Proveps-Knare Nomaniza 13:3-11

³Iza'o agi'ma kegavama huno kema himo'a, agra'a maniza kegva nehie. Hianagi rama'a keagama hania vahe'mo'a, agra'a azeri haviza hugahie.

⁴Feru vahe'mokizmi zmagu'amo'a, rama'a zama erizanku zmave'nesianagi, anazana e'norize. Hianagi amuho hu'za eri'zama erisaza vahe'mo'za, zmavesizana eri knare hugahaze.

⁵Fatgo vahe'mo'za havigema huzankura zamavesra nehaze. Hianagi kefo zamavu'zamava nehaza vahe'mo'za, rumokizmirera zmagaze huno zamagote zmavu'zmava nehaze.

⁶Fatgoma huno manizamo'a kva hugantena, knare hunka hazenkea omanesigenka manigahane. Hianagi kefo avu'avamo'a, kumi vahera azeri haviza hugahie.

⁷Mago'a zmunte omane vahe'mo'za, feno vahe kna nehaze. Hagi mago'a feno vahe'mo'za, zamunte omane vahe kna nehazanagi, feno vahe mani'naze.

⁸Feno vahe'mo'za nomaniza'zmima eri havizama huzankura, miza hu'za manigahaze. Hianagi zamunte'ma omane vahe'mofona, mago vahe'mo'a azeri korera osugahie.

⁹Fatgo vahe'mokizmi lamu tavimo'a, ru masa nehige'za, muse nehaze. Hianagi kefo zamavu'zamavama nehaza vahe'mokizmi lamu tavimo'a, asu nehie.

¹⁰Avufga ra huno vahe'mofo agorga omani avu'avazamo'a, ha' fra hu'za avreno ne-e. Hianagi avumro kema antahino amagema ante vahe'pina, knare antahizamo'a megahie.

¹¹Revatga hunka havige kantetima eri'sana zgomo'a, ame huno fanane hugahie. Hianagi eri'zama erino, osia eri atruma hute hutema himo'a, rama'a eri atru hugahie.