Proverbio 15:19-33

¹⁹Ad-adoy ligat sin biyag di nasadot olay intoy em-emeyana, ngem din nalinteg yan magay problima ay domteng sin biyag na.

²⁰Paragsaken di nanemneman ay anak din akin anak en sisya. Din naong-ong anggoy di manglasoy sin napoana.

²¹Maragsakan din magay nemnem na sin magay silbi na ay inoong-ong, ngem din masirib yan say amagena din kosto.

²²Magay pantongpalan di plano mo magay kosto ay pamagbaga, ngem matongpal da mo ad-adoy mamagbaga.

²³Palalo ay omiparagsak din kosto ay kali sin kosto ay timpo.

²⁴Say pandanan di masirib din danan ay manturong si biyag ay baken din danan ay manturong si pese.

²⁵Dadaelen Diyos din beey di mangipapangato si nemnem da, ngem salaknibana din sanikwan di nalasang.

²⁶Kaliliget Diyos din nemnem di managbasol, ngem malaydan sin kalin di nalinis di nemnem na.

²⁷Din mangamgam si kinabaknang yan pawadaena di problima sin pamilya na, ngem matago di manigaan si pasoksok.

²⁸Din nalinteg et nemnemenas kosto di ibaga na, ngem din managbasol yan mankali si lawa ay adi na nemnemen.

²⁹Patgan Diyos din kararag di nalinteg, ngem adi na ikaskaso din kararag di managbasol.

³⁰Omiparagsak di manlamiing ay ipogaw yan omipasim-et di siged ay damag.

³¹Maibilang di ipogaw ay masirib mo dengngena di kosto ay pamagbaga.

³²Din adi kaitdoan et palpaligatena di awak na, ngem din mannge si pamagbaga et lomaing.

³³Din panangipateg di ipogaw en Diyos yan say somiribana. Masapol ay manpakombaba di ipogaw asi maidayaw.