Zinama Tumatumae 23:3-26

³Lopu okoro ni sari gana ginani leleadi, ura na sinekesekei koai sari ginani arini.

⁴Lopu va sigiti pule nigo koasa hinatana sa tinagotago; gilae mamu noso.

⁵Mata puri mo goi si taloa dia mo sari tinagotago, na kote ari tatapurudi meke tapuru la dia pa galegalearane guana atata.

⁶Mu lopu hena sa ginani tanisa tie puhi, mu lopu okoro ni sari gana ginani leleadi;

⁷Ura arini sari tie sapu balabala sisigiti pa poata. “Hena mamu napo,” kote guni nigo sa, ba sa bulona si lopu gua tu asa.

⁸Kote lua vura ni goi sari vasina hite pu ele henai goi, meke loke laedi mo sari mua zinama leadi.

⁹Lopu norea sa tie pekipeki, na kote va sisire ni sa sari zinama ginilagilana tamugoi.

¹⁰Mu lopu va rizua sa patu voloso pukeranena babe vagi pania sa pepeso tanisa pu loke tamana.

¹¹Ura Asa pu lavelave ni si ṉiṉirana; meke Asa kote turaṉa la nigo pa vinari pitui.

¹²Va naqiti pa bulomu sari na tinarae mamu va taliṉa la koari na zinama tumatumae.

¹³Mu lopu tuqe pule nia sa ginegese koasa koburu; pana seke nia kolu goi, si lopu kaqu mate nia sa.

¹⁴Mu seke nia kolu, mamu harupia sa nana tinoa pa minate.

¹⁵Tuqu, be gilae sa bulomu, si kote qetu hola sa buloqu;

¹⁶sa maqomaqoqu si kote qetu pana zama va gotogoto sari na berumu.

¹⁷Lopu va malumia sa bulomu pude va gulea i sari tie tavete va sea, ba mu pamaṉa nia doduru totoso se Zihova.

¹⁸Hinokara, koa nana sa lineana tamugoi vugo repere, meke sa mua lineana asa si lopu kaqu ta kumata palae.

¹⁹Tuqu, va avoso mae, mamu koa gilae, mamu kopu nia sa bulomu koasa siraṉa toṉotona.

²⁰Mu lopu somana ni si arini pu napo sisigiti vaeni, babe inevaṉa turaṉi sari na tie mari henahenadi,

²¹ura sari tie naponapo meke saripu mari henahenadi si kote kamo malaṉa, meke sa puta si kote sage ni poko rikarikatadi rini.

²²Mu avosia sa tamamu pu ponigo sa tinoa, meke lopu hakohako nia sa tinamu pana kaleqe si asa.

²³Mu holu vagia sa hinokara meke lopu holuholu pania; vagia sa ginilagilana lohina, vina tumatumae, meke ginilae.

²⁴Sa tamana sa tie toṉoto si kote qetu hola; qetu si asa pu tagoa si keke koburu gilaena.

²⁵Mani qetu sari tiatamamu; mani qetu sa barikaleqe pu podo igo.

²⁶Tuqu va mae ia sa bulomu, meke sari matamu si mani doṉo luli sari qua hahanana.