Pend-nesihetler 14:21-35

²¹Yéqinini pes körgen gunahkardur; Lékin miskinlerge rehim qilghan beriket tapar.

²²Yamanliq oylighanlar yoldin adashqanlardin emesmu? Biraq yaxshiliq oylighanlar rehim-shepqet, heqiqet-sadiqliqqa muyesser bolar.

²³Hemme méhnettin payda chiqar; Biraq quruq paranglar ademni mohtajliqta qaldurar.

²⁴Aqilaniler üchün bayliqlar bir tajdur; Exmeqlerning nadanliqidin peqet yene shu nadanliqla chiqar.

²⁵Heqqaniy guwahliq bergüchi kishilerning hayatini qutquzar; Yalghan-yawidaq sözleydighan guwahchi yalghan gepni nepestek tinar.

²⁶Perwerdigardin qorqidighanning küchlük yölenchüki bar, Uning balilirimu himayige ige bolar.

²⁷Perwerdigardin qorqush hayatning buliqidur; U kishini ejellik tuzaqlardin qutquzar.  

²⁸Padishahning shan-sheripi puqrasining köplikidindur; Puqrasining kemliki emirning halakitidur.

²⁹Éghir-bésiq kishi intayin aqil kishidur; Chéchilghaq exmeqliqni ulughlar.

³⁰Xatirjem köngül tenning saqliqidur; Hesret chékish bolsa söngeklerni chiritar.

³¹Miskinni bozek qilghuchi — Perwerdigargha haqaret qilghuchidur; Hajetmenlerge shapaet qilish Uni hörmetligenliktur.

³²Yaman öz yamanliqi ichide yiqitilar; Heqqaniy adem hetta sekratta yatqandimu xatirjem bolar.

³³Yorutulghan kishining könglide danaliq yatar; Biraq exmeqning könglidikisi ashkara bolmay qalmas.

³⁴Heqqaniyet herqaysi elni yuqiri kötürer; Gunah herqandaq milletni nomusqa qaldurar.

³⁵Padishahning iltipati eqilliq xizmetkarning béshigha chüsher; Biraq uning ghezipi nomusta qaldurghuchi uyatsiz xizmetkarining béshigha chüsher.