1Boeipa aka rhih te a thae loh a tlak thil mahpawh, Noemcainah khuiah om mai cakhaw koep koep a hlawt ni.
2Hlang cueih loh olkhueng a thinah moenih, Tedae hlangthai palat tah hlipuei khuikah lawng bangla om.
3Aka khuel hlang tah olkhueng dongah pangtung ni, Te bang hlang loh olkhueng neh Pathen olrho te hmaih a khueh.
4Na thui ham rhoekbah lamtah hnatun ham khaw cet, Na cangnah te tarhit lamtah olannah khaw khueh.
5Hlang ang kah thinko tah leng kho banghui ni, a poeknah tah hmueicung bangla tinghil.
6Paya saipat khaw marhang tal banghui ni, Aka ngol loh bang a tinah pawt akhaw phit mailai.
7Balae tih hnin at lakah hnin at he a olpuei, kum khat khuiah khomik puet a vaengah he.
8Boeipa kah cueihnah long ni te rhoek te a lang sak, amaih loh khoning neh khotue khaw a hloeh la a hoep.
9Khohnin a ngen tah a thangpom tih a ciim. a ngen tah omthawt khohnin la a khueh bal.
10Hlang boeih he diklai lamkah ni a thoeng, Hlanghing tah laipi lamkah ni a suen.
11Boeipa amah kah mingnah cungkuem neh a soepboe tih a longim khaw hloep a khueh pah.
12A ngen tah yoethen a paek tih a pacuet, a ngen tah a cim sak tih amah taengla a khueh. Tedae a ngen tah thae a phoei tih a hlak, te vaengah amih kah a hmuen khaw a thoeih pah.
13Ambop kut dongkah amlai bangla amah kongaih bangla a hlom a bol.
14A then he a thae neh kingkalh tih hingnah khaw dueknah neh kingkalh. hlang tholh khaw hlangcim neh kingkalh bal.
15Khohni kah kutngoe ke boeih so lah, a bokbok la ha thoeng tih, Khat neh khat he boeih kingkalh uh.
16Kai tah ihsap due lamhnuk la ka om coeng misur aka yoep hnukbat cangmoyoep bangla ka om.
17Tedae Boeipa kah yoethennah rhangneh lamhma la kapai, Te dongah misur ka yoep bangla ka va-am khaw ka than.
18Kamah bueng ka thakthae pawh tih, Thuituennah aka boeih ham ni tila poek.
19Kai ol hnatun lah, nangmih pilnam lakli kah hlanglen rhoek, nangmih hlangping mawtkung rhoek, na hna kaeng uh lah.
20Yuu, ca khaw, manuca neh paya akhaw, Na hingkhuiah tah namah soah thaomnah pae boeh. Na kawn te khaw hlang tloe pae mailai boeh, na lubuei na hoi vik vetih koep na hoe ve.
21Namah na hing tih na hil a om khuiah tah, na hmuen te hlang rhawt sak boeh.
22Na ca loh nang taengah lamkah a bih lakah, te dongah ca kah kut doe na sawt te then ngai.
23Na saii boeih dongah a khuetnet la om saeh lamtah nang hinyahnah soah khonuen vaihuk om boel saeh.
24Na hingnah khohnin a bawtnah tue ah, na dueknah hnin ah mah na rho te tael.
25Kamvuelh, cungcik neh hnopuei he laak hamla om tih, buh, rhilam neh bibi he sal hamla om van.
26Sal te bi la na tuei daengah duemnah na hmuh eh, a kut a hoeng la na khueh koinih yalponah a tlap ni.
27Hamkun neh kamrhui loh rhawn a koisu bangla, hloong neh phaepnah he sal thae rhoek ham om coeng.
28Anih te bi la tueih, te daengah ni a palyal pawt eh,
29Palyalnah long he hnothae ni muep a cang sak.
30Anih te bibi la khueh, amah neh a naai uh la om saeh, Tedae a ngai pawt oeh atah hloong neh rhap khoh. U ca khaw hnorhih aih la khueh boeh, u ca khaw a lolh la saii boeh.
31Sal khueh duen te namah pum bangla lungnah anih te thii nen ni na lai. Sal na khueh duen te na manuca bangla so, na hingnah na ngoe bangla anih khaw ngoe ni. Anih te a tloh la na phaep koinih, Vik yong vetih namah n'yong tak ni. Te vaengah anih tlap ham te me long lae na caeh e?
