Proveps-Knare Nomaniza 10:2-30

²Havi kazigatima erisana feno zamo'a kaza osugahianagi, mani fatgoma hunka manizamo'a, fri zampintira kagu vazigahie.

³Fatgoma hunoma nemania vahera, Ra Anumzamo'a atregeno agazankura nosie. Hianagi fatgo osu'zama haza vahera, zamatrenige'za erinaku'ma maragu'zama netizazana e'origahaze.

⁴Feru'ma maniza vahe'mokizmia zamuntera nomane. Hianagi amuhoma hu'za erizama erizamo'za, rama'a fenoza nentaze.

⁵Ama' antahizama eri'nea vahe'mo'a, nezamo'ma nenama hianknafina, ne'zana eritru nehie. Hianagi ne'zama hamareno eri atruhu knafima, avu'ma masea vahe'mo'a agazegu hugahie.

⁶Fatgo vahe'mokizmia zamasenirera asomu'mo'a, kini fetori antani zamante'ankna nehie. Hianagi kefozama nehaza vahe'mokizmi kemo'a, hazenkezana refinete.

⁷Fatgo vahe'mo'zama ko'ma knare zama hu'naza zankura, vahe'mo'za antahinezmiza muse nehaze. Hianagi kefo zama nehia vahe'mofona, agi agenke'a omanegahie.

⁸Ama' antahintahine vahe'mo'za, eri'za kea nevaririze. Hianagi tavare vahe'mo'za, haviza nehaze.

⁹Iza'zo mika zampima mani fatgoma haza vahe'mo'za, knare hu'za nemanize. Hianagi fatgo zama osnimo'a, fra'okigahie.

¹⁰Regavumi kavami huzamo'a, hazenke eri kamigahie. Hagi tavre vahe'mo'za zmagra'a haviza hugahaze.

¹¹Fatgo vahe'mofo zamagipintima atiramia kemo'a, asimu ami tinkapui'mo atiramino eankna nehie. Hianagi kefozama nehaza vahe'mokizmi zamagipintima atiramia kemo'a, hazenke zana refinete.

¹²Vahe'ma antahi havizama huzamo'a, ha' fra hu'za eri fore nehie. Hianagi vahe'ma avesima ante'zamo'a, miko kefozana refinete.

¹³Knare antahizamo'a knare'ma huno refkomahu vahe'mofo zamagi'pinti atineramie. Hianagi knare antahintahi omane vahe'mofona zmgumpi sefu amigahaze.

¹⁴Ama' antahizane vahe'mo'a, antahi'zana erite erite huno, rama'a enerie. Hianagi neginagi kema haza vahe'mo'za, mika zankura upa nehu'za, ame hu'za haviza hugahaze.

¹⁵Feno vahe'mokizmi feno zmimo'a, vihu huzmanteankna hugahie. Hianagi zamunte'ma omaneazamo zamunte omane vahera zmazeri haviza nehie.

¹⁶Fatgo zamavu'zamavama nehaza vahe'mokizmia mizazmia, knare nomaniza erigahaze. Hianagi kefozama nehaza vahe'mo'za, havi miza erigahaze.

¹⁷Avumro'ma anteankema antahimia vahe'mo'a, knare nomaniza eri kante nevie. Hianagi zamazeri fatgoma hazanke'ma zamavesrama huntaza vahe'mo'za, havifi nevaze.

¹⁸Rimpa knama hu'nea vahe'mo'ma ana rimpa knama refitenakura, rama'a havige nehie. Hagi vahe'mokizmi zamagenkema hu vahera, neginagi vahere.

¹⁹Rama'a kegagama huzamo'a, kumipi kavareno nevie. Hianagi iza'o agefu'nama kegavama himo'a, ama' antahizane vahe manine.

²⁰Fatgo vahe'mofo kemo'a, knare silvagna hu'ne. Hianagi havi vahe'mokizmi antahintahimo'a, haviza huno mago kna'a omanene.

²¹Fatgo vahe'mofo kemo'a, rama'a vahe zamazeri hanavenetie. Hianagi neginagi vahe'mo'za antahi ama'hu antahintahigura upa hu'za nefrize.

²²Ra Anumzamo zamazeri feno vahe nesea asomumo'a, asunkuzana eri ozamigosie.

²³Neginagi vahe'mo'za, kefo avu'avazana kiza zokago hazankna hu'za nehaze. Hianagi ama' antahintahine vahe'mo'za, knare antahintahifi muse hu'za makaza nehaze.

²⁴Kefo vahe'mo'zama koroma nehazazamo'a, zamagrite egahie. Hianagi fatgo vahe'mo'za zmave'ma nesiazana erigahaze.

²⁵Kefo avu'avazama nehaza vahe'mokizmia unu ko'ma atuno esuno'a, zamavreno fregahie. Hianagi fatgo vahe'mo'za oti hanavetiza, manivava hugahaze.

²⁶Feru vahe'ma eri'za erinogu'ma huntesanana, ana vahe'mo'za aka'zamo vahe'mokizmi zamagipi ufreno akahiankna nehu'za, tokimo vahe'mokizmi zamavurgafi ufareno aka heankna kagritera hugahaze.

²⁷Ra Anumzamofoma koroma hunteno agorga'ama manizamo'a, zaza kafuzge manigahane. Hianagi kefozama hu vahe'mokizmia knazamia erikofa hinke'za, zazatera omanigahaze.

²⁸Fatgo vahe'mo'zama amuhama nehaza zamofo nena'a musezane. Hianagi havizama nehaza vahe'mozama amuhama nehazazamo'a amene zankna hugahie.

²⁹Ra Anumzamofo avu'avazamo'a fatgo vahe'mokizmi, vihu huzmanteankna hu'ne. Hianagi havi avu'avazama nehaza vahe'mokizmia, zamazeri haviza hugahie.

³⁰Fatgo vahe'mokizmia zamazeri torera osugahie. Hianagi havi zmavu'zmavama nehaza vahe'mo'za, ama'na mopafina omanigahaze.