Proverbio 22:11-18

¹¹Gayyem di ari din nalinis di nemnem na ya omiparagsak di kali na.

¹²Ilaen Diyos ta mapaneknekan din tet-ewa, ngem dadaelena din planon di maetek ya nasikap.

¹³Kanan din nasadot ay manpambal, “Emegyatak ay en man-obla tan waday layon ay omisida.”

¹⁴Din kalin di manakikamalala ay babai yan kaman malosong ay bito. Mo pabongetem si Diyos et mag-as ka isdi.

¹⁵Naisisigod di kinaong-ong di amin ay anak, ngem no soplitem, mabalin ay mabalbaliwan.

¹⁶Mo paligatem di nabiteg ta waday iyat mo ay bomaknang, bomiteg ka pay dedan. Siya abe mo isagotam di baknang.

¹⁷Nay di pamagbagan di masirib. Estem ay dengngen nan itdok en sik-a.

¹⁸Maragsakan kan to mo igtom dana sin nemnem mo ya kabaelam ay ibaga.