Proveps-Knare Nomaniza 14:16-35

¹⁶Knare antahizane vahe'mo'a kva huso'e hu'neno, kefozana agatenere. Hianagi neginagi vahe'mo'a kva huso'e osuno, makazana amane hugahue huno nehie.

¹⁷Ame huno rimpama ahe vahe'mo'a, neginagi avu'ava nehie. Hagi kefozama hu antahintahima eri fore'ma nehia vahera, avesra hunentaze.

¹⁸Osi'a antahintahine vahe'mo'za, neginagi avu'avaza erisantiharegahaze. Hianagi makazama ankere'za hu vahe'mo'za, kini fetori anteankna huno antahizana erigahaze.

¹⁹Iza'zo kefo zamavu'zmava nehanamo'za knare'zama nehanaza vahe zamavuga zamarena regahaze. Havi zama nehamo'za fatgo vahe'mokizmi kegina kafante zamarena ome reza husga huzmantegahaze.

²⁰Amunte'ma omne'simofona, knampa'amo enena avesiontegahie. Hianagi feno vahe'ma manisimofona, rama'a vahe'mo'za knampa'a manigahaze.

²¹Inamo'o tava'oma'arema maninesimofoma kefenkami netreno knarema huontesimo'a, kumi hugahie. Hianagi iza'o amunte omane vahe'ma knarema huntesimofona, Anumzamo'a asomu huntegahie.

²²Havi avu'avama huzamofo kema retroma hanaza vahe'mo'za, havi kantera novazafi? Hianagi iza'zo knare avu'avama huzamofo kema retroma hazamo'za, mani fatgoma huno manizane vga'ore avesizana ke'za erigahaze.

²³Hanavetiza mika erizama eriza vahe'mo'za, rama'a eriguhe'za erigahaze. Hagi mani'neza ke'agema hu vahe'mo'za, zamunte omane vahe manigahaze.

²⁴Ama' antahizane vahemofo fenomo'a, anunte fetori meankna huno me'ne. Hianagi neginagi zmavu'zmavama nehaza vahe'mokizmi neginagi zmavu'zmavamo'a, zmazeri neginagi nehie.

²⁵Keagama humanezmantesafima, tamage hunka kema huamama hanamoka, rama'a vahe zmagu'vazigahane. Hianagi keagafima havigema hunka huamama hanamoka, havige vahe manigahane.

²⁶Ra Anumzamofoma korema huntesimofona, Agra hanave vihu huntenkeno mani'nena, mofavre'amo'za hanave vihufi manigahaze.

²⁷Ra Anumzamofoma kore'ma hunteno Agri agorga manizamo'a asimu ami' kapu'i ti me'neankino, vahe'ma ahefri krifu'fintira azeri atregahie.

²⁸Kinimo'ma rama'a vahe'ma kegvama hanige'za, agrira ragi amigahaze. Hianagi kinimo'ma osia vahe'ma kegvama hanuno'a, agra haviza hugahie.

²⁹Ame' huno zmarimpa ohe vahe'mo'za, ama' antahiza e'nerize. Hianagi hatuma huza zamarimpahe vahe'mo'za, neginagi zmavu'zmava eri ama nehaze. (Jem 1:19-20)

³⁰Vahe'mo'ma rimpama ante fru hunoma mani'zamo'a, avufgamofona asimu amigahie. Hianagi rumofo zante'ma kesanema nehanimofona, ana avu'avamo'a zaferinafi namureno kasriankna hugahie.

³¹Kagrama amunte omane vahe'ma zmazeri havizama hanunka, troma huzmantenea Anumzamofo huhaviza nehane. Hianagi kagrama zmazeri so'e hanunka, Anumzamofona ra agi amigahane.

³²Kefo avu'avama nehia vahe'mofona, ana kumi avu'avazamo azeri haviza hugahie. Hianagi fatgo vahe'mo'ma, frisigeno'a, agu'vazigahie.

³³Knare antahi'zamo'a, ama' antahizane vahe'mofo agu'afi akoheno meso'e huno megahie. Neginagi vahemofo agu'afina ana knare antahizamo'a, agra'a azeri ante'ama' nehie.

³⁴Fatgo avu'ava hu'zamo'a ana mopafi me'nea kumara azeri antesga nehie. Hianagi kumi'ma nehaza avu'avazamo'a mika ana mopafi vahe'mofona, azeri agaze nehie.

³⁵Knare avu'avamahia eriza ne'mofona, kinimo'a muse hunente. Hianagi agazema hu avu'avama nehia eri'za vahera, kinimo'a rimpa ahentegahie.