1¡Le wká'n ẕen X̱anžo Dios dan' nake' chawe', na' dan' to chi'ize žeyache' ḻáže'le' žo'o!
2Žaḻa' nnagak benne' Israel ka': “¡To chi'ize žeyache' ḻáže'le' žo'o!”
3Žaḻa' nnagak ẕa'só Aarón ka': “¡To chi'ize žeyache' ḻáže'le' žo'o!”
4Žaḻa' nnagak benne' ka' ẕžébegake' X̱anžo Dios: “¡To chi'ize žeyache' ḻáže'le' žo'o!”
5Katen' wžé' zedla' bḻiža' X̱anžo Dios. Bechebe X̱anžon', na' beslé' neda' ḻo dan' bex̱wn neda'.
6Zoaḻen X̱anžon' neda', na' batkle žeba' bi da' gongak benne' ka' chia' neda'.
7Zoaḻen X̱anžon' neda', na' Ḻekze' žákḻene' neda'. Che ḻen ḻe'ela' chejchégwgak benne' ka' ẕdíḻ-ḻengake' neda'.
8Chawe' nak wx̱én ḻáže'žo X̱anžo Dios, na' kege wx̱én ḻáže'žo benne' ka'.
9Chawe' nak wx̱én ḻáže'žo X̱anžo Dios, na' kege wx̱én ḻáže'žo benne' wnná bia' ka'.
10Byéchjgekle benne' yógo'te yež ka' neda', san ḻo La la'y che X̱anžo Dios bžia yi'a benne' ka'.
11Byéchjgekle' neda', na' bséjwgake' neda' le'jle, san ḻo La la'y che X̱anžo Dios bžia yi'a benne' ka'.
12Byéchjgekle' neda' ka žongak bzoje ka', na' gok yeḻa' ẕža'a chégake' ka to yi' da' ẕzeyen yix̱e' yeche' biž, san ḻo La la'y che X̱anžo Dios bžia yi'a benne' ka'.
13Bžíga'gake' neda' nich chejchégoa'a san gokḻen X̱anžo Dios neda'.
14Nak X̱anžo Dios ka to yo'o gan zoa chawa'a, na' góḻteza' chie' Ḻe', dan' Ḻekze' žeslé' neda'.
15Žoḻgak benne' chawe' ka' ḻo yeḻa' žebele chégake' dan' žeslá X̱anžon' ḻégake'. Ḻen yeḻa' wak ẕen žon X̱anžo Dios da' ẕente ka'.
16Ẕente nak yeḻa' wak che X̱anžo Dios. Da' ẕente ka' žon yeḻa' wak ẕen che X̱anžon'.
17Bi gata', san soa' nbana', na' wzenla' benne' ka' ka zej nak da' ka' ben X̱anžon'.
18Bsaka' zi'ḻe'e X̱anžon' neda', san bi bdie' neda' ḻo na' yeḻa' got.
19Bsaljw gan cho'ogak benách ka' yodo' che X̱anžo Dios, na' choa'a ga na', na' wká'n ẕena' X̱ana' Dios.
20Zoa nga gan žo'ožo ḻaw X̱anžo Dios, na' žo'ogak benne' chawe' ka' nga.
21Wká'n ẕena' Le', X̱ana' Dios, dan' benlo' chia', na' besló' neda' ḻo dan' goken chia'.
22Yej na' da' bzoagak benne' wen yo'o ka' cheḻa'ale, beno' Le' ga naken yej blo.
23Da' ni benkze X̱anžon', na' žonen ga žebanlžo.
24Ža ni naken ža da' ben X̱anžon'. Yebéḻe'elžo, na' soažo ḻo yeḻa' ba nez ḻo ža ni.
25X̱anto' Dios, žáta'yoela' Le' yesló' neto' na'a. Žáta'yoela' Le', X̱anto', gon chawo'o neto'.
26¡Ga'n ẕen bennen' ze'e ḻo wláz X̱anžo Dios! Ḻo liž X̱anžo Dios ẕnnablto' Ḻe' gon chawe'e ḻe'e.
27X̱anžon' nakkze' Dios, na' ba bsa'ni'e žo'o. Le wchéj biado' ka' gótele ḻawe' Ḻe' ḻawgak loz bkog la'y.
28Nako' Le' Dios chia', na' wká'n ẕena' Le'. X̱ana' Dios, žoe ḻawa' Le'.
29¡Le wká'n ẕen X̱anžo Dios dan' nake' chawe', na' dan' to chi'ize žeyache' ḻáže'le' žo'o!
