Sirach 37

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

¹Hlang boeih loh, “Kai la paya” a ti uh, Tedae paya a ngen tah a ming hong ni paya la a om

²Paya thintlo te thunkha la a poeh vaengah tah amah a duek bangla a kopoek a tloh moenih a?

³Laithae neh diklai boeih khuk hamla, boethae taengla aka yoei nang melam kah ni na lo.

⁴Pueipo a ngen tah paya kah omthennah dongah omngaih, Tedae a rhainah tue ah amah te hnap a tloelh uh.

⁵Pueipo a ngen loh a bungpuei hamni paya a bom, rhalthohnah ah pataeng pohtling a dan pah.

⁶Caemrhal vaengkah na paya te hnilh boeh, Kutbuem na rhae vaengah khaw anih te, poekmueh la om boeh.

⁷Baerhoep boeih loh amah kah a paek cilsuep te a koeh, Tedae a ngen longtah amah kavelh ngaihnah dongah cilsuep a paek.

⁸Te dongah baerhoep ti khaw rhalrhing, Lamhma balae a ngaih ti ming pah, Amah ham ni poeknah khaw a loh hae eh.

⁹Nang taengah hmulung a naan vetih, “Namah ngaih la saii” a ti ni. Te vaengah hoei pai vetih, Nang sokah aka thoeng te a dawn ni.

¹⁰Nang soah ngaihoihnah aka khueh khaw dawt boeh, nang aka uet taengah tah na mataengnah khaw phah.

¹¹Huta taengah a thimkalh kawng rhalyawp taengah caemtloek kawng, Thenpom taengah bitat kawng hnolai taengah hnoyoih kawng Moeithae taengah moeih kawng, Ngukngak taengah rhennah khawng Palyal taengah bibi kawng, bibi aka kohuet taengah bibi la aka tlung kawng, Sal bingak taengah bibi len kawng dawt boeh. Cilsuep a thui akhaw ngaiyaknah boeh.

¹²Tedae Pathen hlang la om tih, Olpaek a tuem tila na ming hlang nen tah yok uh pai.

¹³Na lungbuei kah cilsuep dongah tah na lu thuk pai, te soah namah lakah uepom hlang a om moenih.

¹⁴Mah lungbuei kah long tah n'yaak lakah a then n'khoem bael thai, Rhaltoeng imsang kah rhaltawn parhi a ngol lakah khaw then.

¹⁵Te boeih soah khaw Khohni taengah mah thangthui uh, na longpuei te oltak dongah a hoihaeng na saeh.

¹⁶Bibi boeih he tongnah cuek la thulainah om, poeknah long cungkuem boeih lamhma la a kae,

¹⁷Lungbuei he moeiboe kah imphu la om, Te dongah te a baek pali la cawn.

¹⁸A thae neh a then, dueknah neh hingnah khaw, Hmuilai loh phat a uk a taem.

¹⁹Pilnam a ngen tah hlang tloek cangpuei ham muep cueih Tedae amah tah a honghi la om.

²⁰Cal thai aih khaw hlang loh a thinah, anih te caak ni rhawp a vawthoek mai eh.

²¹Cueinah boeih neh a vawt rhi coeng dongah, toemngamnah kutdoe khaw Boeipa loh a buem pah.

²²Hlang he mah ah cueih lamhma koinih, a boethen thaih te khaw uem ham tueng pai.

²³Hlangcueih long a pilnam a thuituen, te dongah a thaih then khaw nguel yoeyah.

²⁴Hlang cueih tah koehnah loh a vuei, aka hmu boeih loh anih te a uem uh.

²⁵Hlang kah hingnah khohnin he a tae thai, Tedae Israel kah khohnin ta a tae lek moenih.

²⁶A pilnam hamla aka cueih tah hinyahnah te apang, Te dongah a ming khaw a yoeyah la hing.

²⁷Ka ca aw, na hng vaengah namah noem uh, namah aka thae te hmu lamtah a taengah pae uh boeh.

²⁸Hno boeih he hlang boeih hamla a then moenih, Hlang he hno boeih dongah a omngaih thai bal moenih.

²⁹Buhtui antui dongah khaw mo aih boeh, Cue uh muehla caak khaw ca boeh.

³⁰Caak voelh khaw tloh la om tih, carhut aih khaw loklai la hut.

³¹Carhut aih dongah hlang muep duek, tedae aka cue uh a hing khaw sen van.