Miamun 25:10-34

¹⁰Abraham ruŋgan irim nam ntsuman i intap arigi da garam Hit. Da araŋan narun rusan irim araŋan i nigi impruʼ da finiŋgan Sara.

¹¹Gubuʼ Abraham mampa sib, da Yawe ifinti araŋan naruŋgan Isak. Da Isak impa uts da mpui maran Bir-Lahai-Roi.

¹²Abraham naruŋgan Ismail rima da Hagar, sagat Idzip aru Sara sagat guman ugu, yaŋin rusan nangan ani.

¹³Ismail narun rusan biŋangan atsuŋʼa i ruan ibiani: Nebaiot, Ismail narun marub miamun, da Kedar, Adbil, Mipsam,

¹⁴Misma, Duma, Masa,

¹⁵Hadat, Tema, Jetur, Nafis da Kedema.

¹⁶Nigi Ismail narun rusan. Garam 12 igi tafan rusan biŋaŋgan imunti imiŋʼ gamp ruga rugan da intap ribaraŋan mpada gin.

¹⁷Ismail impa udzufan isaŋʼ 137, da araŋan imamp da ifa da tafan rusan mampan ugu.

¹⁸Ismail yaŋin rusan impai imiŋʼ intap Hawila ifa isaŋʼ gamp Sur, intap Idzip marafain gan gubuʼ yaban, sanab fada Asiria gin. Da anuŋʼ irut rain rusan impa bini u.

¹⁹Nani Abraham naruŋgan Isak nangan ragidan ani.

²⁰Gubuʼ Isak udzufan saŋʼa 40 da iyu Rebeka, Betuel naruŋgan finam da Laban nafuŋgan, ribaraŋan garam Aram mpada Mesopotemia ugu.

²¹Isak finiŋgan isu sagat yami, ibinigi da Isak yugin da Yawe i rima araŋan finiŋgan sib. Yawe iriŋant i araŋan nangan udagin da Rebeka iwaŋun.

²²Mamaʼ narun iruʼ miŋʼa Rebeka waŋun igi yis ruan imiŋʼ rinan waŋun wasaʼ. Ibinigi da araŋan ifan da Yawe i nan udagin da ini binaʼ, “Wain idzuwai da nam bida ani iwaʼ da dzi?”

²³Da Yawe ini da araŋan ibiani, “Garam utup iruʼrun imiŋʼ u waŋum. Garam utup iruʼrun u nida riman igi buŋʼ antap ruan namunti ruga rugan. Da utup maŋan buŋʼ asu riniurun da nayab ragun i maŋan. Da mamaʼ narun waʼa miamun buŋʼ asu mamaʼ waʼa bampan garam guman.”

²⁴Iwaʼ araŋan gubuʼ gan rima narun da irim narun bampuŋʼ.

²⁵Mamaʼ miamun waʼan igi rinin isu biʼ funub da rinifufun iyus, da ribigi inuʼ araŋan biŋaŋgan Isau.

²⁶Da raiŋgan waʼa atsuŋʼa araŋan da baŋin ruturiʼ i faga mutun. Ibinigi da ribigi inuʼ araŋan biŋaŋgan Yakop (waiŋgan ‘gifa faga mutun’). Isak udzufan isaŋʼ 60 da gubuʼ aru Rebeka rima mamaʼ bampuŋʼ iruʼ igi.

²⁷Mamaʼ narun iruʼ igi ibasu garam sib da Isau isu garam mararuru da baŋi-tatiʼ i yuŋa wap da waʼan da apu. Da Yakop araŋan garam mpada ntras aŋu, da araŋan inaŋ da impa gamp aŋu.

²⁸Isak maran yari nidzun aŋu i Isau, wain ibiani, araŋan nugun itsiaʼ i gada apu Isau yuŋa gin. Da Rebeka ibinigi maran yari nidzun i Yakop.

²⁹Gubuʼ maŋan da Yakop itip mpuaʼ i upis nidzun, da Isau imiŋʼ wap iba da maŋits irut araŋan nidzun aŋu,

³⁰da ini da Yakop, “Maŋits yis dzi funub aŋu! Warim nam biʼ igi fain da dzi nagan!” (I wain igi da ifariŋʼ araŋan biŋaŋgan Idom, i waiŋgan ibi ‘biʼ’.)

³¹Da bitsintaʼ Yakop ini da araŋan ibiani, “Hai, da bitsintaʼ warim mamaʼ miamun naŋgan suda wain gin da dzi raiyi, ida dzi buŋʼ arim mpuaʼ ani da agu.”

³²Da Isau ini, “Oiyo! U tsaŋan dzi naŋ i mampan! Da dzi naŋgaŋʼ miamun dzi suda wain gin igi burima dzi sib bida anuŋʼ? Isaŋʼ i!”

³³Da Yakop itip ini, “Wataga ruam da wani nan nidzun muŋʼ da dzi i u rima nam mamaʼ miamun gan suda wain gin da dzi.” Ibinigi da Isau itaga ruan da irim nam mamaʼ miamun gan ifan da Yakop.

³⁴Intsup sib da Yakop irab mpuaʼ upis nidzun da nam gadan araŋan tipan da Isau. Da araŋan iga nam da inum mpuaʼ isaŋʼ araŋan sufan, da yuriʼ da ifan. Uwayant Isau santiŋʼan igi araŋan itsaŋa nam mamaʼ miamun gan suda wain gin igi ibi nam utaʼ aŋu.