NAHUMMU 2

1

2

3

¹Díndi Sudɑɑ kɔbɛ! Ntɛnɛ̀ wèè nɑ̀ɑ́ ntinɑ́ɑǹsɑ̀ɑ̀tì kɛ kéríní yɛtɑ̃rɛ̀ ĩ́nkɛ̀, ò tɔní diwɛ̀ì kó tinɑ́ɑǹtì nti. Sudɑɑ kɔbɛ mbɑɑ̀nnɛ̀ di bɑɑ, kɛ́ndɔɔri di dɔúnnɛ̀ yɛ̀ɛ̀ nɔ̀ ti Yiɛ̀ nKuyie, kɛ yɛ̃́ Asidii kóò kpɑ̀ɑ̀tì yɛiwe tɛ̃́nkɛ í wɛ̃tinímɛ̀ di borɛ̀, bɛ̀ ò dɛ̀ìtɛ pɑ́íí nwe.

²Díndi Ninifu kɔbɛ bɛ̀ di doti mudoò mmu, dekɛnɛ̀ dihɛì kó iduotí kɛ́mbɑɑ yɛbòrɛ̀, kɛ́pénnɛ́ icɛ, bɑ́ɑ́tínɛ̀ mɛsɑ̀ɑ̀, nkɛ pĩ́ ndimɑ́ɑ̀,

³Ti Yiɛ̀ nKuyie nwɛ̃ti kɛ bo duɔ́mmu Sɑkɔbu yɑɑ̀bí i wɛ̃rímú, kù wɛ̃ti kɛ bo cónnɛ́mu Isidɑyɛɛribɛ bɛ fɔ̃̀tìrì, bɛfèèbɛ̀ bɛɛ̀ do bɛ̀ pɔ̀ntɛ.

⁴Kɛ̀ ti Yiɛ̀ nKuyie mbɛ́i nkɛ dɔ̀: Ninifu kɔbɛ di dootitɔbɛ̀ dɔpììtì tò mmɛwũɔ̃̀ mmɛ, bɛ kó bɛhɑ̃ɑ̃pɔ̀mbɛ̀ yɛkɔ̃m̀bɔ̀ yɛmbɛ̀ dɑ̀ɑ́tí tiyɑɑ̀wũɔ̃tì nti, kɛ̀ bɛ kpɑ̀rìnɑɑsɛ̃ĩ́ pĩnti kɛ dò mmuhɑ̃ɑ̃́, kɛ̀ bɛ̀ yùo yɛkpɑ̃ɑ̃̀.

⁵Ntɛ bɛkpɑ̀rìnɑɑsɛ̃ĩ́ kɛ puotì yɛtɑ̀rɛ̀ di kó dihɛì miɛkɛ, kɛ tũũ̀ ndi cɛ nɛ̀ di kɑri dɛ̀, kɛ pĩnti kɛ dò nyɛhɑ̃ɑ̃tĩrɛ, kɛ cɑ̃ɑ̃́ fɛtɑpíɛ̀fɛ̀ kɔ̃mɛ.

⁶Ninifu kpɑ̀ɑ̀tì yumu o ɑ̃ɑ̃pɔ̀mbɛ̀ iwɛ̃ĩ yɛmbɛ̀ kɛ̀ bɛ̀ kpeutí, kɛ̀ bɛ dootitɔbɛ̀ cokɛ́ mɛcɑ̃ɑ̃ nkɛ kɔ̀tɛ kuduotí borɛ̀ kɛ bɛ̀ bɑ̀ɑ̀,

⁷kɛ còńnɛ́ kuperí, kɛ pɔ̀ntɛ kunɛ́cɛ kó dibòrì. Kɛ̀ kufɔ̃wɑɑ́ nhɑutɛ́ tɛkpɑ̀ɑ̀tìcĩ́ɛ̃̀tɛ̀ kɔbɛ.

⁸Kɛ̀ bɛ̀ dɛ̀itɛ tɛbɔɔtenkɑɑnìtɛ̀ sɑ̃tì, kɛ tɛ̀ uutɛ́ kɛ kònnɛ̀. Bɛnitipòbɛ̀ bɛ̀ɛ̀ do tɛ̀ bɑ̀ɑ, kɛ̀ bɛ̀ kuɔ̀ nyɛsɑ́útìdɑbùò nyɛkpɛtìnɔ́nkperɛ kɔ̃mɛ, kɛ pĩĩ mbɛ cĩ̀ncĩ̀rɛ̀.

⁹Kɛ̀ bɛnìtìbɛ̀ cokù Ninifu kɛ yiɛ̀ kubinku ɔ̃ɔ̃ kpɛ̃́tɛ́, kɛ̀ mɛniɛ nní nhorì mɛ̀ɛ̀ botí, kɛ̀ bɛ̀ pɛ́inko kɛ tú: Cómmúnɛ̀! Cómmúnɛ̀! Òmɔù mɛ nyí wɛ̃ɛ̃ri.

¹⁰Kounɛ̀ mɛsɔɔ, kounɛ̀ timɑ́tì pɛ́ítì. Tikpɑ̀tì tìì bo dihɛì tì í dò nkɛ́deè, Tinɛnsɑ̀ɑ̀tì tibotí tibotí píɛ́kɛ́mu.

¹¹Pɔntɛnɛ̀ kɛ́dɛ́ítɛ́ kɛ́hɛí di dɔ́ dɛ̀, bɛmɔu bɛ kɔ̃m̀bùɔ̀tì domu, kɛ̀ bɛ núù mbɔ̀kɛ́ kɛ̀ bɛ kɔ̃̀ntì ɑu.

¹²Yé dihɛì dìì do tú yɛcìrícìrɛ̀ kó kudènkù dì kɔ̀tɛ kɛ̀? Dìì nìtìbɛ̀ do bo yɛcìrícìrìbɛ kɔ̃mɛ bɑ́ òmɔù í bɛ̀ kɔɔ́nnɛ̀.

¹³Dɛ kó dihɛì kɔbɛ do wɑɑ̀ mbɛ diitì dicìrícìrì ɔ̃ɔ̃ pĩ́mmɛ̀ mmɛ kɛ́dɔú nkɛ̀ yɛniiyɛɛ túótɛ́, Dì ɔ̃ɔ̃ pĩ́ nkɛ́píɛmmu yɛ dènkù iorimɑɑ.

¹⁴Di mmɔ̀nnì mí ndi Yiɛ̀ nKuyie Mpɑkɛdɑɑ n yìtɛ́ kɛ còḿmúmu fɔ̃́ nNinifu ɛì ɑ kpɛ́í, kɛ bo cɔ́u nhɑ kpɑ̀rìnɑɑsɛ̃ĩ́, kɛ́fíé ɑ nìtìbɛ̀ bɛ̀ɛ̀ dònnɛ̀ yɛcìrícìrìbɛ. A tɛ̃́nkɛ í yó nkpɑɑ́ pĩĩ ntiwɑnwɑntì, kɛtenkɛ̀ ĩ́nkɛ̀ dɛndɛ dèèmu. Bɛ̀ tɛ̃́nkɛ bɑ́ɑ́ keè dɛ̀mɑrɛ̀ ɑ tɔ̃rɛ̀ kó mɛtɑmmɛ̀.