1Taha bapa ŋoŋe dâŋ ʒi mananiŋ, â Israe kikefuŋ ŋoŋe hazec mi qaniŋ; ŋicwofuŋ wiacfâcne ŋoŋe hazec râeniŋ! Mumutara dameŋzi maic‐ŋopazo ekac; ŋoŋe Mizipa haeo bitiŋ iŋucne embiŋ, â Taboro tikio ufic moc fârekicne iŋucne hâcne.
2Ŋoŋe Sitim haeo nombâŋ ʒora iŋucne embiŋ, eme no irec hâcne bâtiŋ‐ŋopa‐fârekopac.
3No Eferaimte fuŋne mana‐jâmbâŋkekopac, â Israe e nore maio sosoŋkene mi fokac. Eferaim, go qâpuc wiac ehuc jumeŋ, â Israe e maŋwânâŋhec ewec.
4Jaŋe Anutu‐jeŋictao risienʒipiŋte eebapa‐jeŋiczi aka hejareekac, â sasecte mamanasuzi maŋjeŋicko fokacte Wofuŋ mi mana taraeŋgopieŋ.
5Israe ŋic jaŋe jaŋacne pepec penaroŋzi mutaniŋ‐jopaekac, irec Israe mecne, Eferaim mecne mâmâc jaha kiŋjekicte erâ waha jofaocmu, ehame Juda e jahacne mâmâc waha qaocmu.
6Jaŋe lama bulimakaofâc‐jeŋic bâzire biŋe bacjopa rarâ Wofuŋ wira basac ecneniŋmu, erâ e râpec‐jopawecte mi bâfuaniŋmu.
7Jaŋe Wofuŋ râpeckembiŋ, ehuc naru motec bâfuac‐jopambiŋ jaŋe jabane embiŋ. Irec mosare hombaŋzi jaŋe mecne â giegaŋ‐jeŋic mâmâc imac‐jopa‐fâreocmu.
8Gibea haeo qeŋ qaniŋ, Rama haeo qeŋ bâsokahuc qaniŋ. Betaweŋ haeo aŋara heniŋ, Benjamiŋ mu hâhâwic ecneniŋ!
9Okac dameŋ maickeme Eferaimko niniŋ siarereŋ fuazejec, no Israe ŋicguru jaŋere ŋondeŋko dâŋ mufuapo i deŋkeocmu.
10Juda fekicnefâc‐ticne jaŋe, ŋic mâreŋte ma âke suepie raekac iŋucne embiŋ; no kimbeŋ‐nane opâ iŋucne fai‐jeŋicko hoŋkepemu.
11Eferaim e wiac jabane bâjâpezore maŋkewecte eebapa‐ticne imackehuc fific guguriŋ ecnekicne.
12No ine Eferaim wâfu qoʒazaŋ, â Juda kikefuŋ fiu kurumbuc jaŋe iŋucne ejacteekopac.
13Eme Eferaim ŋic jaŋe hucjeŋic honehapie Juda kikefuŋ jaŋe sisiwiŋ‐jeŋic ʒâŋitambiŋ, ehuc Eferaim jaŋe Asiria mâreŋko rambiŋ, â Juda kikefuŋ jaŋe ŋicwofuŋ sâkorao dâŋ râepie rawec. Eki ine hucŋeŋic bâniniŋkeocte â sisiwiŋ‐ŋeŋic qasume tackeocte tâpiri mi focnekac.
14No Eferaim laioŋ iŋucne râsi ecnekopac, â Juda kikefuŋ laioŋ motec ɋâri iŋucne erâ kisuc qâsuc‐joparâ bacjopa rakopac, eme no bacjopa rahape ŋic moczi sâcne moc mi batarac‐jopaocmu.
15No nahacne haeo risie juhape jaŋe kiŋ bahac‐jeŋic hone tararâ maicnunʒepieŋ, ehuc ʒârâ hâriŋ dameŋ‐jeŋicko wira basac enarehuc ʒiŋuc munʒepieŋ:
