Ose 5

1

2

3

4

5

6

7

8

9

10

11

12

13

14

¹«Dégluleen lii, yeen sarxalkat yi! Teeyluleen, yeen waa kër Israyil! Teewluleen, yeen waa kër buur! Yeen la àtte bi ñeel. Ag fiir ngeen tegoon ca Mispa, ab caax ngeen laloon ca tundu Tabor,

²Fippukat yi gën nañoo xuus ci seen bóome, waaye maa leen di yar, ñoom ñépp.

³Maa xam Efrayim, Israyil laa ne, umpu ma. Efrayim, yaa gànctu, Israyil laa ne, yaa sobeel sa bopp.

⁴Seeni jëf a leen mayul ñu dellu ci seen Yàlla, nde ngelawal ngànctoo wale fa seen biir, te Aji Sax ji, faalewuñu ko.

⁵Israyil, ag reewandeem a ko tiiñal, Israyil ak Efrayim ñooy fakktaloo seenug ñaawtéef, Yuda it ànd ak ñoom fakktalu.

⁶Seen jur gu gudd ak gu gàtt lañuy àndal, di seet Aji Sax ji, duñu ko gis, te moo leen dëddu.

⁷Aji Sax ji lañu wor, nde doomi po lañu jur; Léegi la leen màggalug Terutel weer di booleek seen suuf, sànk leen.

⁸«Wal-leen bufta gi ca Gibeya, jibal liit gi ca Raama te yéene ca Bet Awen. Moytul sa gannaaw, Beñamin.

⁹Efrayim day gental kera bésu mbugal, maa xamle ci biir giiri Israyil lu wér péŋŋ.

¹⁰Kàngami Yuda mujj mel ni ñuy toxal màndargam làccu suuf. Ci seen kaw laay yuri samam sànj nim ndox.

¹¹Efrayim lees di not, joggati ay yelleefam, nde moo dogoo topp yoonu caaxaan.

¹²Man nag ni ñaawat laay def ak Efrayim, te ni sànkar laay def ak Yuda.

¹³Ba Efrayim gisee jàngoroom, Yuda gis ab danaam, Efrayim a dem Asiri, yónnee ca Buur Yareb. Waaye manu koo wéral, mbaa di ko fajal ab danaam.

¹⁴Man déy ni gaynde laay mel ak Efrayim, ni gaynde gu ndaw laay mel ak waa kër Yuda. Man, man mii maay xotat, wéy, maay yóbbu te kenn du wallu.

¹⁵Ma daldi ñibbi, ba ñu nangu seenug tooñ, sàkku ma. Bu ñu jàqee lañuy daw wutsi ma.»