Proverbio 23:3-26

³Adi kan aklongan din mankanam-is ay makan, tan mabalin ay say pansikap na en sik-a.

⁴Masirib ka koma ta adi kan palaloan di awak mo ay mangan-anap si panbaknangan.

⁵Tan adi ka ammo yan bigla ay tomayaw din pilak mo ay kaman din titit ay agila.

⁶Adi kan makikan si naimot ay ipogaw mo ayagan daka. Adi ka aklongan din mankanam-is ay makan ay inpasango na en sik-a,

⁷tan nemnemnemena anggoy din gastos na. Olay mo kanana en mangamangan ka ngem baken naimposoan.

⁸Iotam am-in ay kinan mo et masayang din mayat ay kalim.

⁹Adi ka sayangen di kalim si esa ay naong-ong, tan adi na ammo ay banolen din magon-od na ay sirib sin pamagbagam.

¹⁰Adi ka padendenen di sigod ay beddeng ya adi kan posen di dagan di olila,

¹¹tan manakabalin si Diyos ay mangitonton sin kalintegan da kontra en sik-a.

¹²Dengngem di pamagbaga ya ipakat moy kabaelam ay man-adal.

¹³Adi kan emegyat ay manoplit sin anak mo, tan adi matey mo say iyat mo di.

¹⁴Di katet-ewa na, mabalin ay say kaisalakanana.

¹⁵Anak ko, palalo di ragsak ko mo manemneman ka.

¹⁶Naragsakak to mo dengngek ay kalin di masirib di iyat mo ay mankali.

¹⁷Adi kan apalan din managbasol mo adi et kanayon ay patgem si Diyos.

¹⁸Mo say iyat mo di, waday mayat ay namnamam sin tapin di agew yan sigurado ay matongpal.

¹⁹Anak ko, dengngem nan pamagbagak. Manemneman ka koma ta say onodam din kosto.

²⁰Adi ka maitaptapi sin makabeteng ya naaklong.

²¹Tan din kaman dadi ay ipogaw et kanayon ay masmaseyep da, isonga bomiteg da ya manbado das nabisngibisngit.

²²Dengngem din pamagbagan amam ay nakaotangam si biyag mo yan adi kan laslasoyen si inam mo enggay mabakes.

²³Ipakat mo din kabaelam ay mangadal si kosto ay todo ya sirib, pamagbaga ya panakaawat, yan adi kan linglinglingan.

²⁴Dadlon maragsakan din aman di nalinteg ya masirib begew en sisya.

²⁵Isonga paragsakem koma da amam en inam ay nangianak en sik-a.

²⁶Anak ko, estem ay dengngen din ibagak ya ilaem abe di kabibiyag ko ta say tadonem koma.