Proveps-Knare Nomaniza 17:13-27

¹³Hagi mago vahe'mo'a knare'zama magamofoma huntesia zanku'ma, nona huno kefozama huntesia vahe'mofona, kefo zamo'a naga'afintira atreno ovutfa hugahie.

¹⁴Ha' frama hu'zamo'ma agafama nehanigeta, koma eri amne osanunkeno'a, ti anagi atregeno ti hageno eankna huno rama'aza eri haviza hugahie.

¹⁵Kefo avu'avama nehia vaheku'ma fatgo vahere nehu'za, fatgo zmavu'avazama nehaza vaheku'ma, kefo vahere hu'zama nehaza tare zmavu'zmavakura, Ra Anumzamo'a agoteno avesra hunezmante.

¹⁶Neginagi vahe'mo'za knare antahi'zama rempima hu'za eri zmave'sizama omane'nege'za, na'a higeza avono hu zgoa zamazampina eri'naze?

¹⁷Mika zupa knampatimo'za zmavesirantegahaze. Hagi knazampima tza hanagu tafuhe'mokizmia kasezmante'naze.

¹⁸Knare antahi'zazmima omane vahe'mo'za zamagrazmi huvempa hu'za, tava'ozmire nemaniza vahe'mo'za nofima hu'naza zama ovakanesageta, tagrati vakanezmantegahune hu'za nehaze.

¹⁹Iza'o ha'frama hu'zankuma avesintemo'a, kumiku avenesie. Iza'o agra'a agima erintesgama nehimo'a, hazenke erigahie.

²⁰Akrehe akrehe agu'ane ne'mo'a, knare zana hakeno erifore osugahie. Hagi iza'o tavre kema nehanimo'a, hazenkefi ufregahie.

²¹Neginagi vahe'mofo nerera nefa'a, tusi'a ataza e'nerie. Higeno nefa rimpamo'a, ana neginagi ne'mofonkura musena osugahie.

²²Musema huno mani'zamo'a, tusazamo vahera azeri so'e higeno maniankna nehie. Hianagi vahe'mofo antahizamo'ma havizama haniana, havi krimo zaferinafi me'neno azeri haviza hiankna hu'ne.

²³Kema refkohu tratema kefo ne'moma maninesuno'a, keagama eri haviza hinogu oku'a masevema huno amisia zgoa e'nerino, keaga eri rukrahe huno fatgo kantera ontahigosie.

²⁴Antahi'zane vahe'mo'a knare antahizante avua anteno nevie. Hianagi havi vahe'mofo avumo'a, mopa ataginare ame huno omegege, emegege huno nevie

²⁵Neginagi mofavremo'za nezmafana zamasuzana eri nezamie. Hagi kasema ante'nea zamarerahe'ina, zmarimpa zamata eri'nezamize.

²⁶Fatgo hu'nesia vahe'ma knazama zamige, knare huno hazenke'a omane kva vahe'ma knoma ami'zamo'a, haviza hu'ne.

²⁷Knare antahintahima me'nea vahe'mo'a, rama'a keaga osugahie. Hagi ama' antahizama me'nenia ne'mo'a, ame huno rimpagna osugahie.