1Na yaak lalah olhuep na phoe te Na yah ni koep na koei coeng. A tuengta ah na yah khaw na khueh ni te daengah ni pilnam kah kolonah na hmuh eh. A dangkah hno aka om dongah yak boeh, maelhmai a suengnah ham khaw tholhnah saii boeh.
2Khohni kah olkhueng neh a paipi dongah khaw, Lailak rhoek soah a tuengta la laitloek ham khaw,
3Rhoihui neh yincet puei kah cayin khoem ham khaw paya kah rho caekboe pah ham khaw,
4Coi neh colung a thuem khueh ham kha, a yol a yet khaw rhen dang ham khaw,
5Thenpomnah lamloh a hoeikhangnah ham khaw, Camoe thuituennah dongah khuituk ham khaw, Sal thae kah a nam ah thii long sak ham khaw,
6Uepvawt nu kongah kutha khueh ham khaw, kut a yet nah ah thoh kalh ham khaw yak boeh.
7A casai na khueh vaengah rhep tae lamtah loeng dae, na paek tih na doe vaengah khaw ca dongah boeih khueh.
8Anglat neh angvawk la ka om khaw, patong uicuk aka tholh khaw toel ham yak boeh. Te daengah ni a thuem thuituenkung na om vetih, hlang boeih loh nang te n'doe eh.
9Canu long a huep la a napa a mawntang sak, te dongah a ngaisaknah loh a ih khaw a rhawt pah. A camoe vaengah nim, va sa pawt vet tila lakueng, a rhukom phoeiah nim vik hnoel mai koinih,
10A oila bal nim te hlang loh poeih vetih a napa im ah vik vawn ve a ti bal Va a khueh nim te vik hnukpoh koinih, a rhukom phoeiah khaw cakol la om mai koinih ti a rhih.
11Canu thinlen te tah khak dawn laeh, Namah te na thunkha taengah aka lawn la om ve. Khopuei neh pilnam rhaengpuei taengah ol n'boep sak vetih, hlangling pasae lakliah namah te yah m'bai ve. A imkhan ah thohhue a om pawt ham so lamtah, a im taengah thohput a om pawt ham khaw dawn.
12A hlang then te tongpa hmuh ah tueng sak boeh, amah tue rhukom nu taengah hnonah saeh.
13Himbai he khaw keet la poeh thai tih, huta lamloh huta kah a boethae khaw thoeng.
14Tongpa kah a halangnah he huta kah boethen lakah phoeng, Huta long he yahpohnah neh mingthae khaw a phueih thai.
15Boeipa kah bibi dongah ka lungbuei a thoel pawn ni Ka hmuh te khaw ka doek pawn ni. Boeipa kah ol loh a bibi te a coeng sak a sai hluen boeih te a kongaih bangla a om sak
16Khomik loh a cungkuem te a vangnah ne a hmuh, Te dongah a bibi khaw amah thangpomnah neh bae.
17Amah kah kopoekrhai bibi boeih te tae thai hamla a hlangcim pakhat pataeng a thaphoh moenih. Te te Tlungthang Boeipa loh a thoh coeng, te daengah nih lunglai boeih tah, amah thangpomnah dongah a cak eh.
18Tangrhom dung neh hlang thinko khaw a khe tih, A khuisaek kah olhuep khaw a yakming. Khohni loh metla a om koi khaw boeih a ming, khosuen lamkah neh aka thoeng ham khaw a hmuh.
19Aka om tangtae neh aka om koi te a phoe tih, a huep a hael kah te khaw a tueng sak.
20Amah rhael hamkhaw poeknah om pawh, amah taengah pakhat khaw m'phah thai moenih.
21A cueinah rhuepomnah te tlueptluep a khueh, Amah tah dungyan lamloh ha thoeng tih amah la om. U long khaw thap pah thai pawt tih yueh pah thai pawh, anih te poeknah paekung la u khaw a kuek moenih.
22Boeipa kah bisai boeih tah a nai om tangkik te te sawt vaengah leklek phaa.
23He hno boeih tah hing tih dungyan duela om, a ngoenah ah hnonah ha a saihluen te rhip a khoem.
24Te boeih te a bok la om tih khat neh lang coeng, A soep mueh la a saii hno he a om moenih.
25Pakhat loh pakhat kah a thennah a thap pah, A thangpomnah hmuh ham te u lae aka bong bal pueng?
