Proverbio 3:1-19

¹Anak ko, adi ka liwliw-an din init-itdok ya bilbilin ko mo adi et nenemnemem

²ta say omando ya somiged di biyag mo. Kanayon koma ay ipailam din napodno ay layad mo ya komakaman ka ay matalek.

³Ipailam da nay ay ogali ay kaman kowintas ay maikeke ya igtom abe sin nemnem mo.

⁴Mo say amagem di, malaydan si Diyos ya din ipogaw en sik-a et maidaydayaw ka.

⁵Imongsan mo di amin ay nemnem mo ay mantalek en Diyos, ta baken din bokod mo ay panang-awat di pantalkam.

⁶Sisya di bigbigem ya onodam sin amin ay amagem et isagana na din pandanam ta maidoritso.

⁷Adi ka ipapangato di nemnem mo begew sin mismo ay laing mo. Patgem si Diyos ya dokogam di lawa.

⁸Mo say amagem na, pabikasenas sik-a ta nasalon-at ka ya mayat di liknam.

⁹Dayawem si Diyos babaen sin pangidatonam si pilak ya damo ay apit mo.

¹⁰Mo say iyat mo di, mapno din agamang mo ya mansobsobra di arak mo.

¹¹Anak ko, adi kan lalasoyen din pamagbagan Diyos. Adi koman mansakit di nemnem mo mo bagbagaan daka.

¹²Tan bagbagaan Diyos din laylaydena ay kaman din iyat di ama sin laylaydena ay anak na.

¹³Nagasat din makagon-od si sirib ya panang-awat.

¹⁴Tan din sirib et nabanbanol mo palata ya balitok.

¹⁵Nabanbanol mo olay sino ay nangina ay al-altin di awak ya magay makaiso sin olay sino ay laydelaydem.

¹⁶Din sirib et iin-genana sin kannawana di ando ay biyag, sin kannigid na yan dayaw ya kinabaknang.

¹⁷Paragsakena di biyag ya ilapo daka ta magay pandanagam.

¹⁸Din sirib et maiarig si kaiw ay mangidawat si biyag ya poon di ragsak para sin ipogaw ay kokompet en sisya.

¹⁹Babaen sin sirib ya laing Diyos, pinarsua na din daga ya din wada ed daya.