Sirach 7

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

¹Boethae na saii boel lamtah, boethae long khaw nang m'vuei boel saeh.

²Tholhdalh te a hla om tak lamtah, amah te nang lamloh nong bitni.

³Boethae kah hmakhuen dongah cangti soem boeh, a cangvuei te voeirhih la na yun het mahpawt nim?

⁴Hmuen sang lamkah Boeipa neh, Manghai taengkah thangpomnah ngolhmuen te toem boeh.

⁵Na duengnah te Boeipa hmaiah thaem boel lamtah, na cueihnah khaw manghai hmuh ah tai boeh.

⁶Laitloekkung la om ham khaw tlap soeh boeh, dumlai kah a yung ka phil tloel la na om ve. Thaomnah kah a hnaephnap la na om vetih, na cuepmueihnah khaw yip muei ve.

⁷Hlangping soah boekoeknah saii boel lamtah, pilnam taengah namah te rhaidaeng la om boeh.

⁸Dantatnah na yook pawt mai cakhaw, tholhnah he a rhaep la koep saii voel boeh.

⁹“Ka kutdoe muep a yet he a poek vetih, Khohni Pathen taengah nawnnah ka paek te, a doe bitni,” ti boeh.

¹⁰Na thangthui vaengah na mawnnah te pueh boeh, doedanah paek ham khaw hnoelrhoeng boeh.

¹¹Mueihla dikdak aka khahing hlang te hnael boeh, Tlayae phoeiah aka thangpom kung om.

¹²Na manuca te laithae neh dum boeh, na paya khaw amah te tlam te saii boeh.

¹³Laithae boeih tah ngaih loengloeng boeh, te bang khoboe kah a thaih tah a then ka moenih.

¹⁴A hamca rhoek ngoltunnah khuiah bawlh bawlh tlawk boeh, na thangthui vaengah khaw namah loh koep khoep boeh.

¹⁵Bi rhuh neh, lotawn bi khaw thinah boeh, Te te Khohni long ni a suen coeng.

¹⁶Hlangtholh rhoek kah rhaenghmuen ah khaw thum boeh, amih a thungnah a koe moenih tila poek.

¹⁷Namah te a dangdik hil khaw yalh mai, lailak ham dantatnah tah hmai neh keet ni a om coeng.

¹⁸Paya te khaw tangka la yoi boeh, Manuca tak tah Ophir sui banghui pawn ni.

¹⁹Lungcuei neh huta then te hnoo boeh, a muelhtuetnah tah sui lakah ting ngai.

²⁰Uepom la bi aka bi sal te khaw, a bibi dongah aka tlungmu kutloh hlang te hnaep boeh.

²¹Na hinglu loh lungming sal te lungnah saeh lamtah, amih kah a loeihnah ham khaw hloh boeh.

²²Saelhung na khueh atah a then la ngaithuen, na hoeikhangnah hang khuen khuitah a then la khoem.

²³Na ca a noe vaengah na ol a ngai hamla amih te thutuen lah.

²⁴Na canu te a caeh long ah hlahpham boeh, anih te tongpa rhoek tang lamloh tungaep lah.

²⁵Canu te vasak sak lamtah bibi tung coeng laeh, tedae anih te tongpa tang taengah mah paeh.

²⁶Yuu na lungnah te na khueh atah anih te maa boeh, tedae lung na hnoel hlang te namah long khaw tangnah boeh.

²⁷Na thinko boeih neh na pa te hinyanah lamtah, Na nu kah ca-om bungtloh khaw hnilh boeh.

²⁸Amih rhoi loh nang n'cun te poek lah, amih rhoi loh nang m'paek te metlam na thuung thai eh?

²⁹Boeipa he na hinglu boeih neh rhih lamtah, a khosoih rhoek te khaw hinyah nah lah.

³⁰Nang aka suenkung te na thaomnah boeih neh lungnah lamtah a bibikung rhoek te khawt sut hnoo boeh.

³¹Boeipa te rhih lamtah khosoih te hinyah nah, Nang n'uen bangla a taengah buhham khaw thak lah, Thaihcuek neh boirhaem khaw, kutdoe maeh laeng khaw, tholh dawthnah maeh neh hnocim thaih cuek boeih te khaw.

³²Kho daeng hamla na kut thueng pah lah, te daengah nih na yoethennah khaw a cungkuem eh.

³³Mulhing boeih te moeihoeih la pae, duek khui lamkah ah khaw sitlohnah neh sih boeh.

³⁴Mikphi aka bo te rhael boel lamtah, Aka uek rhoek taengah khaw nguek puei van.

³⁵Satlo na hip ham vaengah khaw uelh boeh, te bang khoboe te na lungnah ham om ta.

³⁶Na saii boeih dongah khaw na hinglung a bawtnah te poek, te daengah ni na tholh pawt eh.