Proveps-Knare Nomaniza 22:9-28

⁹Iza'o zamunte'ma omane nagama muse zampintima ne'zama amisia vahera, Ra Anumzamo'a asomu huzamantegahie.

¹⁰Kehu haviza hu vahera zamahe anati atrenkeno, vahe'ma huhavizama hu'zane, ha'ma hu'zane, fragema hu'zana vgareno.

¹¹Agu'amo'ma agru nehanigeno, fru kema huzanku avenesisimo'a, kini ne'mofo rone'a manigahie.

¹²Ra Anumzamo'a antahizama erizante avu'a anteno kegva nehianagi, hazenke vahe'mofo kea erinetre.

¹³Feru vahe'mo'a amanage nehie, megi'a laioni mani'neankino, vanuana nahe frigahie huno nehie.

¹⁴Savri a'mofo agipintima nea kemo'a, muri kankna hu'ne, izano Ra Anumzamo'ma arimpa hentesimo'a, ana muri kampi tamigahie.

¹⁵Mofavremofo agu'afina negi'nagi avu'avazamo avitegahianagi, kanoma amino azeri fatgoma hu'zamo ana avu'ava zampintira azeri arukrahe hugahie.

¹⁶Fenozami mago'ane eri rama'a hunaku'ma zamunte omane vahe kna zamiza zamazeri haviza nehaza vahe'ene, feno vahe'ma musezama nezamiza vahe'mokizmia, zamuntera omanegahie.

¹⁷Knare antahizane vahe'mofo kere kagesa antenka antahise nehunka, nagrama rempima hugamisuaza huo.

¹⁸Na'ankure ana kemo'a knare hu'neankinka kagu'afi erintenankeno ana kemo'a, kagitera me'nena kea hutere hugahane.

¹⁹Nagra menina rempi hunegamugu, nentahinka Ra Anumzamofonte kagranena kamentinti huo.

²⁰Nagra 30ti'a knare kegaga krentegantenofina, kavumro kene, antahiza eri zamofo naneke kregaminoankinka,

²¹ama ana kereti tamage kea rempi hunka antahinenka, iza'o hugantenigenka e'nesamofona fatgo'are kenona ome asamigahane.

²²Zamunte omane vahe'mokizmi zana ohanareho, na'ankure zamagra zamunte omane vahe mani'naze. Hagi zamunte omanesige'zama upama hu'nesaza vahera, keagarera zamavrenteta zamazeri havizana osiho.

²³Na'ankure Ra Anumzamo'a, zamunte omane vahera zamahokeno zamazeri havizama hanaza vahe'mokizmia, zamazeri haviza hugahie.

²⁴Arimpa hevava vahera rone huonto, ame huno rimpahe vahe enena tagro oto,

²⁵ru ana vahe zamavuzmava enerisankeno, kukomo kazeriankna huno kagu'a azeri haviza hugahane.

²⁶Mago vahera huvempa hunka mago'za hugantegahue osuo. Hagi ru vahe'mo'ma nofima hu'nesigenka, ana nofima hu'nea zana nagra vakanentegahue hunka osuo.

²⁷Anama nofima hu'nesaza zama apa osesanke'za miko zanka'ane, tafe'ma masinkama nemasesana zanena eri vgaregahaze.

²⁸Tamagehe'mo'za ko'ma re'nenaza kanagi kana, akasi kantutretma rumofo mopa eri havia osiho.