OSEE 5

1

2

3

4

5

6

7

8

9

10

11

12

13

14

¹Kɛ̀ Kuyie mbɛ́innɛ̀ ikuɔ́ nìùbɛ̀ nɛ̀ Isidɑyɛɛribɛ kpɑ̀ɑ̀tìbɛ̀ kɛ dɔ̀: Díndi ikuɔ́ nìùbɛ̀, kéntɛ́nɛ̀ kɛ́keè! Dɔɔ̀nɛ̀ mɛyɔɔ̀mmɛ̀ díndi Isidɑyɛɛribɛ kpɑ̀ɑ̀tìbɛ̀, keènɛ̀ n yóó di nɑ́kɛ́ tì. Díì do dò nkɛ́bɛnkɛ bɛnìtìbɛ̀ dɛ̀ɛ̀ sìɛ́. Kɛ̀ díì nɛ́ nɑɑ́ mbɛ kpɛ́í timɑ́tì dindííntì Misipɑɑ ɛì miɛkɛ, kɛ nɑɑ́ nticùɔ̀tì Tɑbɔɔ tɑ̃rì.

²Di keù difɔ̃̀tìrì cũmpuri ndi Sitimmu ɛì miɛkɛ kɛ̀ n yóó di potɛ́ dimɔu. Mí ndi Yiɛ̀ nKuyie mmíì bɛ́i.

³Díndi Isidɑyɛɛribɛ n di yɛ̃́mu. Isidɑyɛɛribɛ n yí di biinninɛ̀, Isidɑyɛɛribɛ di tũ̀nnɛ yɛbɔkɛ̀ nyɛ, Isidɑyɛɛribɛ di sɑ̃ũ dimɑ́ɑ̀ ndi.

⁴Isidɑyɛɛribɛ di dɔɔ̀rìmɛ̀ í yie kɛ di bo wɛ̃tɛní m borɛ̀, di bo ndɔutinɛ̀mɛ̀ ditɔbɛ̀ dɛ kó mɛyɛ̀mmɛ̀ mɛɛ̀ di tɔ, kɛ̀ di í nɑ kɛ m bɑntɛ́ mí ndi Yiɛ̀ nKuyie.

⁵Isidɑyɛɛribɛ di kó tɛfentɛ̀ tɛɛ̀ nɑ̀kɛ́ di kpɛ́í Efɑdɑimmu kɔbɛ nɛ̀ Isidɑyɛɛribɛ di yɛi mɛɛ̀ di bɔ. Kɛ̀ Sudɑɑ kɔbɛ múnkɛ di tũ̀nnɛ kɛ do.

⁶Di bo n wɑmmú kɛ fíé ipe nɛ̀ inɑ̀ɑ̀kɛ kɛ́ m mɔ́ntɛ́ kɛ yɛ̃́ n yìtɛ́mɛ̀ di cuokɛ̀.

⁷Di n ciitɛ́mu mí ndi Yiɛ̀ nKuyie nkɛ dɔutinɛ̀ ditɔbɛ̀ nkɛ piɛ́ dɛ kó ibí, nɛ̀ dɛ kpɛ́í otɑ̃̀nkù pɑ̀nwè kó dibɑnni bo di nɛinɛ̀, díndi nɛ̀ di kpɛrɛ.

⁸Kɛ̀ ti Yiɛ̀ nKuyie nni mbɛ́innɛ̀ kɛ dɔ̀: Eénɛ̀ ditɑ̃tɛheù Kibeɑ ɛì miɛkɛ! Eénɛ̀ tɛkpɑ̀rìheutɛ̀ Dɑmɑɑ ɛì! Potɛ́nɛ̀ tɛíkòntɛ̀ Bɛti-Afɛnni ɛì. Bɛnsɑmɛɛ kɔbɛ! Nɛ̀ di ĩ́nkɛ̀ nkɛ.

⁹M bo potɛ́ dìì yiè Efɑdɑimmu botí kɔbɛ, bɛ ɛì bo dɔúnko. N nɑ́ɑ́ ntì Isidɑyɛɛribɛ tì tu timɔ́mmɔnti nti.

¹⁰Sudɑɑ kpɑ̀ɑ̀tìbɛ̀ tu bɛ̀ɛ̀ tɑɑ̀ bɛ̀mbɛ bɛtɔbɛ̀ kó sibɑɑ miɛkɛ, Nɛ̀ dɛ kpɛ́í m miɛkɛ bo bɛ̀ dɑ̀tínnɛ́ mɛniɛ nhɔ̃ɔ̃ tɑmɛ̀ kukó.

¹¹Isidɑyɛɛribɛ díndi bɛ̀ɛ̀ do fɛ̃́ũnko bɛtɔbɛ̀, di mmɔ̀nnì di fɛ̃́ṹrì mɛ̀ɛ̀ fɛ̃́ṹtímɛ̀ di mɛ̀ mɑ̀nnɛ̀mu, di tũ ndɛtetìrɛ̀ kpɛrɛ ndɛ sɑ̃́ɑ̃̀.

¹²N yóó nɑɑ́ ndimɔnsĩ̀nnì ndi Isidɑyɛɛribɛ kpɛ́í, Sudɑɑ kɔbɛ bo yɑ̀, kùù yonku bo ndònnɛ̀ kuninyonku ɔ̃ ndòmmɛ̀,

¹³Isidɑyɛɛribɛ bɑntɛ́mu bɛ mɔmmú, kɛ̀ Sudɑɑ kɔbɛ yɑ̀ bɛ yonku. Isidɑyɛɛribɛ biɛ nɛ́ kɔ̀tɛ Asidii nwe okpɑ̀ɑ̀tì diɛwè borɛ̀, ò mɛ mbɑ́ɑ́ nɑ kɛ́tɑɑ mbɛ mɔnni ò bɑ́ɑ́ nɑ kɛ́dɛitɛ bɛ yonku.

¹⁴Mí nKuyie mmíì di do díndi Isidɑyɛɛribɛ dimɑnnì tɛ̃mɛ̀, míì do Sudɑɑ kɔbɛ dicìrícìrìbii kɔ̃mɛ kɛ̀ m pĩ nkɛ ɑɑkɛ́ kɛ kérí, we mbo nɑ kɛ́fietɛ?

¹⁵N yóó bɛ̀ yóumu kɛ́kò nkɛ́nkémmú bɛ̀ bo bɑntɛ́mɛ̀ bɛ cɑɑ̀rìmɛ̀, kɛ́ n wɑmmú. Bɛ̀ bo tɑ dìì mɔ̀nnì mɛyɛǹcɑɑ̀rìmɛ̀ miɛkɛ bɛ̀ bo n wɑmmú.