Proverbio 3:6-31

⁶Sisya di bigbigem ya onodam sin amin ay amagem et isagana na din pandanam ta maidoritso.

⁷Adi ka ipapangato di nemnem mo begew sin mismo ay laing mo. Patgem si Diyos ya dokogam di lawa.

⁸Mo say amagem na, pabikasenas sik-a ta nasalon-at ka ya mayat di liknam.

⁹Dayawem si Diyos babaen sin pangidatonam si pilak ya damo ay apit mo.

¹⁰Mo say iyat mo di, mapno din agamang mo ya mansobsobra di arak mo.

¹¹Anak ko, adi kan lalasoyen din pamagbagan Diyos. Adi koman mansakit di nemnem mo mo bagbagaan daka.

¹²Tan bagbagaan Diyos din laylaydena ay kaman din iyat di ama sin laylaydena ay anak na.

¹³Nagasat din makagon-od si sirib ya panang-awat.

¹⁴Tan din sirib et nabanbanol mo palata ya balitok.

¹⁵Nabanbanol mo olay sino ay nangina ay al-altin di awak ya magay makaiso sin olay sino ay laydelaydem.

¹⁶Din sirib et iin-genana sin kannawana di ando ay biyag, sin kannigid na yan dayaw ya kinabaknang.

¹⁷Paragsakena di biyag ya ilapo daka ta magay pandanagam.

¹⁸Din sirib et maiarig si kaiw ay mangidawat si biyag ya poon di ragsak para sin ipogaw ay kokompet en sisya.

¹⁹Babaen sin sirib ya laing Diyos, pinarsua na din daga ya din wada ed daya.

²⁰Nan-ayosena abey obbog ya ginawang ya inpawada nay odan ay mapo sin liboo.

²¹Anak ko, kanayon ay igtom sin nemnem mo di kosto ay sirib ya panang-awat ta adi da mamaga en sik-a.

²²Idawat da en sik-a di ando ay biyag ya kaman kowintas ay mangipapteng en sik-a.

²³Mo say iyat mo et mayat di pandanam ya magay kaisokbaam.

²⁴Mabalin ay man-illeng ka ya maseyep kas kosto ay magay pan-egyatam.

²⁵Adi ka emegyat si bigla ay paspasamak ono din kadadaelan di managbasol,

²⁶tan si Diyos di mangayowan en sik-a et ilisi daka sin kadadaelam ay kaman tagdey.

²⁷Seg-angam din makasapol, dalo et mo waday maibadang mo.

²⁸Adi kan ibaga sin katokmang mo en si bigat asi kan idawat mo waday mabalin ay idawat mo ed wani.

²⁹Adi kan manpanggep si lawa sin katokmang mo, tan mantalek en sik-a.

³⁰Adi kan makiibaw si ib-am ay magay gapo na mo magay lawa ay inamag nan sik-a.

³¹Adi kan omapal sin makedse ay ipogaw ya adi kan on-onodan din ogali na,