Proveps-Knare Nomaniza 29:5-23

⁵Tava'o zamirema maninesia vahe'ma rezmatga hu'za masave kema huzmantaza zamo'a, zamagra'a kama nevazafi kuko anteankna nehaze.

⁶Kefo vahe'mofona krifumo azeriankna huno kumimo'a azenerianagi, fatgo vahe'mo'za zgame hu'za muse nehaze.

⁷Fatgo vahe'mo'za zamunte omne vahe'mofo nomni'zankura antahi nezamiza kegva hunezmantaze. Hianagi kefo vahe'mo'za, anara nosaze.

⁸Vahe'ma huhavizama huzamante vahe'mo'za ra kumapi tevea taginteankna nehaze. Hianagi ama' antahizane vahe'mo'za, haframa hu'zana eri amane nehaze.

⁹Ama' antahizane vahe'mo'ma neginagi vahe'ma keagarema avrentesiana, ana neginagi ne'mo'a, arimpa ahentege ana ke'arera kiza zokago ke nehanigeno znarimpa fruzana omanegosie.

¹⁰Vahe'ma zamahe fri vahe'mo'za, hazenkezmi omane vahekura zamavesra hunezmantaze. Hianagi fatgo vahe'mo'za, hazenkezmi omane vahe'ma zamazeri so'ema hanaza zanku nentahize.

¹¹Neginagi vahe'mo'za zamarimpa he'zana azerirava nosazanagi, ama' antahizane vahe'mo'za, zamarimpa ahe'zana azerirava nehaze.

¹²Kva ne'mo'ma havigemofoma amagema antesiana, mika eri'za vahe'amo'za haviza hugahaze.

¹³Amunte omane vahe'ene, knama nezamiza vahe'enena, Ra Anumzamo'a ana taregamokiznima magozahu'zama, zanami'neana zanavuma ke'za zanamine.

¹⁴Zmunte omne vahe'ma fatgo huno refakoma huzmantesia kini ne'mo'a, zaza kna kinia manino vugahie.

¹⁵Mofavrema kanoma amino azeri fatgoma huzamo'a, ana mofavrea ama' antahiza amigahie. Hianagi kanoma amino azeri fatgo osu mofavremo'a, nererana agaze eri nemie.

¹⁶Kefo zamavu'zmava'ene vahe'mo'za kvama manizageno'a, kefo avu'ava zamo'a ra huno marenerie. Hianagi fatgo vahe'mo'za manine'za nezamagesage'za evuramiza haviza hugahaze.

¹⁷Mofavreka'a avumro antenka, azeri fatgoma hanankeno knare avu'avama hanigenka, karimpa fru nehina muse hugahane.

¹⁸Ra Anumzamo'ma henkama fore'ma haniazanku'ma, eri ama huno kasnampa kema ozamasmisige'za, vahe'mo'za savri hu'za magoke kantera omanigosaze. Hianagi iza'o kasegema amage'ma antesimo'a, muse hugahie.

¹⁹Kazokzo eri'za vahe'mofona kegera hunka azeri antefatgo osugahane. Na'ankure ana kea antahi ama hugahianagi, ana kemofona amagera anteno anazana osugahie.

²⁰Zamagesa ontahi ame'ama kema nehaza vahera nezamagano? E'i ana vahera neginagi zamavu'zamava'ma nehaza vahe'mo'za zmaza huzama erisaza kamo'a zmagetere'ne.

²¹Osi'ma maninesigenka makazama hugnareke'ma hunte'nesana eriza ne'mo'a, henka'a kazeri haviza hugahie.

²²Arimpama ahe vahemo ha'ma hu'zana eri agafa nehie. Hagi ame huno rimpa ahe vahe'mo'a, rama'a kumi nehie.

²³Zamavufga eri antesga hu vahe'mo'za evuramigahaze. Hianagi zamavufgama anteramiza mani vahe'mo'za, ra zamagi erigahaze.