Sirach 12

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

¹Hnothen na saii vaengah u ham na saii khaw ming te daengah ni na khoboe then soah nang n'uem uh eh.

²Hlang cim ham a then saii pah, nang te n'thung bitni, amih long n'thung pawt cakhaw, Khohni loh n'thung bitni.

³Boethae neh aka nok uh taeng lamloh hnothen thoeng pawt tih Kutloh aka khueh pawt taeng lamkah khaw halo moenih.

⁴Hlang cim tah pae lamtah hlang tholh te bom boeh,

⁵tlayae ham hnothen sai pa lamtah lailak rhoek te paek boeh. A buh khaw hloh pah lamtah amih taengah pae boeh, te nen te namah lai n'haep ve. Amih hamla hnothen na saii boeih soah rhaepnit la boethae muep na yook ve.

⁶Khohni long khaw hlang tholh a thiinah tih, lailak soah khaw dantatnah a yok sak.

⁷Boethen hlang tah pae lamtah hlangtholh te bom boeh.

⁸Khuehtawn vaengah tah paya tang khaw mingpha pawt tih, citcai tue vaengah tah rhal te thuh uh mahpawh.

⁹Khuehtawn dongah tah thunkha khaw paya poeh, khodaeng vaengah tah paya pataeng vik hma.

¹⁰Na rhal te uepnah loengloeng boeh, a boethae te rhohum dongkah tui-aek banglam ni a om.

¹¹Tlayae neh kunyun doela cet sitoe cakhaw, a taengah ngaithuen lamtah namah khoembael uh. Anih te hmaidan a met tangtae bangla om cakhaw, thi-aek boeih a cing pah moenih ne.

¹²Anih te na hnuk ah khueh boeh, namah m'palet vetih na hmuen hang hul ve. Na bantang kut ah khaw anih te ngol sak boeh, na ngolkhoel rhawt hamla m'vuet ve. A tloihsoi ah ni ka ol he oltak la na poek vetih ka ol thui loh dan n'tah pueng eh.

¹³Rhul aka bi thai long khaw amah a tuk daengah ni khohong ramsa taengla rhep aka cet rhoek te lungma a ti pueng.

¹⁴Hlangtholh neh a yok uh hlang neh, hlang tloe kah tholnah dongah aka thum loh lungma a ti moenih.

¹⁵Kilkalh ham tah nang taengah pai cakhaw, na paloe koi nih nang taengah om mahpawh.

¹⁶Na rhal te a hmui nen tah didip la cal suidae, a thinko ah nang te tangrhom ah tulh ham a mangtaeng. Na rhal te a mik dongah mikphi bo mai cakhaw, a tuetang then a dang vaengah tah na thii te hah mahpawh.

¹⁷Yoethae loh m'pai thil vaengah anih te lamhma la phoe vetih, aka bom lalah la nang te n'tangkuep ni.

¹⁸Te vaengah lu muep a thuk vetih kut a paeng ni, muep caitawk vetih a maelhmai te a tang la phoe ni.