1Dislot na det femili blanga Eran en Mosis langa det taim wen YAWEI det trubala God bin tok langa Mosis deya langa det hil gulum Sainai.
2Eran bin abum fobala san. Det fesbon san blanga im bin neim Neideb, en det najalot bin neim Abaihu, Eliyeisa en Ithama.
3Wal Mosis bin gajim oil na en pudum langa Eran fobala san langa olabat hed en imbin meigim olabat serramonimen na.
4Bat det dubala, Neideb en Abaihu bin dai langa det deset kantri gulum Sainai, dumaji dubala bin gibit nogudwan faiya ofring langa YAWEI. En det dubala nomo bin abum eni biginini. Wal Eliyeisa en Ithama bin serramonimen en deibin kipgon dumbat det wek garram Eran det dedi blanga dubala.
5Wal YAWEI bin dalim Mosis,
6“Yu garra bringimap det Libai klen en meigim olabat wekinmen blanga Eran.
7Dei garra maindimbat det Seikridwan Tent gudwei wulijim dei garra albumbat Eran, en wek blanga olabat kantrimen du.
8Dei garra maindimbat ola enijing insaid langa det Seikridwan Tent, en dei garra wek blanga ola Isreil pipul.
9Oni det Libai klen garra abum det wek blanga album Eran en im dubala san.
10Yu garra dalim Eran en im dubala san, dei garra dum det wek blanga serramonimen. If enibodi brom najalot klen garra trai blanga dum det wek, wal dei garra lafta kilim im ded,
11dumaji det Libai klen garra jidan main ronwan pipul na. Langa det taim na wen aibin kilim detlot fesbon san blanga detlot Ijip pipul, aibin oni pikimat detlot fesbon san brom detlot Isreil pipul, en detlot enimul du blanga jidan main ronwan pipul. Bat ai nomo wandim detlot fesbon san brom detlot Isreil pipul garra jidan main ronwan pipul, bat ai wandim oni det Libai klen garra jidan main ronwan pipul, dumaji mi na YAWEI.” Lagijat na YAWEI bin tok.
14Wal langa det deset kantri gulum Sainai YAWEI bin dalim Mosis
15blanga kaundimap ebribodi langa det Libai klen en femili en raidimdan neim blanga ola beibi boi, raidap langa ola olmenolmen.
16Lagijat na Mosis bin dum.
17Wal Libai bin abum thribala san neim Geshan, Kohath en Merarai, en detlot na bin grengrenfathamob blanga detlot femili weya bin yusum olabat neim. Geshan bin abum dubala san neim Libnai en Shimiyai. Kohath bin abum fobala san neim Emrem, Isa, Hebran en Yusiyel. En Merarai bin abum dubala san neim Malai en Mushai. Olabat na bin det grengrenfathamob blanga detlot femili weya bin yusum olabat neim.
21Wal blanga det femili grup blanga Geshan deya bin det dubala femili gulum Libnai en Shimiyai.
22En deibin kaundimap ol detlot men brom wan manth ol en oba, en det namba bin 7,500.
23Ol dislot femili garra kemp sangodansaid biyain langa det Seikridwan Tent.
24Eliyasaf det san blanga Layel, bin boswan blanga ol detlot Geshan femili,
25en olabat bin boswan blanga det Seikridwan Tent, insaidwei en atsaidwei, en blanga det ketin langa det dowawei,
26en blanga det ketin weya jidan raidaran langa det yad blanga det Seikridwan Tent, en langa det teibul blanga ofring en det ketin langa det geit. Olabat bin bos blanga lukaftumbat ol dislot ting na.
27Wal blanga det femili grup blanga Kohath deya bin detlot femili blanga Emrem, Isa, Hebran en Yusiyel.
28Wal deibin kaundimap ol detlot men brom wan manth ol en oba, en det namba bin 8,600.
29Ol dislot femili garra kemp langa sauthsaid langa det Seikridwan Tent.
30En Elisafan, det san blanga Yusiyel, bin boswan blanga detlot femili,
31en olabat bin boswan blanga det Seikridwan Boks, en teibul blanga det damba, en det pol blanga det lemp, en blanga detlot teibul blanga ofring, en blanga ol detlot ting weya detlot serramonimen yusumbat insaid langa det Seikridwan Pleis en blanga det ketin langa det dowawei blanga det Brabli Seikridwan Rum. Olabat na bin boswan blanga lukaftumbat ol dislot ting na.
32Det boswan blanga det Libai klen bin Eliyeisa, det san blanga Eran hubin det serramonimen. Im na bin boswan blanga detlot hu wek langa det Seikridwan Pleis.
33Wal blanga det femili grup blanga Merarai deya bin det dubala femili gulum Malai en Mushai.
34Wal deibin kaundimap ol detlot men brom wan manth ol en oba, en det namba bin 6,200.
35Ol dislot femili garra kemp langa nowathsaid langa det Seikridwan Tent, en Suriyel, det san blanga Ebiheil, bin det boswan blanga detlot femili.
36Olabat bin boswan blanga maindimbat det freimpat blanga det Seikridwan Tent weya det wadi en pol jidan kroswei, en det bodampat, en ola ebrijing. Dislot na boswan blanga dumbat det wek blanga dislot ebrijing.
37Dislot iya, olabat bos blanga detlot wadi en pol weya jidan kroswei, en bodampat, en ola peig en roup blanga det atsaid yad du.
38Mosis en Eran en im sanmob garra kemp lida langa det Seikridwan Tent langa sanraiswei. Olabat na bos blanga ebrijing deya langa det Seikridwan Pleis blanga ola Isreil pipul, en if enibodi mowa garra trai blanga dum, wal dei garra kilim im ded.
39Wal Mosis en Eran bin duwit langa YAWEI en deibin kaundimap 22,000 boiwan wan manth ol en oba langa det Libai klen.
40Wal YAWEI bin dalim Mosis, “Ola fesbon san blanga ola Isreil pipul, olabat blanga main brom wan manth ol en oba. Yu garra raidimdan olabat neim, bat ai wandim det Libai klen garra deigim pleis blanga detlot Isreil fesbon san. Dei garra jidan main pipul, dumaji mi na YAWEI det trubala God. Ai wandim ola enimul blanga det Libai klen, dei garra deigim pleis blanga ol detlot fesbon enimul blanga ola Isreil pipul.” Lagijat na YAWEI bin tok.
42Wal Mosis bin dum lagijat. Imbin kaundimap ola fesbon san
43wan manth ol en oba, en det namba bin 22,273.
44Brom deya YAWEI bin tok langa Mosis,
45“Det Libai klen na jidan main, jis laik detlot fesbon san blanga ola Isreil pipul bin jidan bifo, en yu garra meigim ola enimul blanga det Libai klen blanga jidan main jis laik detlot fesbon enimul blanga detlot Isreil pipul bin jidan bifo.
46Dumaji detlot fesbon san blanga ola Isreil pipul bin 273 mowa langa det Libai klen, yu garra lafta baiyimbek detlot 273 fesbon san.
47Blanga detlot na, yu garra pei faibala silbawan mani, det raitwan mani.
48En gibit det mani langa Eran en im dubala san.” Lagijat na YAWEI bin tok.
49Wal Mosis bin duwit en gajim
50det 1,365 silba mani.
51En imbin gibit langa Eran en im dubala san.
