NAANA 25:10-34 - Luda yã takada kↄ̃n Bokobaru yão

NAANA 25:10-34

Click on verse(s) to share them!

¹⁰kɛ̀ Ibraĩ pì lù Itinↄa. Gwen wà à vĩ̀in kↄ̃n a naↄ̃ Sarao.

¹¹Ibraĩ gana gbɛra Luda aubarika dà à nɛ́ Isaakun. À vɛ̃ɛna Ludabɛ̃ɛkɛema'ee lↄ̀gↄ saɛ.

¹²Ibraĩ nɛ́ Sumaila boriinↄ yãn yɛ̀. Sara zĩkɛri Agyara, Igipiti nↄgbɛ̃ bé à nɛ́ pì ìo.

¹³Sumaila nɛ́gↄ̃gbɛ̃nↄ tↄ́n yɛ̀ lán wà ń í nà. À daudu tↄ́n Nɛbayo. À dãaronↄ tↄ́n yɛ̀: Keda, Adabɛli, Mibisamu,

¹⁴Misima, Duma, Masa,

¹⁵Adada, Tema, Yetu, Nafisi kↄ̃n Kedemao.

¹⁶Sumaila nɛ́gↄ̃gbɛ̃nↄ tↄ́n gwe. Aↄ̃ baade a tↄ́ kpà a lakutu ke a bùranɛ. Aↄ̃mbe à bori kuri awɛɛplaaanↄ kínanↄ ũ.

¹⁷Sumaila kɛ̀ wɛ̃̀ baswɛɛdo akuri awɛɛswɛɛplaa, ben à gà à kà a gbɛ̃nↄla gɛ̀wãa.

¹⁸À boriinↄ vɛ̃̀ɛ zaa Avila ai à gàa pɛ́ Surua, Igipiti ↄfãntɛ̃bↄɛ kpa gana Asiria bùsu kpa. Aↄ̃è kↄ̃ tɛ́ kpákpa kↄ̃n Ibraĩ bori kpaaanↄro.

¹⁹Ibraĩ nɛ́ Isaaku boriinↄ yãn yɛ̀. Ibraĩ Isaaku ì.

²⁰Kɛ̀ Isaaku kà wɛ̃̀ baplaa, ben à Labã dãre Rɛbɛka sɛ̀. Àmbe Siria bùsu gbɛ̃ Bɛtuɛli kɛ̀ bↄ̀ Mɛsↄpↄtamia bùsun nɛ́ ũ.

²¹Isaaku wɛ́ɛ kɛ̀ Diia a naↄ̃nɛ, zaakɛ pãaamɛ, ben Dii à adua sì, à naↄ̃ pì nↄ̀ sì.

²²Sìkanↄↄ e ↄsi kaa à gbɛɛɛn, ben à bè: Bↄ́yãnzi yã beee taka ma lezi? Ben à gàa à Dii là.

²³Dii bènɛ: Bori mɛ̀n plaaa kú n nɛ́'isↄn, gↄ̃ↄn plaaa kɛ̀ aↄ̃ↄ kú n gbɛɛɛn pìnↄ é kɛ̃kↄ̃a. Bori mɛ̀n doo gbãaa égↄ̃ dɛ a doola, à kɛ̀ bↄ̀ káaku égↄ̃ zↄ̀ nɛ́ ũ zãanɛ.

²⁴Kɛ̀ à nɛ́'igurↄↄ kà, ben à sìkanↄ ì gↄ̃gbɛ̃nↄ ũ.

²⁵Kɛ̀ gbɛ̃ káaku e bↄↄ, à bↄ̀ tɛ̃ɛ zónzon. À mɛ̀kã vĩ lán uta kãdee bà, ben wà tↄ́ kpànɛ Isau.

²⁶Beee gbɛra kɛ̀ nɛ́ plaadee e bↄↄ, à dↄ̀ Isau gbátogea, ben wà tↄ́ kpànɛ Yakubu. Isaaku wɛ̃̀ baaagↄ̃dee guun à nɛ́ pìnↄ ì.

²⁷Nɛ́ pìnↄ bíta kũ̀. Isau kɛ̀ tofekari gbãaa kɛ̀ è kɛ̃ sɛ̃̀tɛaroo ũ. Yakubu sↄ̃ bɛgwarimɛ.

²⁸Isaaku ye Isauzi kɛ̀ à nↄ̀bↄ lóu vĩ yãnzi. Rɛbɛka sↄ̃ↄ ye Yakubuzi.

²⁹Zĩkea Yakubu e dò kukuu, ben Isau sù kↄ̃n sɛ̃̀tɛo nↄaa e à dɛɛ.

³⁰Ben à bè Yakubunɛ: N yã nna! Ǹ tó mà dò tɛ̃a beee ble, zaakɛ nↄaa e ma dɛɛmɛ. Beee yãnzi wà tↄ́ kpà Isaunɛ Ɛdↄmu.

³¹Yakubu bè: Ǹ n daudukɛzɛ kpáma gĩa.

³²Ben Isau bè: Má kú gaa lɛ́zĩ, bↄ́n ma daudukɛzɛ é kɛmɛɛ?

³³Ben Yakubu bènɛ: Ǹ lù sɛ́mɛ gĩa. Ben à lù sɛ̀nɛ à a daudukɛzɛ kpàa.

³⁴Ben Yakubu burɛdi kpàa kↄ̃n bládo pìo. À blè à í mì, ben à fɛ̀ɛ à bↄ̀. Lɛmɛ Isau kɛ̀ lɛ, à a daudukɛzɛ dìɛ pã.