1Kɛ̀ Fidisitɛ̃ɛ̃bɛɛ tíí mbɛhɑ̃ɑ̃pɔ̀mbɛ̀ bɛmɔu kɛ́nkɑri Afɛki kɛ̀ Sɑuri kɑ̀ri Sisedɛɛdi kɛ tɔ́kɛ́nɛ̀ tɛbintɛ.
2Kɛ̀ Fidisitɛ̃ɛ̃bɛ kpɑ̀ɑ̀tìbɛ̀ mɑbɛ̀ ni yɛtĩ̀rɛ̀ sikɔupí kpɛyɛ kɛ̀ bɛtɔbɛ̀ ni sikɔu kpɛyɛ. Dɑfiti nɛ̀ o kɔbɛ bɛ̀ɛ̀ cíenko okpɑ̀ɑ̀tì Akiisi kɛ̀ bɛ̀ tũ̀nní.
3Kɛ̀ Fidisitɛ̃ɛ̃bɛ ɑ̃ɑ̃pɔ̀mbɛ̀ɛ bekɛ kɛ dɔ̀: Ebedeebɛ biɛ nkpɛti dòmmɛ? Kɛ̀ Akiisii bɛ̀ tɛ̃̀ńnɛ́ kɛ dɔ̀: Dɑfiti nwe Isidɑyɛɛribɛ kpɑ̀ɑ̀tì Sɑuri kóo tɔ̃ntì, nɛ̀ ti bomɛ̀ yɛbie mbo ntùɔ̀kɛ yɛ̀dɛ́ɛ̀, m mɛ nyí yɑ̀ mɛyɛi mmɑmɛ̀ ò dɔ̀ɔ̀ mɛ̀.
4Kɛ̀ Fidisitɛ̃ɛ̃bɛ ɑ̃ɑ̃pɔ̀mbɛ̀ iwɛ̃ĩ yɛmbɛ̀ miɛkɛɛ pɛikɛ Akiisi kɛ̀ bɛ̀ dɔ̀: Bɛti dɛ kóo nìtì kòò kɔtɛ kɛ́mbo ɑ ò duɔ́ ndìì ɛì miɛkɛ, ò bɑ́ɑ́ ti nɛinɛ̀ dikpɑ̀nnì, ò yɑ̀ɑ̀ bo kóntɛ́ kɛ́nɑɑ́ nti dootitɔù. Ò yóó yĩ́mɛ nɛ̀ o yiɛ̀ nkɛ̀ bɛ̀ɛ wɛ̃tɛ kɛ́nɑrikɛ? Dɛ̀ í tú ò kùɔ dìì mɔ̀nnì ndi ti kó bɛnìtìbɑ̀ɑ̀?
5Di bɑ́ɑ́ yɛ̃̀ nweè Dɑfiti nwemɛ̀ bɛnitipòbɛ̀ sòò cɛ̃̀ɛ̃̀tɛmɛ̀ kɛ́ndiè nkɛ ɑu kɛ tú: Sɑuri kùɔ sikɔupí, kɛ̀ Dɑfiti kùɔ sikɔupípí.
6Kɛ̀ Akiisii yú Dɑfiti kɛ dɔ̀: Ti Yiɛ̀ nKuyie mbomu, ɑ dɔɔ̀rìmɛ̀ mɛɛ̀ sìɛ́ kɛ̀ n dɑ pɛ́nsìrì kɛ dɔ́ ɑ nɑ nni nnɛínɛ̀ dikpɑ̀nnì kɛ yɛ̃́ nɛ̀ ɑ tùɔ̀kɛní dìì yiè m borɛ̀ m mu nyí yɑ̀ ɑ kó mɛyɛi mmɑmɛ̀. Fidisitɛ̃ɛ̃bɛ kpɑ̀ɑ̀tìtũ̀mbɛ̀ mɛ nyí dɑ dɔ́.
7Nɛ̀ dɛ kpɛ́í nkò nkɛ̀ dɛ̀ nnɑɑti, kɑ̀ɑ bɑ́ɑ́ íi mbɛ miɛkɛ.
8Kɛ̀ Dɑfitii ò bekɛ kɛ dɔ̀: N cɑ̀kɛ bɑ okpɑ̀ɑ̀tì? Nɛ̀ n kɔ̀tɛnímɛ̀ ɑ borɛ̀ ndɑ dɔ̀ɔ̀ bɑ? Dɛɛ̀ te kɑ̀ɑ tu m bɑ́ɑ́ dɑ nɛinɛ̀ kɛ̀ tí kɔtɛ kɛ́kpɑnnɛ̀ ɑ dootitɔbɛ̀.
9Kɛ̀ Akiisi dɔ̀: N yɛ̃́mu kɛ dò nhɑ í cɑ̀kɛ dɛ̀mɑrɛ̀, mí nkpɛ́í nhɑ dò nKuyie ntɔ̃nnì ndi kɛ̀ n dɑ dɔ́. Fidisitɛ̃ɛ̃bɛ kpɑ̀ɑ̀tìtũ̀mbɛ̀ bɛɛ̀ yetɛ kɛ tú ɑ bɑ́ɑ́ bɛ̀ nɛinɛ̀ dikpɑ̀nnì.
10Nɑnkɛ dikṹnweńnì sɛ̀ì dí bɑ́ɑ́tí fɔ̃́ nnɛ̀ ɑ kɔbɛ bɛ̀ɛ̀ dɑ cíenní, kɛ̀ diyiè yɛ̀nní dí kétɛ́.
11Kɛ̀ Dɑfitii bɑ́ɑ́tí dikṹnweńnì sɛ̀ì nɛ̀ o kɔbɛ kɛ́kétɛ́ kɛ́nkũnti Fidisitɛ̃ɛ̃bɛ ɛì, kɛ̀ Fidisitɛ̃ɛ̃bɛ biɛ kɔri Sisedɛɛdi.
