwittipwitthi ya Paashikowa.
22Mwithuule zankalala mwinaanise na taamu eriiye mpasiya mwittukunttele milako zenu vatulu na mpavu mwaya. Ahiiyevo hatha ntthu mmote antakhaaye osaruwa nnyupa mwawe mpakha ocha.
23Maana Nnyizinku aviraka mmuti mphule yoori awoole amisuri; amana oona taamu etile mwittukuntteliyeeyo nlako enu phantte na phantte na vatulu vaya, Nnyizinku onttela ovira attaapho khanlawa onlikha namatapanya ovira mmanyupa mwenu yoori awuuleeni.
24Mwipwehe nrumo opu mweeyo na aana enu ooshi khwa mileele.
25Amana mwifiya nti opule Nnyizinku awahitiyeenini owinkhani, mwina yooretta njampo ntthi.
26Aaneenu amana awuuzelani yoori: ‘Njampo laya ntthi maana aya niini?’
27Mwiwaajipu yoori: ‘Twaha ya Paashikowa wa Nnyizinku, aviriyeeyo vatulu wa manyupa a meezirayiilu nti wa Misuri, na khwiinanela manyupa eetthu wakathi aari owoolaavo amisuri.” Attaaphale meezirayiilu khukokhora khumwaaputu Nnyizinku.
28Meezirayiilu khulaavo, khulawa khuretta nanna ethiitile Nnyizinku amuuziyeeyo Munsa na Arawu.
29Aphano osikhu layili, Nnyizinku khuwoola aana ooshi amwanzo a misuri, waaza mwaana wamwanzo wa Firawuuna, namarithi ofwalume awe, mpakha mwaana wamwanzo wa napherezu aari nkalapooso na theenya aana amwanzo a nyama.
30Osikhu otthuupule, Firawuuna na mashawuriiya awe ooshi na amisuri ooshi khulankha na wapuwiye olila nwulweene, maana khayaarivo nyuupa yahaafwiweemo.
31Osikhu otthuupule Firawuuna khuruma okhuweliwa Munsa na Arawu khuwooza yoori: “Mwileemo nasaapi mmuti mwaka, mweeyo na meezirayiilu! Mwilawe mwamwaaputu Nnyizinku enu, nkhama etthiipo mwivekiyeezo.
32Mwithuule pwittipwitthi zenu mompe zenu na puuzi zenu, nkhama mwaalupiyeezo na mwikiparikhiye theenya.”
33Amisuri aari owaakhanyarela atthu apale yoori aleemo mmuti mphule, alupaka yoori: “Amana mwihiliimo fooshi fweeyo nintta ofwa!”
34Aphano atthu apale khuthuula tiriku yookhattiwa yoohiina fwaramento, khuputaputela pasiya yaya vakuwo khuvikela mmafuzi.
35Meezirayiilu khushututela nrumo wa Munsa, khuwaavekela amisuri vitthu za feeta za tahapu na kuwo.
36Nnyizinku khuwaaretta atthu awe wooneliwa huruma pi amisuri, khwa nanna awenkhiyeevo etile avekiyeeyo; khwa etthiipo khuvulula maali zooshi za amisuri.
37Meezirayiilu khulankha khusala alawa mwentto khuvira Rameesi eettaka Sukooti. Aari alume alufu miiya sitha, ohiwaalaki aakha na aana.
38Khuntti khuluzeene zoofwarikhana za amalapo aawaalottiye, na theenya maphanko mawulu-mawulu a nyama, mompe, pwittipwitthi na puuzi.
39Khoocha phaawu zoohiina fwaramento khwa tiriku etile aathuuliyeeyo Misuri, maana khayaarina fwaramento mwaasa wawiikariwa Misuri, khuhiwahi otthenkeza etthu-yoojiwa.
40Meezirayiilu eekhaliye Misuri nyaakha miiya nne na talaathiini.
41Siikhu ethiito afisiyeevo nyaakha miiya nne na talaathiini, atthu ooshi a Nnyizinku eetta olaawo Misuri.
42Waari osikhu wa weekesela wa Nnyizinku yoori awaalazewo meezirayiilu Misuri wooshiwo. Tiito, osikhu nkhama otthuupu na yo anttela ojeekesela na ojama aya ontaaye mileele.
43Nnyizinku khumuuza Munsa na Arawu yoori: “Epi kano za Paashikowa: ahiiyevo hatha mmalapo mmote anttelaaye onja.
44Mwiitthwaana wawuuzanyiwa ona yonja Paashikowa, amana eeya wookhiriya.
45Ila apale eettiye omaka na apale aateeliye okhola khaazi ahinje.
46Mweeyo mwina yonja nnyupa nttumpho aattaliweemo, mwihithuule hatha phittula moote mwisarulelaka vaje, wala mwihipweche hatha likhonkolo la nyama mwinttelaaye orafuna.
47Atthu ooshi a Ezirayiilu ana yontthapela Paashikowa.
48Wakhula mmalapo anikhalaaye nttumphu antakhaaye oretta njampo ntthi la Paashikowa wa Nnyizinku, mwina yowaakhiriyisa alume ooshi a muujama mwaya; apo ana yontthapela nkhama aana a muujama. Ahiiyevo ntthu woohikhiriyi anttelaaye ontthapela.
49Kano ethiito enttela orumeyeliwa pi anyunti na amalapo apale amakiyeemo.”
50Meezirayiilu ooshi khuretta nkhama etthiipo Nnyizinku amuuziyeezo Munsa na Arawu.
51Siikhu ethiitile Nnyizinku khuwaalazawo meezirayiilu Misuri, khuwaatthenkeza lihimo khwa lihimo.
