1Nḻa' ḻaw ẕan ya'abá yeḻa' ẕen che Dios. Ẕcháḻjgakkze yógo'te da' ka' bene'.
2To ža ẕzenlen ža yoble da' ni, na' to yel žen' yel yoble da' na'kzen.
3Bi ẕkóngeklen žin x̱tíža'gak benne' ka', na' bi zoa no benne' ženle' chí'igaken,
4san ẕžin da' ẕnnágaken do ẕente yežlyó, na' ẕžingak x̱tíža'gaken dot yežlyó. Dios bene' ya'abá ka to yo'o gan zoa wbíž.
5Zildo' ẕḻan' ka to benne' byo ẕchag ne'e. Žebelen ka to benne' ẕzá'ḻi'e.
6Ẕžojen cheḻa'ale gan ẕḻan', na' ẕžinen cheḻa'ale gan ženen. Ẕcha'an yógo'te da' zej den.
7Dot ḻi ḻaže' nak da' žsedle X̱anžo Dios, na' ẕzoa chochen be' da' nakkzžo. Ḻi ḻaže' nak da' bchi'le X̱anžon' žo'o. Ẕneẕjwn yeḻa' žejní'il chegak benne' ka' bi zej napen'.
8Da' likze nak da' wnná X̱anžon', na' žebéḻe'egekle benne' ka' žóngake' kan ẕnnan. Ḻi ḻaže' nak da' ẕzejní'il X̱anžon' žo'o, dan' ẕzoan žo'o ḻo yeḻa' baní'.
9Nak chawe' ẕžébežo X̱anžon', dan' gonen ga soažo nbanžo to chi'ize. Da' likze nak kan ẕchi'a ḻaže' X̱anžon' žo'o, na' naken chawe'.
10Naken da' ẕdan ḻáže'žežo ka ya oro, na' ka ya oro ẕente dan' záka'ḻe'en. Nakžen ẕix̱ ka bžina' che bez, dan' nakḻe'en ẕix̱.
11Žsedlen neda', wen žin chio', dan' žona' kan ẕnnan, na' da' ẕenḻe'e žezi'a.
12Nitó benne' bi gak gónbi'e da' ẕinnj da' žone'. Beslá neda', X̱ana' Dios, ḻo da' ẕinnj dan' bi žákbe'ela' žonan'.
13Bkache' chawe' neda', wen žin chio', nich bi be doḻa' gona' dot ḻaža'a. Bi go'o latje nna bia' doḻa' neda'. Naž gaka' ḻi ḻaže', na' bi baga'a ẕia che doḻan'.
14Žénela' gak da' ẕchaḻja', na' da' zḻab ḻaža'a da' žaz ḻažo'o Le'. X̱ana' Dios, Le' žon chochkzo' neda', na' beya'wo' neda'.
