Text copied!
CopyCompare
Baibal Olcim - Sirach

Sirach 26

Help us?
Click on verse(s) to share them!
1Huta then kah a va tah a yoethen tih, a hingnah khohnin khaw rhaepnit la a puh pah.
2Hlangcong nu loh a va ham omngaihnah a khuen, Te dongah anih te a kum khaw ngaimongnah neh soep.
3Huta then tah yoethennah a len koek coeng ni, A nih tah Boeipa aka rhih tongpa lakli ah Yoethennah la a paek ni.
4Khodaeng cakhaw, boei cakhaw, a thinko a ngaimong, a tue boeih khuiah a maelhmai hlampan.
5Hno pathum loh a thinko a hih tih, a pali nah he ka rhih ngai bal. Khopuei ah olthaekaling neh hlang aka kuk, laithae hlang aka pup, He boeih he dueknah lakah khaw thae ngai.
6Huta kah mingthae, thatlainah a om vaengah, thinphatnah neh kothaenah thoeng tih, a ol haat te hlang tom a ming sak.
7Huta thae he hamkun suihlaih bangla om, anih aka lo te khaw rhulti aka buem bangla om.
8Yumi nu loh thintoek muep a soeh, A yah te khaw a da tloel.
9Thinpom mikdai loh hlangpam nu a voeih, a mikhlang loh a longpuei a dawn.
10Canu thinthah te khaw rhep dawn, yalponah hmu vetih hnonah tarha ve.
11Mikdai aka lolh khaw ngaithuen, Nang soah a tholh atah let boeh ne.
12Tuihal yinlai loh a ka a ang tih, a taengkah tui boeih te a ok bangla, Dap takuem kah hlingcong taengah ngol vetih palaa hamla a liva te a ong pah ni.
13A yuu kah hloeihhlamnah loh a va a hmae sak, a bithainah loh a rhuh soah a saa a saibawn sak.
14Oldip nu he tah Boeipa taeng lamkah kutdoe ni, amah aka toel uh lakah a phu aka tlo he om pawh.
15Mueltuet nu loh hloeihhlamnah soah hloeihhlamnah a thap, te dongah a boethennah te coi dongah khiing lek pawh.
16Boeipa kah hmuensang ah khomik a thoeng bangla, huta then kah a hlangthen loh imkhuikho a then sak.
17Hmaitung cim dongkah hmaithoi a vang bangla, a maelhmai then khaw a mueimae a khuetnet la om.
18Sui tungpum dongkah cakben bangla a kholan khaw pihling tih a khokhan cikngae.

19Ka ca, na camoe kah pailumnah te a then la khoem na thadueng te hlanglak taengah pae boeh.
20Vannaem boeih ah khaw laimen hmuen mah tlap, Na cangti khaw tuh lamtah, na cangsawt mah tangnah.
21Te daengah ni na cadil ham kho a buh vetih, a casak soah khaw uepangnah a khueh vaengah, muep a rhoeng uh eh.
22Pumyoi he timtui la a ngai uh tih, rhukom nu khaw a hlang ngaih ham dueknah imsang la poeh.
23Lailak nu tah cungpoeh pa kah buhham la om tih cuepmueih nu ta Boeipa aka rhih hlang taengah a paek.
24Yahdaeng nu tah rhaidaeng la pongtho tih, mueltuet canu tah a va mikhmuh ah pataeng birhih.
25Thinlen nu tah ui bangla a ngai dae, a yah aka khueh long tah Boeipa a rhih.
26A va aka hinyah nu tah hlang boeih loh hlang cueih la a ngai, Tedae a koevoeinah neh a va aka hliphen tah lailak nu boeih a khueh uh. Huta then kah a va tah a yoethen, a khohnin khaw rhaepnit la puh ni.
27Ol ue neh olyet nu lah caemthoh kah olueng a tum bangla om, hlang boeih khaw caem tlung lakliah kah kho a sak ni.
28Ka thinko he hno panit loh a toeh, tedae a pathum kah loh ka thintoek a loh. Hlang rhalh khaw vawtthoek neh khodaeng tih, Hlang cueih khaw mat a phaep uh. Hlang he duengnah lamloh tholhnah la mael. Te dongah Boeipa loh cunghang a tawn coeng.
29Thenpom khaw boethae sainah lamloh khoem uh tloel tih hnoyoi khaw tholhnah lamkah cimcaih tloel.