Proveps-Knare Nomaniza 11:1-27

¹Havizama huno avamente'ma refkohu so'ema nosia vahera, Ra Anumzamo'a agoteno avesra hunente. Hianagi avamente'ma fatgo huno mizama asea vaheku avesinente.

²Kavufga atarezamo'a, kagaze'za erigamigahie. Hianagi kavufga anteramizamo'a, knare antahintahiza erino egahie.

³Maka zampima tamage huno fatgo avu'avama hanimofona, ana avu'avazamo kegva huntegahie. Hianagi hazenke vahe'mofo akrehe akrehe'zamo'a, zamagrira zamahe fanane hugahie.

⁴Refkoma hugantesia knarera, feno zankamo'a kaza osugosie. Hianagi fatgoma huno manizamo'a frizampintira kagu'vazigahie.

⁵Fatgo vahe'mokizmia tamagehu zamavu zamavamo hanige'za, kama nevaza kamo'a, knare hu'nesige'za vugahaze. Hianagi havi vahe'mokizmia zamagra nehanaza kumimofo kna'amo, zamazeri traka hugahie.

⁶Fatgo zmavu' zmavama nehaza vahe'mokizmia, fatgo zmavu' zmava zmimo'a zamagu nevazie. Hianagi fatgo osu vahe'mokizmia fatgo osu zmavu' zmava zamo zmazerigahie.

⁷Kefozama nehia vahe' moma erinaku'ma amuhama nehia zamo'a frisigeno'a anama erinakuma amuhama nehiazamo'a, amane zankna hugahie

⁸Hazenke zamo'ma fatgo vahete'ma esniana, Ra Anumzamo'a aza huno avare atrenigeno, ana hazenke zamo'a kefozama nehanaza vahete egahie.

⁹Anumzamofonku'ma korema hunte'za agorgama omaniza vahe'mo'za, kezmireti tava'ozmirema mani'namokizmia zamazeri haviza nehaze. Hianagi fatgo vahe'mo'za ama' antahiza zamimo zamagu nevazie.

¹⁰Fatgo vahe'mo'zama nomaniza zmifima knare hazageno'a, rankumapi vahe'mo'za musenkase nehaze. Hagi kefo zamavu zamavama nehaza vahe'ma fri'zage'za, havizama nehiazana vgaregahie hu'za tusi muse nehaze.

¹¹Anumzamoma fatgo vahe'mofo nomanizama asomuma huntegeno'a, rankumamofo agimo'a marenerie. Hianagi kefo avu'avama nehia vahe'mofo agipintima esia kemo'a, rankumara eri haviza hutregahie.

¹²Tava'ozmirema nemaniza vahe'ma zamage henkaminetaza vahe'mo'za, neginagi vahe mani'naze. Hianagi fatgo antahizane vahe'mo'za, kea osu akohe'za nemanize.

¹³Iza'o vahe amefi kema huno vanoma hanimo'a, oku'a fraki'nesia zana hu'ama hugahie. Hianagi tamage kema hu vahe'mo'a, nefuma hu'nenia zana huama huontegosie.

¹⁴Ama' antahizane kva vahe'ma omanisigeno'a, kumamo'a haviza hugahie. Hianagi knare antahizama ami vahe'ma rama'ama mani'nenageno'a, kumamo'a hankvetino knare hugahie.

¹⁵Mago'mo'ma vahepintima nofima hu'nesigenka, anazamofo nona huna miza kamigahue hunka hanunka, knaza erifore hugahane. Hianagi ana'ma hu'zankuma avesrama hanimo'a, agra'a aguvazigahie.

¹⁶Rimpa fru avu'ava ene a'mofona, agesga hunentaze. Hianagi vahekuma asuragionte ne'mo'a, feno zanke e'nerie.

¹⁷Vahe'mofo asuraginteno so'e avu'avama hunte ne'mo'a, agra'a azeri so'e nehie. Hianagi vahe'mokizmi havizama huzmantea ne'mo'a, agra'a azeri haviza nehie.

¹⁸Kefo avu'avama nehaza vahe'mo'za, antesaza feno zmimo'a atupa knafi megahie. Hianagi fatgo vahe'mokizmi mizamo'a, zaza kna megahie.

¹⁹Fatgo vahe'mo'za knare manizanku nehakaze. Hianagi havi avu'avazama nevaririza vahe'mo'za, frizanku nehakaze.

²⁰Hagi akrehe akrehe avu'avazama agu'afima me'nea vahe'mofona, Ra Anumzamo'a agotenezmante. Hianagi fatgoma hu'za nemaniza vaheku, Ra Anumzamo'a muse hunezmante

²¹Tamage, havi avu'avama nehaza vahe'mo'za hazenkea agateore'za, ana hazenkea erigahaze. Hianagi fatgo vahe'mokizmi mofavreramina, Ra Anumzamo'a keagaga huozmanteno zmagu'vazigahie.

²²Hentofa agi agonane a'mo'ma fatgo osu avu'avama nehia a'mo'a, agra afu'mofo kolire tro hunte rinima agonafi antanintaza kna hu'ne.

²³Fatgo avu'avama nehaza vahe'mo'za, knare'zama erifore'ma hanaza zanku zmave'nesie. Hianagi havi zamavu'zamavama nehaza vahe'mo'za hazenkefi manigahune hu'za antahigahaze.

²⁴Zamagragu'ma ontahiza vahe'ma zamaza nehaza vahe'mo'za, zamagra mago'ane eri avitegahaze. Hianagi rumofo amiga zama omisnazana, maka zankura eme atupa hugahaze.

²⁵Muse hu'za vahe'ma vevama nehaza vahe'mo'za, zmagra'a rama'aza erigahaze. Vahe'ma zmazahu vahe'mo'za, ana nona'a erigahaze.

²⁶Iza'o nezama'ama zgore'ma otreno, azeri akonama hania vahe'mo'fona, vahe'mo'za huhaviza huntegahaze. Hianagi iza'o nezama'ama zgore'ma atresimofona, asomu'mo agritera megahie.

²⁷Iza'o knare avu'ava zankuma kazigazi huno hakesimo'a, knare'za erinkeno, kefo zanku'ma hake'simo'a, kefoza erigahie.