Proveps-Knare Nomaniza 17:6-13

⁶Nenama huza ra avuma omesaza vahe'mokizmia, zamagehe'mo'za, kini fetorikna zamanuntera hu'nage'za, ra zamagi vahe'mo'za nezamize. Hagi mofavre'mo'za nezmarera zmafana muse huzmantegahaze.

⁷Neginagi vahe'mofontera knare ke'ma hu'zamo'a, haviza hu'neanagi, kva ne'mo'ma havigema hu'zamo'a, havizantfa hu'ne.

⁸Mago'mo'ma mago zama erinaku zgoreti'ma maseve'ma amino erisiazamo'a, agraragisa kaguvaza huno efore hiankna nehie. Iza'o anazama himo'a maka zampina knare nehie.

⁹Iza'o havizama huntesimofoma kefo zama'a atrentesimo'a, amu'nozanifina avesinte avu'avazamo'a, meno vugahie. Hianagi arone'amofo havi avu'avazama'agu hugantigama hanimo'a, knare knampa'a azeri atanegahie.

¹⁰Kemofoma refko huno antahi ankemare vahe'mofona, magoke zupama azeri fatgo hu kema asamisankeno'a antahigahianagi, neginagi vahe'mofoma azeri fatgo hunaku'ma 100ti'a zupa knona ami'sanana, avu'avara ruzahera osugahie.

¹¹Kefo avu'avazane vahe'mo'za, ha'ma erifore hu zankuke zamave'nesiankino, hazenke'zami vahera huntenkeno zmavaririgahie.

¹²Anenta'ama kumzafama ase'nesaza beama, mago ne'mo'ma kantegama tutagihama huntezamo'a knare hu'neanagi, neginagi vahe'mo'za neginagi zamavu'zamavama nehaza vahe'enema tragoteno manizana agatere'ne.

¹³Hagi mago vahe'mo'a knare'zama magamofoma huntesia zanku'ma, nona huno kefozama huntesia vahe'mofona, kefo zamo'a naga'afintira atreno ovutfa hugahie.