Proverbio 19:5-23

⁵Adi makalisi sin dosa din makaetek ya mangitistigos baken tet-ewa.

⁶Ad-ado di manganap si somigedana sin pangilan di nangato di saad na, yan gayyem di am-in ay ipogaw din waday idawat na.

⁷Din nabiteg yan dokogan din aag-i na, masepsep din gagayyem na. Mo kasapolanay badang, magay tomolong en sisya.

⁸Tolongam din awak mo ta man-adal ka, yan banolem din inadal mo ta somiged di biyag mo.

⁹Sigurado ay madosan to din makaetek ya mangitistigos baken tet-ewa.

¹⁰Adi maibagay di mayat ay biyag sin naong-ong, ngem masepsep ay lawlaway kanemnemana mo iturayan di bag-en din ari.

¹¹Mo masirib ka, itpem di bonget mo. Kaidayawam mo palabsem di kamalin di gait mo.

¹²Mo bomonget di ari, kaman layon ay manngangaed, ngem mo malaydan et kaman din dono ay manibsibog si mola.

¹³Din naong-ong ay anak et ibabaina si ama na. Din makaibaw ay asawa ay babai et maiarig si danom ay tomedtetedted.

¹⁴Din beey ya kinabaknang yan mabalin ay itawid di ama ya ina, ngem din nanemneman ay asawa et sagot Diyos.

¹⁵Mandagaang to din nasadot ay ipogaw, tan adi mankotkoti mo adi et owat maseseyep.

¹⁶Din mantongpal si bilin et salaknibanan biyag na, ngem din ipogaw ay oway di iyaat na et matey.

¹⁷Din maseg-ang sin nabiteg yan kaman si Diyos di nangibolodana et gon-gonaan Diyos sisya.

¹⁸Soplitem din anak mo sin kakitkittoy da, tan wada pay laeng di namnama. Mo adi kan sopliten daida, kaman mon inturong daida si kateyan da.

¹⁹Kanayon ay manproblima din mabonget ay ipogaw. Mo badangam et masapol ay amagem kasin.

²⁰Dengngem ya patiem di pamagbaga ta lomaing ka sin odi na.

²¹Ad-adoy planon di ipogaw, ngem si Diyos di mangipatongpal sin inkeddeng na ay mapasamak.

²²Say nabanol et din kinapodnon di esa ay ipogaw. Maymayat di nabiteg mo din maetek.

²³Mo egyatam ya patgem si Diyos, matagotago ka, et wada abey talnan di nemnem mo ya magay lawa ay mapasamak.