Sirach 43

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

¹Sosang koekkah pomsangnah tah vaan khocil ke ni, Vaan mikhmuh kah sawt ham thangpomnah la om bal.

²Khomik a thoeng vaengah, amah a thoeng te a phoe, Khohni kah kutngo kopoekrhai tubael om.

³Khothun loh khohmuen a vo tih, u long lae kholing kah a do te a noeng thai.

⁴Hmai-ulh dongah bi aka bi te hmailing loh a do, Te lakah khomik loh tlang a do te a pueh pathum la ling. Hmai hu te khaw a phuh tih, khosaeng kah a aa loh mik a dael sak.

⁵Te te aka saii Boeipa tah len tangkik, A olpaek khaw a longpuei cet paitok.

⁶Hla tah khoning a hoi vaengah noeknah la om khonoek a uk tih, dungyan miknoek la om.

⁷Hla dong lamloh khotue hnin kah miknoek khaw om, hla a lum vaengah tah a coengnah khaw soep.

⁸Hla sae khaw, a ming a paek bangla, koep thai, he tla a hoilae khaw khobaerhambae pawn ni. Sosang kah caempuei taengah hmaidi la om tih, vaan kah vaikhap dongah vaang.

⁹Aisi kah thangpomnah tah vaan kah sakthennah la om, Boeipa kah hmuen sang a aa loh a tueng sak.

¹⁰A Cimkoek kah olpaek rhangneh Pai hmuen a hmoel pah dongah rhip pai uh. A bibinah dongah khaw ha sak tlaih pawh.

¹¹Pampacung ke so lamtah, te aka suen te koeh lah, a aa dongkah a thennah khaw khuet coeng.

¹²Thangpomnah payaicung bangla vaan ke a hil, Khohni kah kut te a yueng phai.

¹³A olpek rhangneh vuelsong a tlak sak, Te vaengah a laitloeknah rhaek khaw thui.

¹⁴Te dongah a khai-im ong uh tih khomong te vaa bangla ding.

¹⁵Khomai khaw a rhuepomnah rhang thadueng a paek, Te dongah rhaelnu khaw a nuei la boeih rhek.

¹⁶Amah a thoeng vaengah tlang khaw hinghuen tih, a kongaih rhang neh tuithim yil khaw cu.

¹⁷A rhaek ol loh diklai a ho vaengah tah, Tlangpuei lamkah hli thae neh humhae halo. Amah loh vuel te vaa aka ding bangla a haeh, kaisih a rhum bangla lukluk khoi.

¹⁸A bokthik kah a then loh mik phak tue, te a tlak vaengah a lungbuei khaw a ngaihmang.

¹⁹Diklai ah tuihu te lungkaeh bangla a phul, te vaengah hling ka a hmui bangla a sum.

²⁰Tlangpuei yilh ding a caeh vaengah, tui soah khaw tuikhal la khal coeng. Te te tubuem tui boeih dongah a khueh, te dongah tui te rhangpho bangla a poeh sak.

²¹Tlang khaw a hlup tih khosoek khaw a hoeh, rham tlim te khaw hmai bangla a koh sak.

²²Dotui loh a cungkuem te koe a hoeih sak, Buem a bo vaengah kholing lamloh a hilhoem uh.

²³A mangtaengnah rhangneh a dung kahw a duem sak, Te dongah a sokah tuisanglak te tloep a hol pah.

²⁴Tuipuei hlaikan rhoek loh a rhihom khaw a thui, mamih loh n'yaak vaengah n'ngaihmang uh.

²⁵Te khuiah tah aka lang tih kopoekrhai mulhing khaw om, aka hing hno boeih neh tuiham puei khaw om.

²⁶Boeipa rhangnen ni a puencawn rhoek khophoeng a pha, A ol rhang neh a cungkuem te a cului bal.

²⁷Muep n'thui thai dae a thui n'hah pawh, a hnukkhueng ol lamtah, “Amah tah a cungkuem la om”.

²⁸Amah koehnah ham thadueng te melam m'hmuh eh, Amah tah a bibi lakah khaw khuet ngai coeng.

²⁹Boeipa tah khuet tih len tangkik, a saithainah khaw khobae rhambae pawn ni.

³⁰Boeipa te thangpom lamtah na coengnah boeih neh amah te pomsang lah. Amah long tah a cungkuem khaw a poe, Amah na pomsang vaengah na thayung boeih huel Te vaengah tawnbanah khaw khueh boeh, Boeipa te a hah la na koeh thai pawt ve.

³¹U long a hmuh thai vetih, uh long a thui thai eh, Boeipa a coengnah bangla u long a pomsang thai eh.

³²A huep kah aka yalh lakah he a len muep om pueng, a bibi dongkah a yol ca ni ka hmuh bal pueng.

³³Boeipa loh a cungkuem a saii coeng, tedongah Pathen hlang ni cueihnah a paek.