Mphattuwelo 25:10-34

¹⁰nenne nthala, Aparahamu nathumanannyawe maHitita. Vaavale phivithiyawe Aparahamu wamoca ni Asaara amwaarawe.

¹¹Nanso nakhwileene Aparahamu, Nluku ahonreeriha Isaki. Vano Isaki aakhala vakhiviru ni Iluusi yo Lahayi-Royi.

¹²Vano ula phu ucuulu wa Sumayili, mwana annyanryawe Aparahamu ni Akaari o Wiciipitu, ipottha ya Asaara.

¹³Ala phi macina a asaana a Sumayili, yantikhaciye ittharihiyaka eyareelo aya: Nepawoti, mwana omuulupale a Sumayili, Ketari, Apeteli, Mipisamu,

¹⁴Misima, Tumaa, Masaa,

¹⁵Hattatti, Temaa, Yeturi, Nafisi ni Ketemaa.

¹⁶Ala phaari asaana a Sumayili, yakhalacile ahooleli o mahimo, mmawaani mwaya ni mmapuroni mwamakiya yeehaneliya yaala macina ala. Ahooleli ayo yaari khumi nuuwa eeli.

¹⁷Sumayili ahokhala myakha iminya wo talathiini na saapa (137) ceyarelo. Ahokhwa ni watthara mayathumwane okhalayi.

¹⁸Ucuulu awe wahokhala nttetthe unkhuma o Havila urwaka o Suuri, vakhiviru ni mwiinano wo Wiciipitu, mphantte unrwaa o Siiriya. Ni yaheeserana mpika na asunnaya.

¹⁹Ala phi mayaranacelo o nrukulu na Isaki, mwana Aparahamu: Aparahamu ahonnyara Isaki.

²⁰Isaki narina myakha arupayini ceyarelo, ahonthela Repeka, mwana a Petuweli, Nramewu o Patan-Aramu, aari mwanrokorawe Lapanu, ni uyo ciicammo Nramewu.

²¹Vano Isaki ahonlepela Nluku, kontha amwaarawe ayo yari mwali eekupa. Phimaana Mwaneene Nluku ahaakhula iswali cawe nnyo ni Repeka ahorupala irukulu.

²²Urupala wawe, asaana ayo munthukwani mmo yaanawaanaca, ni Repeka aheera: Nlattuni ikikhumelelaka ila itthu ila? Ni ahorwaa unkoha Mwaneene Nluku.

²³Vano Mwaneene Nluku ahomwaakhula: Ilapo piili phiriwo munthuukwani mwaa mmo, phimaana anakhuma mommo atthu eeli ni anaahala umwalana: Mmoca uyo nokookhala okuru oompwaha nkhwawe, nanso omuulupale uyo naahala unvarela nteko omwankani uyo.

²⁴Vaavale, waphiilyaya ukati wooyara, khweeli ahorumelelihiya wiira yaari mavatta munthukwani mwawe mmwe.

²⁵Oopacera uyariya uyo aari okharari cookhwiila, ni irutthu awe yothene yaari yo mapururu; phimaana ahovahiya ncina na Isawu.

²⁶Wahoolo ahoyarya mwanhimaawe, ntata nawe naavarenle ikottokottho ya Isawu; phimaana ahovahiya ncina na Yakopi. Ukati waayarawe Repeka, Isaki aarina myakha sitiini ceyarelo.

²⁷Asaana ale yahonuwaca. Isawu aari nlupa oocuwela utotha ni aari nantakhwani. Nanso Yakopi waari nteko awe paahi uhakhela imope ni aakhala mmaheemani.

²⁸Isaki anfenta Isawu, kontha cancivela ukhura inama ceevawe; ni ciicammo Repeka anfenta Yakopi.

²⁹Nanso ikwaha imoca, Yakopi aapyaacaka yoolya, ahowa Isawu navoliye itala, akhumaka utakhwani,

³⁰ni ahommekela eeraka: Ukimeele vakani nhuci woserya uyo. Ukivola itala! Phimaana eehaninyaka ciicammo Eetomu.

³¹Vano Yakopi ahomwaakhula eeraka: Woopacera ukitumihereke iyuulupale aa.

³²Vaavale Isawu aheera: Nna vaa kihanle vakani ukhwa. Kimphurela isiyani iyuulupale eyo?

³³Wahoolo Yakopi ahonkhanyereriha Isawu eeraka: Woopacera unlamuliya ulupela. Ni ule aholupela untumihera Yakopi iyuulupale eyo.

³⁴Vano Yakopi ahonvaha Isawu isima ni maruru. Ule aholya nuwurerya, ahonwa nurwaa. Commo Isawu ahovyavyeeha iyuulupale awe.