Proverbio 26:1-21

¹Adi maibagay ay man-odan sin tiyagew ya mangandap sin omatongana. Iso na abe ay adi maibagay ay maidayaw di naong-ong.

²Adi demket di baos ay magay gapo na, kaman mantaytayaw ay titit ay magay ompaana.

³Masapol ay mabokadoan ya masoplit di dangki ya kabayo, siya abe sin naong-ong.

⁴Mo songbatam di naong-ong, adi ka ikompas di kalim sin kinaong-ong na ta adi ka mais-o en sisya.

⁵Mo songbatam di naong-ong, ikompas mo din kalim sin kinaong-ong na ta way iyat na ay mangawat ay baken masirib sisya.

⁶Kaman mon binetbet di sikim ya kaman kan nan-inom si sabidong mo ibaam di naong-ong ay mangipaammo si esa ay damag.

⁷Din pamagbagan di naong-ong et kaman siki ay napilay ay nalalaylay.

⁸Din mangidayaw si naong-ong et kaman din mangitaked si bato sin palsiit.

⁹Din pamagbagan di naong-ong et kaman pagat ay iwaswasawas di nabeteng.

¹⁰Kaman ipogaw ay mamanpana si am-in ay malabas din manglagbo si naong-ong ya makabeteng.

¹¹Din naong-ong yan ipidwapidwa da din lawa ay am-amagen da, kaman dan aso ay nanaoli si ota da.

¹²Nalaklaka ay matongpal di namnama ay somiged di ogalin di naong-ong mo din ogalin di ipogaw ay nalaing sisya sin pannemnem na ay mismo.

¹³Din nasadot yan ipambal na ay waday layon ay komat sin gawan di danan.

¹⁴Kanayon ay manposposipos din tangeb sin bisagra, iso na din sadot ay owat manbalibalin sin kaseyseyepana.

¹⁵Waday odom ay palaloy sadot na et masadot ay mamakan si awak na.

¹⁶Ipagarup di nasadot ay nalalaing sisya mo piga ay ipogaw ay naannad ay mansongbat.

¹⁷Din makibiyang si ibaw di odom et kaman ipogaw ay mamden si ingan di malablabas ay aso.

¹⁸Kaman naboge ay mangipanpana si matadem ya manbidbidang ay pana

¹⁹din mangietek si gait na asi na kanan en solog na.

²⁰Mad-ep din apoy mo magay kaiw, maga abey man-iibaw mo magay mantaytayoktok.

²¹Kaman din iyat di oling ya kaiw ay mangipabidang si apoy din iyat di makaibaw ay mangipapigsa si pan-iibawan.