Hosea 5

1

2

3

4

5

6

7

8

9

10

11

12

13

14

¹“Gimed e pi prist, mu telmed ko pi thin ni ba’aray! Gimed piyu Israel, e ngar mu telmed! Gimed e pi’in ni girdi’en e tabinaw rok e en pilung, mu telmed! Susun e gimed e ngu’um turguyed e gechig nib mat’aw, machane bay yib e gechig ngomed! Kam manged ba wup u Mizpah, ni bangi nug ni kan k’iyag u daken e burey ni Tabor,

²nge ba low nib to’ar ko binaw nu Akacia, ere bay gu gechig nagmed ni gimed gubin.

³Gu manang salpen Israel, dabiyag ni nge mithag rog. Be par nder yul’yul’ ngog, ma tirok e girdi’ e daki bung ni ngar meybilgad ngog.”

⁴Kireb nike ngongliy e girdi’ e ke tayrad ndarir sulod ngak e Got rorad. Pigpig ni yad be tay ngak yug boch e got e ke michigiyrad, dakuriy madgun SOMOL u wun’rad.

⁵Uf uf ko girdi’ nu Israel e be togopluw ngorad. Denen rorad e be tun ayrad ngay ngar dol’ gad, ma girdi’ nu Judah e be un ngorad ko madol’.

⁶Rayag ni ngar feked e saf rorad nge garbaw ngar pi’ed ni maligach ngak SOMOL, machane dariy angin ngorad. Dabiyag ni ngar pir’eged, ya ke chuw rorad.

⁷Da ur yul’yul’gad ngak SOMOL; ere pifakrad e daki mil farad ngak. Ere dabki n’uw nap’an min thirifrad u but’ min gathay e pi nam rorad.

⁸Mu thoyed e yabul u Gibeah ni fan ko mael! Mu kum rin’ed u Ramah! Mu tolul niged e mael u Bethaven! Girdi’ rok Benjamin, marod ko mael!

⁹Rran ko gechig e beyib, mra mogoth yu Israel. Girdi’ nu Israel, ren’ey e rib mudugil nra buch!

¹⁰Be ga’ar SOMOL, “Kug damumuw ya pi’in yad ma yog e thin u Judah e kar iringed e binaw ntafen yu Israel, ere bay gu pu’og e gechig nga dakenrad ni bod e lul’ ni sugubur.

¹¹Israel e yi be gafgownag. Ya ke mul e binaw ntafen u pa’ ya kari turguy u wan’ ni ngi i yan i ning e ayuw ngak e pi’in ndabiyag ni ngar pi’ed e ayuw ngak.

¹²Bay gu fek e riya’ nga daken yu Israel mug gafgownag e girdi’ nu Judah.

¹³“Fa’ani guy Israel feni gel e m’ar nike yib ngak, me guy yu Judah e maad’ad nike tay, ma aram me yan Israel nga Assyria ni nge wenig ngak fare pilung ni nge ning e ayuw, machane de yag rok ni nge gol nagrad ara faseg e maad’ad rorad.

¹⁴Bay gu cham ngak e girdi’ nu Israel ngu Judah ni bod ba layon nib gel. Bay gu popofrad nge mu’ mu gu pagrad. Nap’an ni gu ra girngiyrad nga bang, ma dariy be’ nra ayuwegrad u pa’ag.”

¹⁵“Bay gu digey e girdi’ rog nge mada’ ko ngiyal’ nike gaman e gafgow rorad ni puluwon e denen rorad miyad gayeg. Sana yad ra gafgow miyad guy rogon ni ngar pir’eged gag.”