1A hmuilai aka vikvawk soeh pawt tih, tholhnah dongah yut-loeihnah yok pawt ham aka ngaih tah a yoethen.
2A thinko loh amah aka boe sak pawt tih, a ngaiuepnah dongah tha aka thae pawt tah a yoethen.
3Boeinah he khaw kopoek aka talh hlang ham a rhoep moenih, moeithae loh khuehtawn balae a ti nah eh?
4Amah a huek uh te khaw hlang ham ni a tung pah, te dongah anih kah koerhang te pang a bok nah ni.
5Amah ham pataeng a hnaih atah, u lae anih taengah moei aka hoeih eh? Boei sitoe cakhaw a kohoe hae mahpawh.
6Amah taengah moei aka thae lakah aka thae he a om moenih, he tah amah kah moeithaenah sokah dantatnah pawn ni.
7A then a saii takuem ah boethae khaw tuek a nuen pah, a bawt ah tah a moeithae te ni khoeng a yan.
8Moeithae he hlang thae rhoe ni, voelh hoi uh tih pilnam te a hnoel a rhoeng.
9Halhka ka a mik tah a maeh ham soah a ngaikhuek ti pawh, Te dongah halka long he hinglu ni a rhae sak.
10Moeithae loh a buh khaw a hnaih dongah a caboeih khaw kaksap la a khueh.
11Ka ca, na coengnah tarhing he hnothen neh phaep uh, Boeipa taengah nawnnah te khaw a koihnilh la pae.
12Dueknah he tah a koe moenih nih tila poek. Te dongah Saelkhui kah kah oltloeknah khaw n'tueng hlan.
13Na duek hlanah na paya ham a then saii pah, kut yueng lamtah na coeng thai khuiah anih te doedan lah.
14Hnin at kah kohoenah dongah namah poeih uh boeh, boethen la doe na ngaih kah buhham te khaw hlong boeh.
15Na thakthae kah a thaihtae te hlang tloe ham caeh tak hae mahpawt nim? Te dongah thakthae neh na vawtthaih dueng khaw Taelcung neh tael uh thae hae ni ta.
16Pae lamtah, lo lamtah na pum khaw dom mai dae Saelkhui ah pangdoknah pakhat long khaw a hmuh moenih.
17Mulhing boeih he himbai rhuem bangla om coeng, a rhuem lamkah oltloeknah long nah, “Na duek kuekluek ni” a ti.
18Thing phung dongkah a hnah a bu bangla a hlip loh a tloe soah a huep. Te dongah thii neh pumsa kah tiingan la aka om tah pakhat a duek vaengah pakhat tloep thaang.
19Bibi boeih khaw hmawn vetih aka om ham khaw muei ni, te te aka saii khaw amah te nen te khum ni.
20Cueinah neh lungming poeknah aka thuep tah a yoethen.
21Anih long tah a lungbuei khosing neh, a huep kah te khaw a boelh.
22Cueihnah te sayuep bangla a vai tih, a namtlak ah a mah.
23Bangbuet longah a dawn tih a thohka ah a hnatun.
24A im taengah a rhaeh thil tih, a pangbueng dongah hlingcong khak a khing.
25Cueihnah taengah dap te a tuk, Te dongah impah hmuen khaw a then tloe a dang.
26A ca rhoek te a hlipkhup ah a khueh tih, a thingbu hmuiah duemdong coeng.
27Kholing vaengah khaw a khuiah ying tih, thangpomnah lakli ah kho a sak.
