Dad Fngewe 3:6-31

⁶Kabay di kdee nimoam funam Dwata, na fiten di ge i glut dalan.

⁷Nangam fandam ku too ge fulung, bay toom kanlikò Dwata, na knangam i kdee sasè.

⁸Na ku ani nimoam, mbaling fye laweham, na matnù i kgalam.

⁹Toom nafè Dwata fagu di kablém kenen i too fye di kdee mdà di ulê tanaam.

¹⁰Na ku ani nimoam, too fnò i folam na landè gusfayu i dademe, na i gufkaham ninumam gal sambél.

¹¹Tingàgu, nangam knang i kaflayam mdà di Dwata, na nangam tatì fbayà i kngakan ge,

¹²du Dwata, nngakan di gusasè i to kandon, gambet i kngak i satu mà di tingaan toon kando.

¹³Nun kafye di to ku nun kfulungan na kaglabatan,

¹⁴du mdatah fa i gweam di kfulung i gweam di salafì, na mabtas fa di ge di blawen.

¹⁵Na i kfulung faldam, mabtas fa di kabtas i dad too fye kas, na landè dademe knayeam gufsalngadam dun du too mdatah.

¹⁶Mdà di kfulung gdawatam klawil, knun, na kafè.

¹⁷Na i dalanan dunan klehew, na i ktanak knè.

¹⁸I to mbaling fulung nun gufyen, na mlawil kenen.

¹⁹Mgimò Dwata klamang tanà mdà di kfulungan, na mdà di bong gnadean tafkahan langit ditù di tah.

²⁰Mdà di kfulungan tafalohan yéél, na mdà di kfulungan, ftatekan i alù mdà di dad labun.

²¹Tingàgu, toom fkah i kfulung faldam na i kfulung mebe ktom difandamam, du fye laam glifet dun,

²²du ku nun kfulungam faldam fye kagkah i nawam, na nun klehew i kneam.

²³Na di kagum di dalan, landè sasè gaslokam, na là ge tlaab.

²⁴Di kileam, too fye kakudangam, na landè gamlikò ge.

²⁵Na landè klikoam i dad kaflayam makto i kakelan, ku demen i kalmo kel kadang di dad to sasè,

²⁶du Dwata i gusmaligam, na laan ge faloh ku mfawel i fawel.

²⁷Ku nun kiboam, galam tnabeng i demem to nun klidù.

²⁸Na nangam man di demem to, “E fayah ktabengta ge”, ku nun kiboam tmabeng dun di duh ani.

²⁹Nang ge faldam mimò sasè di to demem saldan, du ge i gusmaligan.

³⁰Nang ge dmalam i demem to, lumban i to landè sasè nimoan di ge.

³¹Nang mibal i knun i to labè, na nang ge mlalò i kenen nimò,