Proverbio 15:5-21

⁵Lasoyen di naong-ong din pamagbagan ama na, ngem din nanemneman et onodana di pamagbaga.

⁶Din nalinteg et bomaknang da, ngem din lagbo ay gon-oden di lawa di nemnem da et makadadael.

⁷Mangidawat si laing din kalin di masirib, ngem din nemnem di naong-ong et magay silbi na.

⁸Sigsigaan Diyos din daton di laway nemnem na, ngem maragsakan sin kararag di nalinteg.

⁹Kaliliget Diyos din am-amagen di laway nemnem na, ngem laylaydena din mangipapasnek ay mangonod si nalinteg ay panagbiyag.

¹⁰Madagsen di dosan di mangamag si baken kosto. Matey abe din manigaan si pamagbaga.

¹¹Mo si Diyos yan kabaelana ay ilaen di am-in sin kad-an di natey, sigurado ay ammo na di nemnem tako.

¹²Din makalasoy yan sigaana ay mabagbagaan. Polos ay adi manpaitdo sin masirib.

¹³Maila sin ropan di ipogaw mo naragsak. Mo manladladingit, palalo abe ay madismaya.

¹⁴Din masirib yan laydena ay man-adal, ngem din magay nemnem na yan nemnemena di magay silbi na.

¹⁵Innagew ay naligat di biyag di kaseseg-ang, ngem din naragsak ay ipogaw et kanayon ay gan-ganasena di biyag na.

¹⁶Maymayat di kasasaad di nabiteg ay mangipatpateg en Diyos mo din palalo ay baknang ay ad-adoy pandandanagana.

¹⁷Maymayat di mansida si nateng ay waday layad mo din mansida si kam-isan ay karni ay waday liget sin nemnem.

¹⁸Din makabonget yan pawadaena di ibaw, ngem din naanos yan pawadaena di kapya.

¹⁹Ad-adoy ligat sin biyag di nasadot olay intoy em-emeyana, ngem din nalinteg yan magay problima ay domteng sin biyag na.

²⁰Paragsaken di nanemneman ay anak din akin anak en sisya. Din naong-ong anggoy di manglasoy sin napoana.

²¹Maragsakan din magay nemnem na sin magay silbi na ay inoong-ong, ngem din masirib yan say amagena din kosto.