Dəkəcop 25:10-34

¹⁰Dalɛ dɛnayi ndɛ Abraham ɛnaway nnɔ aHewy ŋayi mɔ. Difɔ anawup Abraham kɔ wəran kɔn Sara.

¹¹Ntɛ defi da Abraham deŋcepər mɔ, kɔ Kanu kəmpocɛ wan kɔn Isiyaka nwɛ ɛnandɛ nde kələmp ka Lahay-Roy kəsək mɔ.

¹²Awut a Səmayila ŋɔ akaŋɛ, Səmayila wan k'Abraham, nwɛ wan wəran wəMisira Akar wəcar ka Sara ɛnakomɛ Abraham mɔ.

¹³Mewe ma awut a Səmayila mɛmɛ, tɔkɔ ŋanabɛkɛnɛ mɔ: Nebayɔt (coco ca Səmayila), Kedar, Adbɛl, Mibsam,

¹⁴Misma, Dumah, Masa,

¹⁵Hadad, Tema, Yetur, Nafis, kɔ Kedma. Awut a Səmayila ŋɔ akakɔ.

¹⁶Mewe maŋan mɔ mamɔkɔ tɛndɛ taŋan cəgbo cəgbo. Abɛ wəco kɔ mɛrəŋ ŋanayi ŋa kiriŋ dɛlay daŋan.

¹⁷Kəyi ka Səmayila doru kənawon meren 137. K'ontorɛ kifir, k'efi, k'ɔnɔŋkəl atem ɔn akɔ ŋanafi mɔ.

¹⁸Afum a Səmayila ŋayi kəyɛfɛ ka Hawila haŋ Sur nsɛ səntɛfərnɛ Misira mɔ, kəkɔ ka kəca ka Asiri. Yuruya ya Səmayila ŋanandɛ ŋatɛfərnɛ awɛŋc aŋa fəp.

¹⁹Afum a Isiyaka ŋ' aŋɛ, wan ka Abraham. Abraham okom Isiyaka.

²⁰Isiyaka ɛnasɔtɔ meren 40 a k'endenɛŋcɛ Rebeka, wan wəran wəka Betuhɛl wəka Aram wəka Padaŋ-Aram, wəkirɛ ka Labaŋ wəka Aram.

²¹Kɔ Isiyaka ontola Kanu Kəpɔŋ teta wəran kɔn, bawo ɛnakom fɛ wan. Kɔ Kanu Kəpɔŋ kəne kətola kɔn. Kɔ wəran kɔn Rebeka ɛmbɛkəs.

²²Kɔ awut ŋayɛfərɛnɛ kɔ kor disrɛ, kɔ Rebeka eyifnɛ: «Ak' ender im tantɛ-ɛ?» K'ɔŋkɔ pəkornɛ Kanu Kəpɔŋ.

²³Kɔ Kanu kəloku kɔ: «Afum a tɔf mɛrəŋ ŋay' əm dəkor, afum mɛrəŋ akakɔ ŋandegbɛyɛnɛ kəwur əm dəkor. Afum a wəkin nwɛ ŋandetasərnɛ aka wəka mɛrəŋ. Wəbeki endeyi wəfɛt wəkɔ dəntɔf.»

²⁴Dəŋkom dɔn k'anəŋk fɔ cəberi cəyi kɔ dəkor.

²⁵Dəŋkom dɔn, kɔ wəcɔkɔ-cɔkɔ wəder ɛla cəfon ceyim dəris pəmɔ wɛsɛm, k'awe kɔ Esay.

²⁶Kɔ teŋcepər, kɔ wəka mɛrəŋ ender pəsumpər atek ŋa wəcɔkɔ-cɔkɔ. K'awe wəkakɔ Yakuba. Isiyaka pəsɔtɔ tɛm tatɔkɔ oŋ meren 60 a k'andekomɛ kɔ awut akaŋɛ.

²⁷Kɔ awut arkun aŋɛ ŋambɛk. Kɔ Esay ende pəyɔnɛ wəpɛn wətɔt, wəbɔtər kəyɛksɛ-yɛksɛ dəkulum kətɛn ka sɛm yɛpɛn, kɔ Yakuba nkɔn ɔyɔnɛ wəyi wəka dare, wətɔsimsɛ dis pəbɔtər kəndɛ d'abal.

²⁸Isiyaka ɛnabɔtər Esay bawo ɛnabɔtər sɛm nyɛ Esay ɛŋc-pɛn mɔ. Rebeka nkɔn pəbɔtər Yakuba.

²⁹Dɔsɔk dɔlɔma kɔ Yakuba oŋcoŋər mɛŋc, kɔ Esay ender pəyɛfɛ dəkulum dis dɔlɔl kɔ.

³⁰Kɔ Esay oloku Yakuba: «Məpoc' em, ilɛtsɛn' am idi pəyim pam papɔkɔ bawo dis dɔlɔl im.» Ti tɔ asɔŋɛ Esay tewe ta «Edɔm».

³¹Kɔ Yakuba oloku Esay: «Məwayər im mɔkɔ dəkəcəmɛ da debeki dam.»

³²Kɔ Esay oloku kɔ: «In' ɛwɛ ic-fi, ake dəkəcəmɛ da debeki dadɔkɔ dendeyɔ em-ɛ?»

³³Kɔ Yakuba oloku: «Mədɛrəm' em kərɛsna.» Kɔ Esay ɛndɛrəmɛ Yakuba k'ɛwayər kɔ dəkəcəmɛ da debeki dɔn.

³⁴Kɔ Yakuba ompocɛ Esay kəcom, kɔ mɛŋc mamɔkɔ. Kɔ Esay endi yeri yayɔkɔ, k'omun, k'ɛyɛfɛ k'ɔŋkɔ. Tatɔkɔ tɔ Esay ɛnagbal dəkəcəmɛ da debeki dɔn.