Proveps-Knare Nomaniza 25:6-24

⁶Kini ne' avurema emanisunka, nagra ra vahe'mani'noe hunka kavufga ra nosunka, zmagine vahe'mokizmi tratera eomanio.

⁷Akoheno mani'nenkeno kema huno avrenagamute zamo knarera hu'neanki, agine vahe'mofo avufima hugantesigenka anama mani'nenana tra'ma atrenka urami zamo'a kagaze hugahianki, antahinka kenka huntenka fatgoza huo.

⁸Ame hunka naneke hu tratera magomofona avrentenka kehara huonto. Na'ankure tava'onkarema maninaza vahe'mo'za, ana nanekeka'ama eriama huno kazeri kagazema haniana, atuparega na'a kagra hugahane?

⁹Kagrama tava'onkarema nemanisimo'enema ke ha'ma nehanunka, magomofo oku'a avu'ava'amofo nanekea hu amara osuo.

¹⁰Henka'ama vahe'mo'za antahisuza, frakiza hazankea kagra franokine huge, kazeri kagaze nehu'za mika zupa antahi haviza hugante vava hugahaze.

¹¹Hagi vahe'mo'ma knare antahi'zama kna fatgo'arema hu'ama'ma hanigeno'a, ana ke'mo'a kolire tro hunte'naza epoli zafa rgamo silva zuompafi meankna hu'ne.

¹²Knare antahizantetima azeri fatgoma nehanigeno agesa anteno antahisimo'a, kolire tro hunte'naza avasaseza agesafi anteankna hu'ne.

¹³Kema erino esia ne'mo'ma, ome huo huno huntesigeno esia kema eme fatgohuno anankema hu ne'mo'a, hozafinti neza hamare knare ata ko'mo rufru hiankna nehigeno, kva'amofo agu'amo'a fru nehie.

¹⁴Mago vahekuma museza kamigahue hunoma avufga ra hu kazigati huvempa hunteteno, anazama omisia vahe'mo'a, ko aruku zaho e'nerino hampo ko atuno hanintiri huteno, kora oriankna nehie.

¹⁵Hagi ame hunka krimpama ohe'zamo'a, kva vahera rimpa azerifru hunka, kagrarega avrentegahane. Antefru hunka huke'mo'a, ha' frama hu'zana mika azeri agateregahane.

¹⁶Tume'mofo tima'amo'a haga hu'neanki, nenenunka avamente no, rama'a nesanana amu'atigahane.

¹⁷Tva'onkarema nemanisimofo nontera hakare zupa vuvava osuo, anama hanankeno'a musema hunoma negavreanknara osugosianki, avesra hugantegahie.

¹⁸Tava'onkarema nemanisimofoma havigema huntenka, agenkema hanana zamo'a, kumpa knonu aheankna nehunka, kazinteti avufgama akafriankna nehunka, keve aheankna hugahane.

¹⁹Kagrama kaza osuga vahe'ma antahinemisankeno havi knama esigeno'a, naza hugahiema hananana, ave'neneno ata negrifi ne'zama neankna nehunka, agamo haviza hu'nea ne'mo revazamu revazamu huno veankna hugahane.

²⁰Vahe'mo'ma asunku zampima mani'nenigenka muse zgamema hananana, ana asunku zampi mani'nea vahe'mofona, zasi knafi nakreku'a zafi atreankna nehunka, aka tinu avufga taga hu'nefi tagi atreankna hugahane.

²¹Ha' vahekamofoma aga'zanku nehanigenka ne'zama nesia zana neminka, tinku'ma avenesinigenka tina amigeno neno.

²²E'inahu'ma hanankeno'a, teve tankanuza asenifi hampagenteankna hanankeno, agra'a havi avu'ava zama'agura agaze nehanigeno, Ra Anumzamo'a mizana kamigahie.

²³Vahe'ma amefiga ke'ma hu kemo'a, noti (north) kazigati zaho'mo ko atufeno eankna huno, ana vahe'mofontera arimpa ahe'za erino esigeno, avugosamo'a zahe hugahie.

²⁴Fegi'a anaga nomote kagraku manizamo'a, nogu'afima kehakarema nehia a'enema manizana agaterene.